Click the advt. below to view Meesaya Murukku – Official Trailer | Hiphop Thamizha, Aathmika | Sundar C | Avni Music

7 நாட்கள் @ விமர்சனம்

naat 1

மில்லியன் டாலர் மூவீஸ் சார்பில் கார்த்திக் , கார்த்திகேயன் இருவரும் தயாரிக்க, சக்தி வாசு, பிரபு, நாசர், நிகிஷா பட்டீல், கணேஷ் வெங்கட் ராமன் ஆகியோர் நடிப்பில், 

கவுதம் வி ஆர் எழுதி இயக்கி இருக்கும் படம் 7 நாட்கள். எத்தனை நாட்கள் தாங்கும்? பார்க்கலாம் .

மாநிலத்தின் முதலமைச்சரையே (சந்தான பாரதி) உருவாக்கும் அளவுக்கு சக்தி வாய்ந்த கோடீஸ்வரரான விஜய ரகுநாதனின் (பிரபு) மகன் சித்தார்த் (ராஜீவ் கோவிந்தப் பிள்ளை).

அவனோடு  பழகி , பின்னர் சண்டை போட்டு விட்டுப் பிரியும் பெண்கள் அடுத்தடுத்து கொல்லப் படுகின்றனர் . ஆனால் ”நான் எதுவும் செய்யவில்லை” என்கிறான் சித்தார்த் .

அவனுக்கு ஒரு பெரிய தொழில் அதிபர் மகளோடு திருமணம் நிச்சயம் ஆன நிலையில் ,

??????????????????????

கொல்லப் பட்ட பெண்களில் ஒருத்தியான ஜெனீபரின் (அங்கனா ராய்) கொலையில் சித்தார்த்துக்கு தொடர்பு உண்டு என்பதற்கான ஆதாரம்,

தன்னிடம் இருப்பதாகக் கூறி ஒருவன் விஜய ரகுநாதனை போன் செய்து மிரட்டுகிறான் .

அவனை கண்டு பிடிக்க, தனது வளர்ப்பு மகனும் திறமை வாய்ந்த சி பி ஐ அதிகாரியுமான சாய் பிரசாத்தை (கணேஷ் வெங்கட்ராமன் ) பயன்படுத்துகிறார் விஜய ரகுநாத் .

விஜய ரகுநாதனுக்கு சொந்தமான வி டி வி என்ற தொலைக்காட்சி சேனலில் வர்ணனையாளராக இருக்கும் பூஜாவும் ( நிகிஷா பட்டீல் ) 

naat 3

பண்பலை வானொலி வர்ணனையாளர் கவுதம் கிருஷ்ணாவும்  (சக்தி வாசு)  எதிர் எதிர் வீடுகளில் வசிக்கும் சண்டைக் கோழிகள் .

ஜெனீபர் கொலைக்குக் காரணமான வீடியோ ஆதாரம் ஒன்று கவுதம் பூஜா இருவருக்கும் இடையில் அவர்கள் அறியாமல் சிக்கிக் கொள்கிறது .

அவர்களை சாய் பிரசாத் தன் போலீஸ் சக்தியோடு துரத்த, ஒரு நிலையில் அவர்களுக்கு விசயமும் விபரீதமும் புரிய,  அவர்கள் தப்பினார்களா ? ஆம் எனில் எப்படி ?

சித்தார்த் குற்றவாளியா இல்லையா ? இல்லை எனில் யார் குற்றவாளி என்பதே 7 நாட்கள். 7 நாட்களில் ஒட்டு மொத்த கதையும் நடப்பதால் இந்தப் பெயர் .

naat 5

டைட்டிலில் வரும் கிராபிக்ஸ் அசத்தல் .

படம் ஆரம்பித்ததும் நம்மைக் கவரும் முதல் விஷயம் எம் எஸ் பிரபுவின் ஒளிப்பதிவு . அடேயப்பா .. என்ன ஒரு குளிர்ச்சியும் அழகும் ! அருமை .

ஒரு தொழில் அதிபர் முதல் அமைச்சரின்  ஆபிசில் நுழைந்து ஐ ஜி முன்பே முதல்வரை மிரட்டுகிறார் என்பதை நம்ப முடிகிறது என்றால் அதற்குக் காரணம் பிரபுவின் கம்பீரத் தோற்றமும் நடிப்பும் . சூப்பர் .

வீடு முழுக்க சிவாஜியோடு பிரபு இருக்கும் புகைப்படங்களை வைத்து கெத்து கூட்டுகிறார்கள் .

naat 6

விஷால் சந்திரசேகரின் பின்னணி இசை சிறப்பு .

சக்தி வாசு மிக இயல்பாக நடிக்கிறார் .

கரை உடைக்கக் காத்திருக்கும் நிரம்பிய ஏரி நீர் மாதிரி , இறுக்கமான உடைகளுக்கு இடையில் பிதுங்ங்ங்ங்ங்கி வழிகிறார் நிகிஷா பட்டீல். யப்பா  ஆ ஆ !

ஆனால் முக்கியமான கிளாமர் டூயட் பாட்டில் ஆன்ட்டி லுக் தெரியுது . கவனம் கவனம்

சித்தார்த் நல்லவனா ? அவன் மீது சாய் பிரசாத்துக்கு இருப்பது பாசமா வஞ்சமா என்ற சந்தேகத்தை வளர்க்கும் வகையிலான திரைக்கதை ஒரு எல்லை வரைக்கும் ஒகே .

ஆனால் அதுவே ஒரு எல்லைக்கு மேல் போவது  களைப்பு , அதுவும் முடிவை யூகிக்க முடிகிற நிலையில் !

naat 2

ஒரு நிலையில் அழுத்தம் இல்லாமல் காட்சிகள் தறி கேட்டு ஓடுகின்றன . அப்புறம் அது ஒரு நிலைக்குள் அடக்கி ஒடுக்கி ஒழுங்குபடுத்தப் படவே இல்லை

பிள்ளைகள் கையில் வீடியோ கேம்ஸ் உள்ள போனைக் கொடுப்பதால் போன் சமயத்துக்கு உதவ முடியாமல் போவதை சொல்வது அருமை .

சண்டை போட்டுக் கொண்டே இருக்கும் கவுதம் பூஜா இருவரும் வேலைக்காரி வீட்டில் தங்க, இடி இடிக்கும் போது பயந்து போன நாயகி நாயகனை கட்டிப் பிடிக்க , அப்படியே டூயட் பாட்டு துவங்குது ,

ப்ப்ப்பப்ப்ப் பா ஆ ஆ ஆ ஆ !  எவ்வளவு புதுசான புதுமையான இதுவரை பார்த்திராத வித்தியாசமான காட்சி . ! ம்ம்ம். நடத்துங்க  ராசா !

naat 7

மறைந்த வி எஸ் ராகவன் எவ்வளவு பெரிய பழம்பெரும் நடிகர் !ஒரு  நாய் பேசுவது போன்ற காட்சிகளில் அவர் குரலை மிமிக்ரி செய்து இருக்க வேண்டாமே .

அவர் சார்பாக யார் வந்து கேட்கப் போகிறார்கள் என்ற எண்ணம்தானே ?

ஒரு கமர்ஷியலான வெற்றிப் படத்துக்கு முயற்சி செய்துள்ளனர் .

ஆனால் அதில் முழுமை இல்லாத காரணத்தால் முயற்சி திருவினையாக்கவில்லை .

7 நாட்கள் .. பாதிக்கும் மேல் லீவு



பெயர் : சு.செந்தில் குமரன் புனைப் பெயர் : ராஜ திருமகன் கல்வித் தகுதி : B.E. Mechanical பிரசுரமான முதல் படைப்பு : கவிதை -- பெங்களூரில் நடந்த 'பெரிய' மாநாட்டில் தேங்காய் எண்ணையில் சமைத்த உணவே தேவை என்றாராம் ஜெயவர்த்தனே! நல்ல வேளை..... தமிழன் ரத்தம் கேட்கவில்லையே (1986 ஜூனியர் விகடன் ) பத்திரிக்கைப் பணி : விகடன் மாணவ நிருபர் திட்டம் (1988- 89) மிகச் சிறந்த நிருபர் (outstanding reporter) விருது (1989 ) விகடன் குழும இதழ்களின் சிறப்பு நிருபர் (பல ஆண்டுகள்) விளம்பர முகவர் ---ஏற்றுமதி உலகம் இதழ் (ஒரு ஆண்டு) கட்டுரைப் பகுதி பொறுப்பாசிரியர் --மாலை முரசு குழும இதழ்கள் (பல ஆண்டு) சினிமா பகுதி ஆசிரியர் (தின மதி நாளிதழ்) நிருபர் (குமுதம்) உதவி ஆசிரியர் (குமுதம் ரிப்போர்ட்டர்) பொறுப்பாசிரியர் (குமுதம் ஹெல்த்) சினிமா பகுதி ஆசிரியர் (தின இதழ் நாளிதழ் ) தொலைக்காட்சிப் பணி : நிகழ்ச்சி தயாரிப்பாளர் (சன் டி வி மற்றும் சன் நியூஸ் தொலைக்காட்சி ) நிகழ்ச்சி ஆங்கர் (மக்கள் டிவி , டான் டிவி , டி டி என் தொலைக் காட்சி ) நடுவர் (ஜெயா டிவி டாக்குமெண்டரி விருது ) திரைப் படைப்பாளியாக : உதவி மற்றும் இணை இயக்குனர் --ஆர்.வி. உதயகுமார் (பல படங்கள்) நடிகர் -- முழு நீள கதாபாத்திரம் -- அஜந்தா (தமிழ் , தெலுங்கு ) -- நட்புக்காக (இரும்புக் கோட்டை முரட்டு சிங்கம் , முத்துக்கு முத்தாக) -- கஸ்தூரி , இளவரசி தொலைக்காட்சித் தொடர்கள் பாடலாசிரியர் -- அஜந்தா (இளையராஜா), அடாவடி (தேவா), முத்துக் குமரனின் காதல் (நவநீத் ) வெண்மேகம் (ஜாபர் ) அடுத்த கட்டம் : திரைப்பட இயக்கம் /நடிப்பு / எழுத்து தொடர்புக்கு : su.senthilkumaran@gmail.com / 91 98400 76462


Leave a Reply

Your email address will not be published. Required fields are marked *