நடிகையர் திலகம் @ விமர்சனம்

வைஜயந்தி மூவீஸ் சார்பில் அஸ்வின் தத்  தயாரிக்க , கீர்த்தி சுரேஷ், துல்கர் சல்மான், சமந்தா, , விஜய் தேவரகொண்டா நடிப்பில் நாக் அஸ்வின் இயக்கத்தில்,  

தெலுங்கில் வந்திருக்கும் மகாநதி படத்தின் தமிழ் வடிவமே நடிகையர் திலகம். 
 
காலத்தால் மறக்க முடியாத காவிய நடிகை-   நடிகையர் திலகம் சாவித்ரியைப் பற்றிய படம். நடிகையர் திலகம் ரசனையின் திலகமா ? பேசலாம் . 
 
விவரம் தெரியாத வயதிலேயே தந்தையை இழந்து , விதவை அம்மாவுடன் பெரியம்மா வீட்டில் அடைக்கலம் ஆகி,
 
பெத்த நைனா எனப்படும் பெரியப்பாவால் (ராஜேந்திர பிரசாத்)  உதாசீனம் செய்யப்பட்டு , 
 
சிறு வயதிலேயே நடனம் ஆடும் திறமை இருந்ததால் பணத்தாசை பிடித்த பெத்த நைனாவால் வலுக்கட்டாயமாக நாடகங்களில் நடிக்க வைக்கப்பட்டு ,
 
அப்படி ஒரு நாடக நிகழ்ச்சியில் இந்தி  நடிகர் பிரித்வி ராஜ் கபூரால் பாராட்டப்பட்டு, நாகேஸ்வர ராவின் தீவிர  ரசிகையாகத் திகழ்ந்து , 
 
சென்னைக்கு நடிக்க வந்து, ஜெமினி கணேசன் எடுத்த போட்டோவால்  தெலுங்குப் படத்தில் நடிக்க வாய்ப்புப் பெற்று, 
தெலுங்கு டைரக்டர்களால் நடிக்க லாயக்கு இல்லாத நடிகை என்று சொல்லப்பட்டு ,  பின்னர் நடித்து, அப்படியே தமிழுக்கும் நடிக்க வந்து , 
 
சாதாரண தமிழ் மக்களுடன் ஜெமினி பழக வைத்ததன் மூலம் சிறப்பாக தமிழ் கற்று, தமிழைத் தாய்மொழியாகக் கொண்டவர்களுக்கு இணையாக – அட்டகாசமாகத் தமிழ் பேசி 
 
அதே நேரம் தொழில் பொறாமையால் , சக தெலுங்கு நடிகைகளின் கோபத்துக்கு ஆளாகி, 
 
ஜெமினியுடன் பழகி, நீச்சல் பயிற்சி, கார் ஓட்டுதல் , குதிரைப் பந்தயம்  மற்றும் இயல்பு நடிப்பில் தன்னை தரக் கூட்டல் செய்து கொண்டு ,
 
பகையை முறியடித்து ,  தமிழ் தெலுங்கு சினிமா உலகின் முடி சூடா ராணியாக திகழ்ந்து , 
 
ஜெமினியை காதலித்து திருமணம் செய்து கொண்டு , அதனால் சொந்தக்காரர்களின் கோபத்துக்கு ஆளாகி, 
 
ஜெமினிக்கு வந்த தாழ்வு மனப்பான்மையால் கருத்து வேறுபாட்டுக்கு ஆளாகி வருந்தி, 
 
ஜெமினியின் அறிவுரைகளையும் மீறி தவறான படங்களை தயாரித்து இயக்கி, நஷடப்பட்டு , 
குடிப்பழக்கத்துக்கு ஆளாகி, சொத்துக்களை இழந்து, வருமான வரித்துறையால் பெரிதும் பாதிக்கப்பட்டு 
 
கோமா நிலையில் பல மாதங்கள் படுத்த படுக்கையாகக் கிடந்து மறைந்த சாவித்திரி…. 
 
அதே நேரம் தன் வாழ்வில் எவ்வளவு பெரிய மனிதாபிமானியாக , கொடைக்குணம் உள்ளவராக  நல்லவராகத் திகழ்ந்தார் என்பது படத்தின் முக்கிய திரைக்கதை அம்சம். 
 
சாவித்ரியாக கீர்த்தி சுரேஷ் !
 
இன்னொரு பக்கம் பிரஜா வாணி என்ற பத்திரிகையில் பணியாற்றும்- 80 களின் மைலாப்பூர்  பிராமணப் பெண் மதுரவாணி (சமந்தா) போட்டோகிராபர் ஆண்டனி . (விஜய் தேவரகொண்டா)  இடையில் ஒரு சொல்லப் படாத காதல்…. 
 
சாவித்திரி பற்றி எதுவுமே தெரியாமல் சாவித்ரி கோமாவில் விழுந்த செய்தியை சுவாரசியம் இல்லாமல் மதுரவாணி எழுதப் போய் , அதில் ஈர்க்கப்பட்டு சாவித்ரி தொடர்பான நபர்களை சந்தித்து இம்ப்ரெஸ் ஆகி, 
 
சாவித்ரியைப் பற்றி அட்டகாசமான கட்டுரை எழுதி, 
 
சாவித்ரியின் வாழ்க்கை மூலம் மனிதாபிமானம், காதல் , துணிச்சல் இவற்றின் அவசியத்தை மதுரவாணி  கற்றுக் கொள்வது ஒரு கதைப் போக்கு . 
 
இரண்டும் சேர்ந்த கதைப் பின்னலே,  மகாநதி என்கிற நடிகையர் திலகம் . 
வாவ் கீர்த்தி சுரேஷ் !
 
சாவித்ரியாக கூடு விட்டுக் கூடு பாய்ந்திருக்கிறார் . 
 
ஒவ்வொரு அசைவாகவும்  பிம்பமாகவும் நம் உள்ளத்தில் காவியமாக நிலைத்து இருக்கும் சாவித்திரியை,  எல்லோரும் திருப்தியுறும் அளவுக்கு  பிரதிபலிப்பது மிகக் கடினம் 
 
 ஆனால் சாவித்திரியை பிரம்மிக்கும் அளவுக்கு தனக்குள் கொண்டு வந்திருக்கிறார் கீர்த்தி சுரேஷ். 
 
சாவித்ரியாக மாறுவது மட்டும் அல்ல … அந்தக் கால நடிப்பின் பாவனைகளை நடனத்தை , உடல் மொழிகளை இன்று ஒரு நடிகை கொண்டு வருவது சாதாரண விஷயம் இல்லை . 
 
கடும் உழைப்பு மற்றும் திறமையின் மூலம் அதில் அட்டகாசமாக ஜெயித்து இருக்கிறார் கீர்த்தி சுரேஷ் . 
 
சொல்லப் போனால் சில காட்சிகளில் சாவித்ரியாகவே மாறி விட்டார் . 
 
குறிப்பாக கடைசியில் கையில் மதுவோடு உட்கார்ந்தபடி ஜெமினியுடனான காதல் வாழ்வை நினைத்துப் பார்க்கும் காட்சியில் ஒரு TRUCK IN SHOT ல் உட்கார்ந்திருப்பது கீர்த்தி சுரேஷே அல்ல . அச்சு அசல் சாவித்திரி . 
 
இந்தப் படம் கீர்த்தி சுரேஷின் விஸ்வரூபம் !
குடி நோய்க்கு அடிமையான சாவித்திரி ஒரு நிலையில் மது அடிமைகள் மறு வாழ்வு நிலையம் அமைக்க அப்போதே முயன்று உள்ளார் என்ற செய்தி சிலிர்க்க வைக்கிறது . 
 
நாக் அஸ்வினின் இயக்கம் , படமாக்கல் , கதாபாத்திரத் தேர்வுகள் அருமை !
 
டேனி சஞ்சேஷ் லோபேஷின் ஒளிப்பதிவு , மிக்கி ஜே மேயரின் இசை, கோத்த கிரி வெங்கடேஸ்வர ராவின் எடிட்டிங் யாவும் அருமை . அருமை அருமை .
 
தோட்டாதரணியின் மேற்பார்வையில் அவினாஷ் கொல்லாவின் கலை இயக்கம் சிறப்பு. 
 
கௌரங், அர்ச்சனா ராவ், இந்திராக்ஷி பட்டாநாயக் ஆகியோரின் ஆடை வடிவமைப்பும் நேர்த்தி .
 
ஒரு மினி,  ஜெமினி கணேசனாக துல்கர் சல்மான் . ஜெமினி கணேசனை கண் முன் நிறுத்தவில்லை என்றாலும் உணர வைக்கிறார். சபாஷ் . 
 
சாவித்ரியின்சிறு வயது தோழியாக வரும் ஷாலினி பாண்டே , சமந்தா , விஜய் தேவர கொண்டா ஆகியோரும் சிறப்பாக செய்துள்ளார்கள் 
 
வசனம் அருமை (தெலுங்கில் சாய் மாதவ் புர்ரா , தமிழில் மதன் கார்க்கி) 
 
உதாரணம் … ” உன் அளவுக்கு நான் வேற யாரையும் காதலிக்கலன்னாலும்,  நான் பொம்பள விசயத்தில் வீக் னு அப்பவே உனக்கு தெரியாதா ? ஏதோ இப்போ தான் தெரிஞ்ச மாதிரி பேசற ?”
 
“அப்போ நான் சாவித்திரி; இப்போ சாவித்திரி கணேசன்”
 
 தயாரிப்பாளர் (நாகி ரெட்டி )சக்ர பாணியாக பிரகாஷ் ராஜ் ,  நாகேஸ்வர ராவ் ஆக வரும் நாக சைதன்யா ,  எஸ் வி ரெங்காராவ் ஆக வரும்  மோகன்பாபு ,
 
மற்றும் எல் வி பிரசாத்,  என் டி ராமராவ் இவர்களுக்கான நடிகர் தேர்வுகள் அருமை . மெனக்கெட்டு உருவாக்கி இருக்கிறார்கள் 
 
(சரி ,, நடிகையர் திலகம் படத்தில் நடிகர் திலகமாக யார் ? மக்கள் திலகமாக யார் ? பீம்சிங் ஆக யார் ?  கே எஸ் கோபால கிருஷ்ணன் ஆக யார் ? என்று, 
 
ஆவலோடு கேட்கிறீர்களா ? ஹா ஹா ஹா … அங்கதான் வச்சு செஞ்சுட்டானுங்க …  பேசுவோம் )
 
சித்தார்த் சிவசாமியின் திரைக்கதைதான் ஓர வஞ்சனையின் உச்சம் . 
 
இது தெலுங்குக்காக எடுக்கப்பட்ட படம் . ஏதோ ஓரிரு  காட்சியில் துல்கர்  தமிழ் பேசி நடித்து இருந்தால் கூட, தமிழ் தெலுங்கு இரண்டுக்கும் திட்டமிட்டு  எடுக்கப்பட்ட படம் போல தெரியவில்லை.
 
 எனவே சாவித்ரியின் தமிழ் சினிமா சாதனைகளை பற்றி நிறைய எதிர்பார்க்க முடியாது என்பது நமக்குப் புரியாமல் இல்லை . 
 
ஆனால் வரலாறு என்று வந்தால் உண்மையை மட்டுமாவது சரியாக சொல்ல வேண்டும் அல்லவா ? அந்த நேர்மை இந்தப் படைப்பாளிகளுக்கு இல்லை என்பதுதான் அநியாயம் 
 
தெலுங்கு சினிமா இயக்குனர்கள் வசனகர்த்தாக்களை எல்லாம் பெரிய மேதைகள் என்று கூவிக் கூவி  சிலிர்க்கும் படம் ,
 
தமிழ் சினிமா இயக்குனர்கள் மற்றும் படைப்பாளிகளை எல்லாம் (குறிப்பாக ஆரூர்தாஸ் ) பித்துக் குளிகள்போல சித்தரிக்கிறது. 
 
சாவித்ரிக்கு அரூர்தாஸ் கொடுத்த தமிழ்க் கொடை எவ்வளவு ! ஆனால் அவரது பாத்திரத்தில் மனோபாலாவைப் போட்டு கிண்டல் அடிக்கிறார்கள் .
 
தேவதாஸ் படம் பெரிய பிஸ்தாவாகவே இருக்கட்டும் . அதற்காக மனம் போல மாங்கல்யம் பட ஷூட்டிங் என்ன அப்படி கோமாளிக் கூத்தாகவா நடந்தது ? சாவித்ரியின் தெலுங்குப் படங்களை எல்லாம் விலாவாரியாக காட்டுகிறார்கள்.
 
ஆனால்   பாசமலர் படத்தை மட்டும், 
சாவித்திரி அழும் ஒரே ஷாட்டில் காட்டி முடித்து விடுகிறார்கள் . அதில் சிவாஜி வரும் ஒரு ஷாட் கூட இல்லை . 
 
 பாசமலர் படத்தில் வரும்   சாவித்திரி அழும் ஷாட்டில் உள்ளது போல கீர்த்தி சுரேஷ் தோன்றும் ஷாட்டில்  சிவாஜியின் ஆளுயர குளோசப் ஓவியம் ஒன்று வைத்து உள்ளார்கள் .
 
மற்ற காட்சிகளில் எல்லாம் அருமையாக இருக்கும் கலை இயக்கம் அந்த சிவாஜியின் ஓவியத்தை மட்டும், 
 
கடமைக்கு ஏனோதானோ என்று முட்டைக் கண்களுடன் சிவாஜியை  வரைந்து வைத்துள்ளார்கள். 
 
“இல்ல .. இல்ல.. இது சாவித்திரியின் சினிமா சாதனைகள் பற்றிய படம் இல்லை  . காதல் மற்றும் தனிப்பட்ட வாழ்க்கை பற்றிய படம் .
 
எனவே சிவாஜி படத்தில் இடம் பெறவில்லை. ” என்று யாராவது நொண்டி சமாதானம் செய்தால் , நல்லா வந்துரும் வாயில …. 
 
சாவித்ரிக்கு  குழந்தை பிறந்த போது ஜெமினி சென்னையில் இல்லை . முதன் முதலில் மருத்துவமனைக்கு குழந்தைக்காக பரிசுப் பொருட்களை வாங்கிக் கொண்டு ஓடியது சிவாஜி!   அது மட்டும் … தெலுங்கில் ஓடிய ஒரு படத்தை தமிழில் சிவாஜியை வைத்து பிராப்தம் என்ற பெயரில் எடுத்ததால் ஏற்பட்ட நஷ்டமும்,
 
வியட்நாம் வீடு படத்தை தெலுங்கில் ரீமேக் செய்ததால் எடுத்த நஷ்டமும் சாவித்ரியை பாதித்ததை மட்டும்  திரும்ப திரும்ப சொல்கிறார்கள்  .
 
பிராப்தம் படம் தோற்றுப் போனதை விளக்கமாக, சிவாஜி போஸ்டரில் இருந்து மாலை சரிவது போல காட்டவும் ,
 
சிவாஜி நடித்த மூணு படம் வரிசையா பிளாப் என்று வக்கணையாக வசனம் வைக்கவும் முடியும் . 
 
ஆனால் பிராப்தம் படத்தை சாவித்திரி டைரக்ட் செய்ததை மட்டும் காட்டுவார்கள் . அதில் அதில் கூட  சிவாஜி நடிப்பது போல ஒரு ஷாட் கூட இல்லை . 
 
நடிகையர் திலகம் என்ற பெயர் மட்டும் வேணும் . ஆனால் நடிகர் திலகம் படத்தில் வேண்டாம் என்றால்,….என்னத்தச் சொல்ல…. 
 
அதை விடுங்க . 
 
சீன மொழியில் எடுத்தால் கூட என்ன ? பீம்சிங், கே எஸ் கோபால கிருஷ்ணன் . ஏ பி நாகராஜன் பெயர்களே சொல்லப் படாமல் சாவித்ரி பற்றிய ஒரு படமா ?   அடப்பாவிகளா !
அவ்வளவு ஏன் ? சாவித்ரி நடிப்பில் உச்சம் தொட்ட படம் என்று உலகமே  ஒப்புக் கொண்ட நவராத்திரி படத்தின் பேரே ஒரு டயலாக்கில் மட்டும் வருகிறது . அதுவும் இங்கிலிபீஸில்!  
 
வசனத்தில் கூட நாகேஸ்வரராவ் , ராமராவ் , சிவாஜி கணேசன் என்ற ஆர்டரில்தான் பிரகாஷ் ராஜ் வசனம் பேசுகிறார். 
 
சாவித்ரியின் பெரியப்பாவாக நடித்திருக்கும் ராஜேந்திர பிரசாத்தின்  பேச்சு மற்றும் தொனிகளில் தமிழர்களின் மீதான கிண்டல் போக்கு திட்டமிட்டு காட்டப் படுகிறது .
 
உதாரணமாக அந்த ஆமா …ஓ மா …ஏமா ….
 
வசனம் எழுதியவர் அவ்வளவு  தமிழ் உணர்வாளர் போல . கொடுமை . 
 
தமிழிலும் தெலுங்கிலும் ஒரே மெட்டில் வந்து புகழ் பெற்ற  இனிய பாடல்களை போடும்போது தெலுங்குப் பதிப்பில் தெலுங்கு பாடல்களை போடணும் .
 
தமிழப் படத்தில் தமிழ் பாடல்களைதானே போடணும் . ஆனா ,தமிழ்ப் படத்திலும் தெலுங்குப் பாடல்களை போடுவது எல்லாம் என்ன மனநிலை என்றே தெரியவில்லை . 
 
மாயாபஜார் படத்தில் வரும் கல்யாண சமையல் சாதம் பாடலை கூட தமிழ்ப் பதிப்பில் தெலுங்கில் போடுவோருக்கு கண்டிப்பாக  தேவை மன நல சிகிச்சை !சாவித்ரியின் தெலுங்கு உறவினர்களும் ஆந்திர நண்பர்களும்  சக தெலுங்கு நடிகைகளும் அவருக்கு செய்த பெரிய துரோகங்கள் சதிகளை எல்லாம், 
 
பட்டும் படாமல் சொல்லி விட்டு , தமிழ் நாட்டில் நடந்த விசயங்களை எல்லாம் விலாவாரியாக சொல்கிறார்கள் . 
 
அதே நேரத்தில் தமிழ் நாட்டில் சாவித்ரியை  ஏமாற்றியவர்களும் பெரிதும் தெலுங்குக்காரர்கள்தான் என்பதை  மட்டும் ஊத்தி மூடுகிறார்கள் . 
 
ஆரம்பத்தில் சாவித்திரி ஒழுங்காக வசனம் பேசாதபோது கிண்டல் செய்யும் பெண்களை எல்லாம் பக்கா தமிழ்ப் பெண்களாக காட்டுகிறார்கள் .
 
அலோ.. அறிவாளிகளே !. அப்படி ஒரு சம்பவம் நடந்து இருந்தால்  அப்படி கிண்டல் செய்வதும் தெலுங்கு, கன்னட  அல்லது மலையாளப் பெண்களாகத்தான் இருப்பாங்க .
 
அப்போது  எல்லாம் தமிழ்ப் பெண்கள் சினிமா பார்ப்பதே அபூர்வம் .
 
ஜெமினி கணசேன் சாவித்திரி காதல் விவகாரத்தில் காதல் மோதல் ஈகோ , ஜெமினியின் சபலம், எல்லாம் ஒகே . 
ஆனால் சாவித்ரிக்கு குடிக்கக் கற்றுக் கொடுத்ததே ஜெமினி என்பது எல்லாம் … தெரிலடா சாமி . 
 
சாவித்திரிக்கு இன்கம் டாக்ஸ் ரெய்டு வரக்  காரணம்  ஜெமினியின் அலட்சியம் என்று சொல்லத் தெரிகிறது  
 
ஆனால் போதையின் உச்சத்தில் ஜெமினி மீது உள்ள கோபத்தில் சாவித்திரி ஒரு வீட்டை விற்க முயல , 
 
அதை இன்னொருவரை வாங்குவது போல வாங்கச் செய்து சாவித்ரிக்கே ஜெமனி திருப்பிக் கொடுத்ததையும் அதையும் சாவித்திரி விற்றதையும் சொல்லாமல் விட்டது ஏனோ ?
 
சாவித்திரி என்றும் என்றென்றும்  நம் நேசத்துக்குரிய மாபெரும் காவிய நடிகை . கலை தேவதை ! அதில் எந்த நொடியிலும்  மாற்றுக் கருத்து இல்லை .
 
ஆனால் ஜெமினியை பொம்பள பொறுக்கி என்று நேரடியாக குற்றம் சாட்டும் படம்  சந்திரபாபு என்ற பெயரைக் கூட சொல்லாதது ஏன் ?
 
ஆந்திராவில் நடந்த யானை மீது ஊர்வல சம்பவத்தில் ஜெமினியை புறக்கணித்து விட்டு சாவித்திரி மேலே போனதால் ஜெமினி அவமானப் படுத்தப்பட்டார் .
இது பற்றி ஜெமினி நேரடியாகப்  பேசி இருக்கிறார் . ஆனால் ஏதோ சாவித்திரி தெரியாமல் போனது போல படம் சொல்வது படைப்பின் நேர்மை அல்ல. 
 
மொத்தத்தில், 
 
நடிகையர் திலகம்….. தெலுங்கு சாவித்திரி 
 
மகுடம் சூடும் கலைஞர் 
————————————-
கீர்த்தி சுரேஷ் 

About Su Senthilkumaran

பெயர் : சு.செந்தில் குமரன் புனைப் பெயர் : ராஜ திருமகன் கல்வித் தகுதி : B.E. Mechanical பிரசுரமான முதல் படைப்பு : கவிதை -- பெங்களூரில் நடந்த 'பெரிய' மாநாட்டில் தேங்காய் எண்ணையில் சமைத்த உணவே தேவை என்றாராம் ஜெயவர்த்தனே! நல்ல வேளை..... தமிழன் ரத்தம் கேட்கவில்லையே (ஜூனியர் விகடன் ) பத்திரிக்கைப் பணி : விகடன் மாணவ நிருபர் திட்டம் மிகச் சிறந்த நிருபர் (outstanding reporter) விருது விகடன் குழும இதழ்களின் சிறப்பு நிருபர் (பல ஆண்டுகள்) விளம்பர முகவர் ---ஏற்றுமதி உலகம் இதழ் (ஒரு ஆண்டு) கட்டுரைப் பகுதி பொறுப்பாசிரியர் --மாலை முரசு குழும இதழ்கள் (பல ஆண்டு) சினிமா பகுதி ஆசிரியர் (தின மதி நாளிதழ்) நிருபர் (குமுதம்) உதவி ஆசிரியர் (குமுதம் ரிப்போர்ட்டர்) பொறுப்பாசிரியர் (குமுதம் ஹெல்த்) சினிமா பகுதி ஆசிரியர் (தின இதழ் நாளிதழ் ) தொலைக்காட்சிப் பணி : நிகழ்ச்சி தயாரிப்பாளர் (சன் டி வி மற்றும் சன் நியூஸ் தொலைக்காட்சி ) நிகழ்ச்சி ஆங்கர் (மக்கள் டிவி , டான் டிவி , டி டி என் தொலைக் காட்சி ) நடுவர் (ஜெயா டிவி டாக்குமெண்டரி விருது ) திரைப் படைப்பாளியாக : உதவி மற்றும் இணை இயக்குனர் --ஆர்.வி. உதயகுமார் (பல படங்கள்) நடிகர் -- முழு நீள கதாபாத்திரம் -- அஜந்தா (தமிழ் , தெலுங்கு ) -- நட்புக்காக (இரும்புக் கோட்டை முரட்டு சிங்கம் , முத்துக்கு முத்தாக) -- கஸ்தூரி , இளவரசி தொலைக்காட்சித் தொடர்கள் பாடலாசிரியர் -- அஜந்தா (இளையராஜா), அடாவடி (தேவா), முத்துக் குமரனின் காதல் (நவநீத் ) வெண்மேகம் (ஜாபர் ) அடுத்த கட்டம் : திரைப்பட இயக்கம் /நடிப்பு / எழுத்து தொடர்புக்கு : su.senthilkumaran@gmail.com / 91 98400 76462

View all posts by Su Senthilkumaran →

Leave a Reply

Your email address will not be published. Required fields are marked *