என் ஆளோட செருப்பக் காணோம் @ விமர்சனம்

டிரம்ஸ்டிக் புரடக்ஷன்ஸ் சார்பில் (அடுத்து ஏதும் அந்த மாதிரி படம் எடுப்பாங்களோ ?)  எஸ் . சக்திவேல் தயாரிக்க,

தமிழ் என்கிற பக்கோடா பாண்டி, ஆனந்தி,  யோகி பாபு, பால சரவணன் , கே எஸ் ரவிகுமார், லிவிங்ஸ்டன்,  நடிப்பில், 

ஜெகன்நாத் எழுதி இயக்கி இருக்கும் படம் என் ஆளோட செருப்பைக் காணோம் . ரசனை கிடைக்குமா ? பார்க்கலாம் . 

 
பல பெண்களுக்கு ரூட் போடும் மைனர் ஒருவனுக்கு (யோகி பாபு) அல்லக்கையாக இருக்கும் கிருஷ்ணன் (தமிழ் என்கிற பக்கோடா பாண்டி) ,
 
மைனர் ரூட் விடும் பல பெண்களில் ஒருத்தியான சந்தியா மீது (ஆனந்தி),  காதல் கொள்கிறான் . 
 
எனினும் காதலை சொல்லத் தயங்குவதில் இவனும் ஓர் இதயம் முரளி . .
 
இந்த நிலையில் சந்தியாவின் தந்தையான இஞ்சினீயர் மோக்டன் ராஜ் (ஜெயப்பிரகாஷ்), அவர் பணி புரியும் சிரியாவில் தீவிரவாதிகளால் கடத்தப்படுகிறார் . 
 
புகழ் பெற்ற குறிசொல்லும் பெண் மணியும் கிருஷ்ணனின் அம்மாவுமான வெற்றிலை சாமியிடம் (டான்ஸ் மாஸ்டர் சுஜாதா ) சந்தியாவும், 
 
அவள் அம்மாவும் (ரேகா) குறி கேட்க வருகிறார்கள் . 
 
என்ஜினீயர்  கடத்தப்பட்ட அன்று சந்தியா தவற விட்ட — என்ஜினியர் வாங்கிக் கொடுத்து விட்டுப் போன- செருப்பு ‘திரும்பவும் சந்தியாவிடம் வந்தால் ,
 
எஞ்சினியர் உயிரோடு வருவார்’ என்று வெற்றிலை சாமி குறி சொல்கிறது . 
 
சந்தியா செருப்பை தொலைத்த அன்று அதே பஸ்ஸில் கிருஷ்ணனும் இருந்தான் . ஒரு  கால் செருப்பு  நாடு ரோட்டிலும் இன்னொரு செருப்பு  பேருந்திலும்  இருந்ததை அவன் அறிவான் . 
 
காதலியின் நம்பிக்கையைக் காப்பாற்ற அவளது – பிரிந்து தொலைந்த – செருப்புகளை தேடி அலைகிறான் கிருஷ்ணன் .
 
அந்த செருப்பின் பயணம் , அவனது பயணம் எப்படி இருந்தது ? செருப்பு கிடைத்ததா ? அவளது அப்பா விடுவிக்கப்பட்டாரா ? கிருஷ்ணனின் காதல் என்ன ஆனது ?
 
– என்பதே இந்த ‘என் ஆளோட செருப்பக் காணோம்’ படம் .
 
வித்தியாசமான கதை. 
 
படத்தில் முதலில் கவனம் கவரும் விஷயம் இயக்குனரும் ஒளிப்பதிவாளரும் மற்றும் தொழில் நுட்பக் கலைஞர்களும் சேர்ந்து  கொண்டு வந்திருக்கும், 
 
அந்த அடைமழை நேர எஃபக்ட்தான் . கண்ணனுக்கும் மனசுக்கும்  அவ்வளவு இதம் . 
இஷான் தேவின்  பாடல்கள் பரவாயில்லை ரகம் . ஆனால் தீபன் சக்கரவர்த்தியின் பின்னணி இசை படத்துக்கு மதிப்புக் கூட்டல் செய்கிறது .
 
நாயகியின் அர்த்தமுள்ள அழகான செருப்பு தொலைந்த நிலையில் செருப்பணிந்த கால்களுக்கு இடையே அவளது செருப்பணியாத கால்களை …
 
கும்பல் கும்பலாக இருக்கும் செருப்புகளை … 
 
பிஞ்ச , நல்ல செருப்புகளை …. செருப்பணிந்த கால்களை மட்டும் , .. செருப்பு படம் போட்ட பனியன் என்று  காட்டும் வகையில் அழகியல் வெளிப்பாட்டில் பாராட்ட வைக்கிறார் இயக்குனர் ஜெகன் நாத் .  
 
மணிகண்டன் சிவகுமாரின் சிறப்பான  படத் தொகுப்பு படத்தை ஜாக்கி போட்டு தூக்க முயல்கிறது . 
 
தமிழ் என்கிற பக்கோடா பாண்டி, ஆனந்தி , லிவிங்ஸ்டன், டான்ஸ் மாஸ்டர் சுஜாதா  ஆகியோர் நடிக்கிறார்கள் . மற்றவர்கள் வந்து போகிறார்கள் 
 
செருப்புக்கடை முசல்மான் ஆக  வரும் லிவிங்ஸ்டன்  பேசும் மத நல்லிணக்க வசனங்கள் அருமை . பாராட்டுகள் ஜெகன் நாத் . 
 
ஒரு காட்சியில் வந்தாலும்  நறுக்குத் தெறித்த மாதிரி பேசி நடித்து விட்டுப் போகிறார் பத்திரிகையாளர் ‘கயல்’ தேவராஜ் 
 
ஆனால் திரைக்கதைதான் பெரிய பிரச்னை . சுவராஸ்யமாக துவங்கும் படம் போகப் போக டல் அடிக்கிறது .
 
 படத்தின் சில இடங்களை சீரியசாக சொல்வதா காமெடியாக சொல்வதா என்பதில் இயக்குனருக்கு மகா குழப்பம் .
 
படத்தின் இரண்டாம் பாதியும் ஹீரோவைப் போலவே கையொடிந்து தடுமாறுகிறது.
 
அப்பா மீது அன்பு , அவர் வாங்கிக் கொடுத்த செருப்பு மீது பிரியம் , குறி சொல்லிய  பெண் சொன்ன வார்த்தைகளுக்கு ஏற்ப செருப்புக்கு காத்திருத்தல்,

 

 
அது கிடைத்தது போலவே அப்பா உயிரோடு திரும்ப வருவதில்  சந்தியாவுக்கு மகிழ்ச்சி….  எல்லாம் ஒகே இயக்குனரே !
 
ஆனா அதற்காகவே அந்த செருப்பைக் கண்டு பிடித்துக் கொடுத்தவன் யார் என்று தெரியாமலே அவன் யாராக இருந்தாலும் —
 
பெண் பித்தனான மைனராக இருந்தாலும் – சரி என்று , சந்தியா குளித்து முடித்து லவ் பண்ண , தோழியோடு கிளம்புவது எல்லாம் ரொம்ப ஓவர் 
 
இதுக்கு நக்மா நடித்த அந்த பழைய–  பாரகன் செருப்பு விளம்பரமே எவ்வளவோ மேல் . அது செருப்புக்கான விளம்பரப் படம் . ஆனால்  இது கதை சொல்லும் படம் இல்லையா ?

 
 
யோகிபாபு காமெடி என்ற நினைத்துக் கொண்டு  கேப் இல்லாமல்  அர்த்தமும் இல்லாமல் என்னென்னவோ பேசிக் ‘கொல்’கிறார் .கவனம் புரோ . 

 கே எஸ் ரவிக்குமார் கேரக்டர் பக்கா நாடகத்தனம் . 
 
முப்பது , இருபது வருஷத்துக்கு முன்பு வந்த படத்தை பார்ப்பது போல ஓர் உணர்வு 
 
வலிந்து திணிக்கப்பட்ட கிளைமாக்ஸ் . 

 
 
வித்தியாசமான கதை பிடித்த இயக்குனர் அதை விஞ்சும் திரைக்கதை பண்ணத் தவறி இருக்கிறார் . 
 
விளைவு….. ?
 
என் ஆளோட செருப்பக் காணோம் .. போனா போகட்டும் ; புதுசு வாங்கிக்கலாம் ! 

About Su Senthilkumaran

பெயர் : சு.செந்தில் குமரன் புனைப் பெயர் : ராஜ திருமகன் கல்வித் தகுதி : B.E. Mechanical பிரசுரமான முதல் படைப்பு : கவிதை -- பெங்களூரில் நடந்த 'பெரிய' மாநாட்டில் தேங்காய் எண்ணையில் சமைத்த உணவே தேவை என்றாராம் ஜெயவர்த்தனே! நல்ல வேளை..... தமிழன் ரத்தம் கேட்கவில்லையே (ஜூனியர் விகடன் ) பத்திரிக்கைப் பணி : விகடன் மாணவ நிருபர் திட்டம் மிகச் சிறந்த நிருபர் (outstanding reporter) விருது விகடன் குழும இதழ்களின் சிறப்பு நிருபர் (பல ஆண்டுகள்) விளம்பர முகவர் ---ஏற்றுமதி உலகம் இதழ் (ஒரு ஆண்டு) கட்டுரைப் பகுதி பொறுப்பாசிரியர் --மாலை முரசு குழும இதழ்கள் (பல ஆண்டு) சினிமா பகுதி ஆசிரியர் (தின மதி நாளிதழ்) நிருபர் (குமுதம்) உதவி ஆசிரியர் (குமுதம் ரிப்போர்ட்டர்) பொறுப்பாசிரியர் (குமுதம் ஹெல்த்) சினிமா பகுதி ஆசிரியர் (தின இதழ் நாளிதழ் ) தொலைக்காட்சிப் பணி : நிகழ்ச்சி தயாரிப்பாளர் (சன் டி வி மற்றும் சன் நியூஸ் தொலைக்காட்சி ) நிகழ்ச்சி ஆங்கர் (மக்கள் டிவி , டான் டிவி , டி டி என் தொலைக் காட்சி ) நடுவர் (ஜெயா டிவி டாக்குமெண்டரி விருது ) திரைப் படைப்பாளியாக : உதவி மற்றும் இணை இயக்குனர் --ஆர்.வி. உதயகுமார் (பல படங்கள்) நடிகர் -- முழு நீள கதாபாத்திரம் -- அஜந்தா (தமிழ் , தெலுங்கு ) -- நட்புக்காக (இரும்புக் கோட்டை முரட்டு சிங்கம் , முத்துக்கு முத்தாக) -- கஸ்தூரி , இளவரசி தொலைக்காட்சித் தொடர்கள் பாடலாசிரியர் -- அஜந்தா (இளையராஜா), அடாவடி (தேவா), முத்துக் குமரனின் காதல் (நவநீத் ) வெண்மேகம் (ஜாபர் ) அடுத்த கட்டம் : திரைப்பட இயக்கம் /நடிப்பு / எழுத்து தொடர்புக்கு : su.senthilkumaran@gmail.com / 91 98400 76462

View all posts by Su Senthilkumaran →

Leave a Reply

Your email address will not be published. Required fields are marked *