ரத்தங் பிக்சர்ஸ் சார்பில் டி.ரஞ்சித் குமார் தயாரிக்க, அபிமன்யூ நல்லமுத்து கதாநாயகனாக அறிமுகமாக அவருக்கு ஜோடியாக சாக்ஷி அகர்வால் நடிக்க, ராம் மனோஜ்குமார் கதை திரைக்கதை வசனம் எழுதி இயக்கி இருக்கும் படம் ஆத்யன் .
ஆத்யன் என்ற சமஸ்கிருதச் சொல்லுக்கு அனைத்தும் அறிந்தவன் ; அடக்கி ஆள்பவன் என்று பொருள் .
சத்யராஜ், பிரபல தயாரிப்பாளர் திருப்பூர் மணி , இயக்குனர் ஆர். சுந்தர்ராஜன் ஆகியோருடன் இணைந்து பல படங்களின் தயாரிப்பில் பங்காற்றிய நல்லமுத்துவின் மகன்தான் இந்த அபிமன்யூ நல்லமுத்து . முறைப்படி நடனம் சண்டை எல்லாம் கற்றவர் அபிமன்யூ
சிபிராஜ் கதாநாயகனாக நடித்த நாய்கள் ஜாக்கிரதை படத்தில் இயக்குனர் சக்தியிடம் உதவி இயக்குனராகப் பணியாற்றியவர் ராம் மனோஜ்குமார் .
கதை வித்தியாசமான ஒன்றுதான்.
அமெரிக்காவுக்கும் நமக்கும் பத்து மணி நேர வித்தியாசம் உண்டு . அமெரிக்காவில் இருந்து சென்னை வருவோருக்கு இந்த கால வித்தியாசம் காரணாமாக ஜெட்லாக் வரும் . ஜெட்லாக் என்றால் உடல் களைப்பு என்றுதான் பலரும் நினைகிறோம். அதுதான் இல்லை .
நடந்து கொண்டு இருக்கும்போதே சட்டென்று சாலையிலேயே விழுந்து உறங்கி விடும் அளவுக்கு தூக்கம் வரும்.
அமெரிக்காவில் இருந்து தன் காதலியைத் தேடி சென்னை வரும் நாயகன், இந்த ஜெட்லாக் சமயத்தில் எதிர்பாராதவிதமாக ஒரு போதை மற்றும் கடத்தல் கும்பலிடம் சிக்கி விடுகிறான். அதில் இருந்து அவன் தப்பினானா? காதலியை கண்டு பிடித்தானா என்பதுதான் இந்தப் படமாம் . பாதிப்படம் இரவில் நிகழும் காட்சிகளைக் கொண்டதாம்.
சத்யராஜ், திருப்பூர் மணி, ஆர். சுந்தர்ராஜன் , சிபிராஜ் ஆகியோர் கலந்து கொண்ட , படத்தின் பாடல் வெளியீட்டு விழாவில் ஒரு பாடலையும் இரண்டு முன்னோட்டங்களையும் திரையிட்டார்கள்.
முன்னோட்டம் மிக அருமையாக இருந்தது. இயக்குனரின் ஷாட்களும் எம் சீனிவாசனின் ஒளிப்பதிவும் ஹரி ஜி ராஜ சேகரின் பின்னணி இசையும் மிக சிறப்பாக இருந்தன .
பாடலும் இனிமை . முக நூலை தூது விட்டு ஒரு காதல் பாடக் எழுதி இருக்கிறார் பாடலாசிரியர் உமா தேவி.
நிகழ்ச்சியில் சிபிராஜ் பேசும்போது “இப்போ உள்ள நடிகர்களிலேயே அபிமன்யூ அளவுக்கு சண்டைக் காட்சிகளில் சிறப்பா நடிக்கக் கூடிய நடிகர் யாருமே இல்லன்னு நான் சொல்வேன் . படம் சூப்பரா வந்திருக்கு ” என்றார்
சத்யராஜுடனான பழைய சினிமா அனுபவங்களைப் பேசி கலகலக்க வைத்தார் சுந்தர்ராஜன் . ஒரு உதாரணம்…! ” நான் டைரக்ட் பண்ண திருமதி பழனிச்சாமி படத்துல சத்யராஜ்தான் ஹீரோ . ஒவ்வொரு நாள் ஷூட்டிங்குக்கு வந்த உடனேயும் ‘ என்ன தவறு செய்தேன் . அதுதான் எனக்கும் புரியவில்லை’ன்னு அவர் பாடுவார். பதிலுக்கு ‘குற்றம் புரிந்தவன் வாழ்க்கையில் நிம்மதி கொள்வதென்பதேது?’ ன்னு நான் பாடுவேன் ”
அடுத்துப் பேசிய சத்யராஜ் ” படம் பார்த்துட்டேன் . ரொம்ப நல்லா வந்திருக்கு. ஜெட்லாக் பிரச்னையை வைத்து இதுவரை படம் வந்ததில்லை . உண்மையிலேயே அது ஆபத்தான விசயம்தான் .
ஒரு முறை அமெரிக்காவில் உள்ள என் தங்கையை பார்த்துட்டு சென்னை வந்த நான், தி,நகர்ல கார் ஓட்டிட்டு இருந்தப்பவே, திடீர்னு அப்படியே மூணு செகண்ட் தூங்கிட்டேன் . அப்புறம் சுதாரிச்சு காரை ஓரமா நிறுத்தி த்முகம் கழுவி …. ! கொஞ்சம் அசந்திருந்தாலும் பெரிய விபத்தாகி இருக்கும் .
அந்த ஜெட்லாக் விஷயத்தை வச்சு கதை பண்ணி இருக்கறது பாராட்ட வேண்டிய விஷயம் .
அபிமன்யூ சினிமாவில் நடிக்கப் போறார்னு நல்லமுத்து என் கிட்ட சொன்னபோது, ”பையன அவசரப்பட்டு வேலைய விட வேணாம்னு சொல்லச் சொன்னேன் . ஆனா இப்போ சொல்றேன் . படத்துல அபி நல்லா நடிச்சு இருக்காரு .நல்ல நடிகராவும் வருவார் ” என்றார் .
வாழ்த்துகள் அபிமன்யூ, ராம் மனோஜ்குமார் , டி.ரஞ்சித் குமார் !
