மணிரத்னத்தின் மெட்ராஸ் டாக்கீஸ் சுபாஷ்கரன் அல்லிராஜாவின் லைகா புரடக்சன்ஸ் தயாரிப்பில் ,
அரவிந்த் சாமி, சிலம்பரசன், விஜய் சேதுபதி, அருண் விஜய், தியாகராஜன் , பிரகாஷ் ராஜ், ஜோதிகா, ஜெயசுதா, ஐஸ்வர்யா ராஜேஷ், அதிதிராவ் ஹைதரி, டயானா எர்ரப்பா, மன்சூர் அலிகான் நடிப்பில்,
சிவா ஆனந்துடன் சேர்ந்து எழுதி, மணிரத்னம இயக்கி இருக்கும் படம் செக்கச் சிவந்த வானம் . படம் மருதாணி வண்ணமா? வெற்றிலை எச்சிலா ? பார்க்கலாம்
பிரபல தாதா சேனாபதி ( பிரகாஷ் ராஜ் ) தம்பதிக்கு ( ஜெயசுதா) வரதன் (அரவிந்த்சாமி), தியாகு (அருண் விஜய்) , எத்திராஜ் (சிலம்பரசன் ) என்று மூன்று மகன்கள் மற்றும் ஒரு மகள்.
வரதன் உள்ளூரில் அப்பாவுடன் இருந்து அவர் சொன்ன விசயங்களை மட்டும் செய்து கொண்டு அடிதடி விவகாரங்களை பார்த்துக் கொள்கிறான் .
தியாகு துபாயில் ஷேக்குகளுடன் பிசினஸ் செய்கிறான் . எத்திராஜ் செர்பியாவில் ஆயுத வியாபாரம் செய்கிறான் . வரதனின் மனைவி சித்ரா (ஜோதிகா) . டி வி நிருபர் பார்வதி ( அதிதிராவ் ஹைதரி) வரதனின் கள்ளக் காதலி .
ரேணு (ஐஸ்வர்யா ராஜேஷ்) என்ற இலங்கைத் தமிழ்ப் பெண்ணை தியாகு மணந்திருக்கிறான். எத்திராஜ் சாயா என்ற பெண்ணை ( டயானா எர்ரப்பா) காதலிக்கிறான் .
வரதனின் உயிர் நண்பனான ரசூல் இப்ராஹீம் என்ற போலீஸ் அதிகாரி ( விஜய் சேதுபதி) குற்றவாளிகளிடம்,
கடுமையாக நடந்து கொண்டதாக காரணம் காட்டப்பட்டு , ‘ சம்பளத்துடன்’ டிஸ்மிஸ் செய்யப் படுகிறான்.
சேனாபதியின் தொழில் போட்டியாளன் சின்னப்பதாஸ் ( தியாகராஜன் ) சேனாபதி மனைவியோடு கோவிலுக்குப் போகும் போது அவரை கொல்ல முயற்சி நடக்கிறது . படுகாயங்களுடன் தப்பிக்கிறது தம்பதி .
வெளிநாட்டு மகன்களும் சேர்ந்து வந்து, சின்னப்பதாசை சந்தேகப் படுகின்றனர் . சிதம்பரத்தின் மருமகனை கொல்கிறான் வரதன்.
சின்னப்பதாஸ் , சேனாபதியை சந்தித்து ”நான் உன்னை கொல்ல முயலவில்லை” என்று சொல்கிறான் . ”அது தெரியும் ” என்று சொல்லி அனுப்பும் சேனாபதி ,
தனது மனைவியிடம் ”என்னை கொல்ல முயன்றது நம் பிள்ளைகளில் ஒருவன்தான்” என்கிறார் .
யாரென்று தெரிந்து கொள்ள மறுக்கிறாள் மனைவி . மறுநாள் ஓர் அசம்பாவிதம் நிகழ்கிறது .
சேனாபதியை கொல்ல முயன்றது யார் ? அது மற்றவர்களுக்கு தெரிய வரும்போது என்ன ஆனது ?
சேனாபதியை கொல்ல முயன்றது யார் ? அது மற்றவர்களுக்கு தெரிய வரும்போது என்ன ஆனது ? அந்த நபர்களின் உறவு வானம் எப்படி ரத்தத்தால் செக்கச் சிவக்கிறது என்பதே இந்த செக்கச் சிவந்த வானம்.
வாவ் ! மீண்டும் அட்டகாசமாக ஃபார்முக்கு வந்திருக்கிறார் மணி ரத்னம் . வழக்கமான தனது அட்டகாசமான மேக்கிங் மட்டுமல்லாது,
சிவ ஆனந்துடன் சேர்ந்து மீண்டும் அவருக்குள் இருக்கும் திரைக்கதையாளர் மற்றும் வசனகர்த்தாவும் விஸ்வரூபம் எடுத்திருக்கிறார் .
இது அது என்று உதாரணம் சொல்ல முடியாத படம் முழுக்கவே வசனம் ரசனைக்கு விருந்து . ரசித்து ருசிக்க முடிகிறது .
அடுத்து அடுத்து வரும் அட்டகாசமான -அதிர்ச்சியான திருப்பங்கள் திரைக்கதையை கடைசிவரை சுவாரசியம் குன்றாமல் பார்த்துக் கொள்கிறது. இரண்டாம் பாதியில் ஒரு நிலையில் திரைக்கதை சற்றே தொங்க ஆரம்பிக்க, சிக்கிருச்சோ என்று நாம் பயப்பட ஆரம்பிக்கும் நிலையில் மீண்டும் சூடு பிடிக்கிறது படம் .
இயக்குனராக – பிலிம் மேக்கராக — எழுத்தாளராக — மீண்டும் ஜொலிக்கும் மணிரத்னத்திற்கு வாழ்த்துகள். சந்தோஷ கண்ணீரே !
ஒவ்வொரு முக்கியக் கதாபாத்திரத்துக்கும் அவர்கள் சம்மந்தப்பட்ட காட்சிகளுக்கும் என்று,
நுணுக்கமாக வித்தியாசப்படுத்தி பின்னணி இசை கொடுத்து படத்துக்கு பலம் கொடுக்கிறார் ஏ ஆர் ரகுமான் . பாடல்களும் இனிமை .
சந்தோஷ் சிவனின் ஒளிப்பதிவால் விழிகளுக்குள் விரிகுடாக்கள் . ஆச்சர்யம் .. அற்புதம். அழகு. நுணுக்கம் இவற்றோடு காட்சியில் உணர்வுக்கு கூர்மை தரும் ஒளிப்பதிவு . நிறைய கதாபாத்திரங்கள் ஏராள சம்பவங்கள் கொண்ட திரைக்கதையை நுணுக்கி , குழப்பமில்லாமல் தருகிறது ஸ்ரீகர் பிரசாத்தின் சிறப்பான படத் தொகுப்பு .
கலை இயக்கம் , உடைகள், ஒலித் தொகுப்பு ஆகியவையும் தரம்!
வெளியே உக்கிரம் உள்ளுக்குள் மருகும் கேரக்டரில் அசத்தி இருக்கிறார் அரவிந்த்சாமி .
அருண் விஜய்க்கு இது இன்னொரு பொக்கிஷம் . அப்படி ஒரு நடிப்பு .
சிம்புவுக்கு இருக்கும் கெத்து , குறும்பு , ஆவேசம் ஆகியவை அற்புதமாக வெளிப்பட, ஜொலிக்கிறார் சிம்பு .
விஜய் சேதுபதியை அவருக்கே உரிய பாணியில் ரசித்து நடிக்க விட்டிருக்கிறார் மணிரத்னம். விளைவு அருமை . தனது வசன பாணி , நடிப்பு இவற்றால் தெறிக்க விடுகிறார் விஜய் சேதுபதி .
விஜய் சேதுபதிக்கு அரவிந்த் சாமியுடன்தான் அதிக காட்சிகள் . அவருக்கு சிம்புவுடன் சில காட்சிகள்தான் என்றாலும் இருவரும் சேரும் சில காட்சிகளில் ,
சிம்புவின் பில்ட் அப் பாணியும் விஜய் சேதுபதியின் கேஷுவல் பாணியும் ரசனைக்குரிய வித்தியாச விருந்து .
இத்தனை ஸ்டார்களை வைத்துக் கொண்டு எல்லோருக்கும் சம முக்கியத்துவம் கொடுத்திருக்கும் வகையில் மணி ரத்னம் வியக்க வைக்கிறார் .
ஆரம்பத்தில் சஸ்பென்ட் பற்றிய விசாரணையில் விஜய் சேதுபதி கிண்டலாக பதில் சொல்லும் விதம் , அதை கிளைமாக்சில் நியாயப் படுத்தும் திரைக்கதை , அந்த சஸ்பென்ஸ் உடையக் கூடாது என்பதற்காக அந்த இமேஜுக்கு உரிய நடிகரான விஜய் சேதுபதியை அந்த கேரக்டரில் நடிக்க வைத்தது…
என்று ஊன்றிக் கவனித்தால் நடிக நடிகையர் தேர்வில் மணிரத்னத்தின் மேதாவித்தனம் விளங்கும் .
காரியத்தில் கண்ணாக இருந்தாலும் கடைசிக் காட்சியில் ஒரு முக்கிய சூழலில் வண்டி ஓட்டிக் கொண்டே விஜய் சேதுபதி கண்ணில் நீர் நிறைப்பது .. அற்புத டைரக்ஷன் !
சேனாபதியாக நடிக்காமல் வாழ்ந்து விட்டுப் போகிறார் பிரகாஷ் ராஜ் . சின்னப்பதாசாக தியாகராஜன் வெகு இயல்பு .
படத்தின் முக்கிய பெண் கதாபாத்திரமாக – (தனது ) ராமன் இருக்கும் இடத்தை அயோத்தியாக நினைக்கும் மனைவி சீதா போல , படம் முழுக்க அழகாக நடித்திருக்கிறார் ஜோதிகா. கம்பீர நடை , கணவனைக் காப்பாற்ற ரசூலுக்கு பணம் கொடுக்கும் நிர்வாகத்தனம் என்று ஜோதிகா அசத்தல் .
அதிலும் கணவனைப் பார்க்க அவன் கள்ளக் காதலி வீட்டுக்கே வந்து கணவனுடனும் அவன் காதலியுடனும் பேசிவிட்டுப் போகும் காட்சி ரகளை .
எனில் அந்தக் காட்சியில் கள்ளக் காதலனின் மனைவியையே கலாய்க்கும் காட்சியில் அதிதி ராவ் … அதிரி புதிரி ராவ்!
சேனாபதியின் மனைவியின் சகோதரனாக நடித்தும் ரசிக்க வைக்கிறார் சிவா ஆனந்த் .
இலங்கைப் பெண்ணாக ஐஸ்வர்யா ராஜேஷ் கவனம் ஈர்க்கிறார் . நெகிழ்வு. லொகேஷன்கள் எல்லாம் அருமையோ அருமை .
பெரும்பாலும் நியாயம் இல்லாத அடிப்படைக் கதைகளை எடுத்துக் கொண்டு அதை நியாயப் படுத்த உயிரைக் கொடுத்து செதுக்குவதே பெரும்பாலும் மணிரத்னத்துக்குப் பொழப்பு .
கேட்டா கேங்க்ஸ்டர் படம்னா அப்படித்தான் என்பார்கள். இந்தப் படத்திலும் அதுதான் ( சேனாபதி நாயே .. நீ பொறுக்கியா இருந்து பிள்ளைகளையும் பொறுக்கியா வளர்த்தா ,
அந்த பொறுக்கில ஒண்ணு உன்னை கொல்லத்தான் பார்க்கும் . உன் பிரச்னைக்கு ரசிகன் ஏன் வருத்தப் படணும்? நெகிழணும்? ம்…?)
இன்னும் நல்ல எத்திக்ஸ் உள்ள கதைக் கருக்களை மணிரத்னம் எடுத்து படமாக்கினால் எவ்வளவு நன்றாக இருக்கும் என்ற ஏக்கம் இந்தப் படத்திலும் வருகிறது . அப்புறம் துபாயில் ஷேக்குகளுடன் கோடியில் பிசினஸ் செய்யும் தியாகு ஏன் வரதனிடம் பணத்துக்கு கெஞ்சணும்?
கடைசியில் தியாகு எத்திராஜ் சம்மந்தப்பட்ட ஒரு பிரச்னை கதையில் வலிந்து திணிக்கப் பட்டுள்ளதும் செயற்கைத்தனம் .
ஆனால் ஒன்று…..
மணிரத்னத்தின் அண்மைக் காலப் படங்களை (ராவணனை தவிர்த்து விட்டுப் பார்த்தால்…. ஏனென்றால் அது அங்கீகாரம் மறுக்கப்பட்ட ஓர் அற்புதக் காவியம் ) பார்க்கையில்,
ஒரு ஷாட் எடுக்க, ஹார்ட் அட்டாக் வரும் அளவுக்கு கஷ்டப்படும் ( அவருக்குதான்) இந்த மனுஷன் , ஸ்கிரிப்டில் இப்படி சொதப்புகிறாரே என்று கோவம் கோவமாக வரும் . அந்தக் கோவத்தைப் போக்கி மீண்டும் தன்னை ஆராதிக்க வைத்து இருக்கிறார் மணிரத்னம்
செக்கச் சிவந்த வானம் ….. செம்மை செம்மை … ! செம்ம செம்ம .. !! செம செம !!!
மகுடம் சூடும் கலைஞர்கள் …
———————————————-
மணிரத்னம், சிவா ஆனந்த், ஏ ஆர் ரகுமான், ஸ்ரீகர் பிரசாத், விஜய் சேதுபதி, சிலம்பரசன், அருண் விஜய், அரவிந்த்சாமி , ஜோதிகா , பிரகாஷ் ராஜ், ஐஸ்வர்யா ராஜேஷ்
