A CUBE MOVIES APP வழங்க , ஜெய் ஆகாஷ் பிலிம்ஸ் தயாரிப்பில், ஜெய் ஆகாஷ், அக்ஷயா கண்டமுத்தன், அட்சய ராய்,மைக்கேல் அகஸ்டின், கனடா நடிகை (கன்னட நடிகை அல்ல) கிகி வாலஸ் மற்றும் பலர் நடிப்பில் ஜெய சதீசன் நாகேஸ்வரன் என்ற பெயரில் ஜெய் ஆகாஷ் , சண்டைப் பயிற்சி, நடனப் பயிற்சியோடு எழுதி இயக்கி இருக்கும் படம் .
மனைவி ( அக்ஷயா கண்டமுத்தன்) அப்பா (ஏ சி பி ராஜேந்திரன்) தங்கை (அட்சயா ராய்) ஆகியோரோடு ஒரு புதிய வீட்டுக்கு குடி வரும் நபருக்கு ( ஜெய் ஆகாஷ்) நினைவுக் குழப்பப் பிரச்னை இருக்கிறது.
மனைவி மற்றும் தங்கையிடம் ஒருவன் ஆபாச சைகை செய்ய , அவனை கண்டிக்கப் போக, அவன் நான் அப்படி ஏதும் செய்யவில்லை என்று கூற, தங்கை , மனைவி, அப்பாவும் வந்து அவன் அப்படி தவறாக எதுவும் செய்யவில்லை எனவும், “உங்களுக்கு நினைவுக் குழப்பப் பிரம்மை நோய் இருப்பதால் அப்படி நீங்களாகவே கற்பனை செய்து கொள்கிறீர்கள் ” என்றும் கூறி, , மாத்திரை போட்டு உறங்க வைக்கின்றனர் .
ஒரு நிலையில் வீட்டுக்குள் சிலர் வந்து அவனை கொலை செய்ய முயல, அவர்களை அவன் அடித்து விரட்டுகிறான் .
அடுத்த சில நாளில் அப்படி கொலை செய்ய வந்த நபர்களோடு மனைவி பேசிக் கொண்டு இருப்பதைப் பார்க்கிறான் . ஆனால் மனைவி அப்படி ஒரு சம்பவமே நடக்கவில்லை என்று மறுக்கிறாள் .
ஒரு நிலையில் மனைவி , தங்கை , அப்பா அனைவரும் அவனுக்கு எதிராக சதி செய்வதை அறிந்து போலீசில் புகார் செய்கிறான் .
அப்போதுதான் நடந்து கொண்டிருப்பது 2012 ஆம் ஆண்டு என்று அவன் திட்டமிட்டு நம்ப வைக்கப்பட்டு இருப்பதும் , மனைவியாக நடிப்பது ஒரு டாக்டர் , அப்பாவாக நடிப்பது ஒரு இன்ஸ்பெக்டர் என்பதும்தங்கையாக நடிப்பது , 2012 ஆம் ஆண்டில் அவனால் கொலை செய்யப்பட்டவர்கள் என்று போலீஸ் நம்பும் ஒரு குடும்பத்தைச் சேர்ந்தவள் என்பதும் அவனுக்குத் தெரிய வருகிறது .
அவன்தான் கொன்றான் எனில் ஏன் ? இல்லை எனில் நடந்தது என்ன?
– என்பதே இந்த ஜெய விஜயம் .
வித்தியாசமான நல்ல விறுவிறுப்பான கதை .
பேசும் வார்த்தைகளில் ஒற்றெழுத்துக்களை மென்மையாக்கியோ அல்லது விழுங்கி விட்டோ படபடவென்று வேகமாகப் பேசும் தனது பாணியில் அப்படியே பேசி நடிக்கிறார் ஜெய் ஆகாஷ் . தோற்றப் பொலிவை அவர் தக்க வைத்திருக்கும் விதமும் பாராட்டுக்குரியது .
அழகாக மட்டுமின்றி குடும்பப் பாங்காகவும் இருக்கிறார் அக்ஷய கண்டமுத்தன். நடிப்பும் சிறப்பு .
அட்சயா ராய் நடிப்பும் ஒகே .
நிஜ மனைவியாக நடித்திருக்கும் கிகி வாலஸ் ஈர்ப்பான முக அமைப்புடன் கவர்கிறார் . ஆனால் காட்சிகள் குறைவு . அவரை இன்னும் நன்றாகப் பயன்படுத்தி இருக்கலாம்.
மற்றவர்கள் கண்ணும் கருத்துமாக வசனம் பேசி விட்டு மட்டும் போகிறார்கள்.
புகையாக இருக்கும் ஆத்மா என்ற உத்தி சிறப்பானது. ஆனால் தொழில் நுட்ப ரீதியாக சரி இல்லை .
அதே போல திரைக்கதை, நடிப்பு, உட்பட எல்லா தொழில்நுட்பத் துறைகளிலும் இன்னும் நேர்த்தி தேவை .
