கத்துக்குட்டி @ விமர்சனம்

எம்.அன்வர் கபீர், ஆர். ராம்குமார், பி.ஆர்.முருகன் ஆகியோர் தயாரிக்க, நரேன், சூரி, சிருஷ்டி டாங்கே நடிப்பில் ரா.சரவணன் கதை திரைக்கதை வசனம் எழுதி முதன்மை படத்தொகுப்பு செய்து இயக்கி இருக்கும் படம் கத்துக்குட்டி .

இந்த கத்துக்குட்டி சத்துக் குட்டியா இல்லை வெத்துக் குட்டியா? பார்க்கலாம் .

எம் ஏ படித்து இருந்தாலும் விவசாயம்தான் பார்க்க வேண்டும் என்ற உறுதியோடு வாழும் இளைஞன் அறிவழகனுக்கு (நரேன்) குடிப்பழக்கமும் அதனால் செய்யும் சலம்பல்களும் ஒரு குறை என்றாலும் மற்றபடி அவன் மிகச் சரியானவன் . அவனது நண்பன் ஜிஞ்சர் (சூரி) .

அறிவழகனின் தந்தை சந்தானம் (இயக்குனர் பாரதிராஜாவின் தம்பி ஜெயராஜ் ), தற்போது எதிர்க்கட்சியாக இருக்கும் ஒரு குறிப்பிட்ட கட்சிக்காக நாற்பது வருடங்களாக உண்மையாக உழைப்பவர் . இதுவரை எந்தப் பலனையும் பெறாதவர் .

அதே பகுதியில் ஆளுங்கட்சிப் பிரமுகரான இன்னொருவர் (ஞானவேல்) சந்தானத்தின் உறவினர். என்றாலும் ஆளுங்கட்சியில் இருந்து கொண்டு சந்தானத்துக்கு எதிராக, அரசியல் செய்பவர்.

அதே ஊரைச் சேர்ந்த இளம்பெண் புவனா (சிருஷ்டி டாங்கே ) மண் சார்ந்த சிந்தனை, இயற்கை பாதுகாப்பு , சுற்றுச் சூழல் மேம்பாடு போன்றவற்றில் ஆர்வம் உள்ளவள். அவரது தந்தையும் (இயக்குனர் ராஜா )அப்படியே .

தவிர காவிரி டெல்டாப் பகுதியை நச்சுப் பாலைவனமாக்க முயலும் மீத்தேன் எரிவாயுத் திட்டத்துக்கு எதிராகக் குரல் கொடுக்கும் இயக்கத்தில் இருப்பவர் அவர் .

ஆரம்பத்தில் புவனாவும் அவளது தந்தையும் அறிவழகனை தவறாகவே பார்க்கின்றனர். ஒரு நிலையில் அவன் நல்லவன்; கொள்கை விசயங்களில் தம்மைப் போன்றவன் என்பதை உணர்கின்றனர் . ஆனாலும் அப்பா சந்தானம் பார்வையில் மட்டும் அறிவழகன் ஓர் உருப்படாத மகன்,

இந்த நிலையில் தேர்தல் வருகிறது.

இதுவரை கட்சிக்காகவே உழைத்த சந்தானம், இந்த முறையாவது தனக்கு சீட் கிடைக்காவிட்டால் , தனது அரசியல் வாழ்வே வீண் என மன நிலையில், எப்படியாவது எம் எல் ஏ சீட் வாங்கி விடும் முடிவில் சென்னைக்குப் போகிறார் .

அங்கே ‘இளைஞர்களுக்குத்தான் சீட்’ என்று கட்சியில் முடிவாகிறது . எனவே சந்தானத்துக்கு சீட் தராமல் அவராது மகன் அறிவழகனுக்கு சீட் தருகிறது கட்சி. தனக்கு விருப்பம் இல்லா விட்டாலும் வேறு வழி இல்லாத நிலையில் அதை ஏற்றுக் கொண்டு வருகிறார் சந்தானம் .

இதே பாணியில் இளைஞருக்குதான் சீட் என்று ஆளுங்கட்சியும் முடிவெடுக்க, சந்தனத்தின் உறவினரான அந்த ஆளுங்கட்சிப் பிரமுகருக்கோ குழந்தை இல்லாத குறை . எனவே கட்சியில் அவருக்குப் பிடிக்காத ஒருவரின் மகனுக்கு சீட் கொடுத்து, அவனை எம் எல் ஏ ஆக்கினால் ராஜ்யசபா சீட் தருவதாக கூறுகிறது கட்சி மேலிடம் .

எனவே உறவு என்பதையும் மறந்து தலைமை சொல்லும் நபருக்காக — சந்தானம் மற்றும் அறிவழகனுக்கு எதிராக — களம் இறங்குகிறார் அந்த ஆளுங்கட்சி அரசியல்வாதி .

தேர்தல் பிரச்சாரம் துவங்க , அறிவழகனுக்கு ஆதரவு அதிகரிக்கிறது .

இந்த நிலையில் மீத்தேன் பரிசோதனைக்காக ஒரு விவசாயியின் நிலத்தை அதிகாரிகள் துளையிட , அதை புவனாவின் தந்தை தடுக்க, அவரை அதிகாரிகள் அடித்து அவமானப்படுத்துகினறனர் .

தன்னால் ஒன்றும் செய்ய முடியாத அவர், அந்த பரிசோதனையை நிறுத்தச் சொல்லி கோரிக்கை எழுதி வைத்து, பூச்சி மருந்து குடித்துத் தற்கொலை செய்து கொள்கிறார் . (ஈழத் தமிழர்களுக்காக உயிர்நீத்த முத்துக் குமாரை இவரது மகன் என்று சொல்கிறது படத்தில் வரும் ஒரு வசனம் )

ஆளுங்கட்சி சார்பில் நிற்கும் வேட்பாள இளைஞன், புவனாவின் தந்தை மீத்தேன் திட்டத்துக்கு எதிராக தனது உயிரை தியாகம் செய்ததை மறைத்து , அறிவழகனுக்கும் புவனாவுக்கும் இருந்த காதலை ஏற்க முடியாமல் அவமானத்தில் தற்கொலை செய்து கொண்டதாகக் கதை கட்டி விடுகிறான் .

பிரச்சாரம் செய்யவே முடியாத அளவுக்கு அறிவழகனுக்கு எதிர்ப்பு வலுக்கிறது .

தேர்தல் நாள் வருகிறது

அறிவழகன் தேர்தலில் வெற்றி பெற்றால் மீத்தேன் திட்டத்துக்கு எதிராக போராடுவான் . அது டெல்டாப் பகுதியை அழியாமல் காக்கும். மாறாக அவன் தோற்று ஆளுங்கட்சி வேட்பாளர் வென்றால் மீத்தேன் திட்டம் நிறைவேற்றப்படும். காவிரி டெல்டாப் பகுதி அழியும் .

ஜெயித்தது யார் என்பதே இந்தப் படம் .

படத்தின் பெரிய பலம் கதையிலேயே இருக்கிறது . ஆம் ! பூத்தேன் கொழிக்கும் காவிரி டெல்டாப் பகுதியில் மீத்தேன் எடுக்க முயலும் அராஜகத்துக்கு எதிராக படம் எழுப்பும் உரிமைக் குரல் போற்றுதலுக்குரியது .

அது மட்டுமல்ல….

“விவசாயியின் பட்டினிச் சாவு என்பதும் தற்கொலை என்பதும் அவன் சாப்பிட முடியவில்லையே என்ற வறுமையால் வரும் சாவு அல்ல. பலபேருக்கு சோறு போடும் விவசாயத்தை ஒழுங்காக செய்ய முடியவில்லையே என்ற விரக்தியாலும் அவமானத்தாலும் வருவது .

அம்பது ஏக்கர் நிலம் வைத்து இருப்பவர் கூட தற்கொலை செய்து கொண்டார் . அவரது நலன்தான் முக்கியம் என்று அவர் நினைத்து இருந்தால் அந்த நிலத்தை விற்று கிடைக்கும் காசில் ராஜா மாதிரி வாழலாம் . ஆனால் ஒழுங்காக விவசாயம் செய்ய முடியாத வேதனையில்தான் அவர் செத்துப் போனார் ” என்று விளக்கும் இடம் ஆகட்டும்…..

“விவசாயியின் வேதனை மரணனங்களையெல்லாம் கள்ளக் காதல் , வயித்து வலி , குடும்பத் தகராறு .. இப்படி பொய்யான காரணம் சொல்லி அசிங்கப்படுத்துற கொடுமை இந்த நாட்டில் தொடர்ந்து நடந்துகிட்டுதானே இருக்கு ” என்று மருகும் இடம் ஆகட்டும் ….

இப்படி எத்தனையோ இடங்களில் ஒடுக்கப்பட்ட விவாசாயிகளின் தன்மானக் குரலின் ஒலிபெருக்கியாக விஸ்வரூபம் எடுக்கிறது இயக்குனர் சரவணனின் வசனம் .

“கர்நாடகா தண்ணி கிடைக்கவே இல்ல . கேரளா தண்ணியும் வரவே இல்ல . ஆனா பாண்டிச்சேரி தண்ணி மட்டும் பாயுதடா ஆறாக ” என்று, பாடல் வரிகளும் தன் பங்குக்கு பட்டையைக் கிளப்புகின்றன

மீத்தேன் திட்டத்தால் விவசாயம் அழியப் போகும் விரக்தியில் புவனாவின் தந்தை தற்கொலை செய்து கொள்ளும் காட்சி ஒரே நேரத்தில் மனதில் கனத்தையும் எதிர்காலம் குறித்த அச்சத்தையும் ஏற்படுத்துகிறது .

செல்போன் டவர்களால் சிட்டுக்குருவி இனம் மட்டுமே அழியும் என்றுதான் எண்ணிக்கொண்டு இருந்தோம். ஆனால் இந்தப் படத்தில் செல்போன் டவர்களால் அழியும் பறவைகள் மற்றும் உயிர்கள் குறித்து ஒரு நீ ஈ ஈ ஈ ஈ ண் ண் ண் ட லிஸ்ட் கொடுக்கிறார்கள் பாருங்கள்! அப்படியே விதிர்விதிர்த்துப் போகிறது நமக்கு .

தஞ்சை நஞ்சைப் பகுதியில் வாழும் விலங்குகள், பறவைகள், பூச்சிகள்…. இவை எல்லாம் இயற்கையோடு இணைந்து வாழும் காட்சிப் பதிவுகளை படம் முழுக்கப் பதித்து மனதைக் கொள்ளை கொள்கிறார் இயக்குனர் சரவணன் .

இதன் மூலம் மீத்தேன் திட்டம் நிறைவேறினால் இவை எல்லாம் இல்லாமல் அழிந்து போகும் என்பதை பூடகமாக அவர் சொல்லி இருக்கும் டைரக்ஷன் உத்திக்கே, கபினி அணையின் மொத்தத் தண்ணீரையும் காலத்துக்கும் கொடுக்கலாம் .

நரேன் குத்தாட்டம் போடும் இடத்தின் பின்னணியில் உள்ள மின்சார டிரான்ஸ்ஃபார்மரில், எரியும் லாந்தர் விளக்குகள் தொங்குவது இயக்குனரின் குசும்புக்கு உதாரணம் .

ஒரு சமூக அக்கறை உள்ள படத்தில் நாயகன் நாயகியின் கொள்கைப் பார்வைகள் எப்படி இருக்க வேண்டும் என்பதற்கு எடுத்துக்காட்டு இந்தப் படம்.

இப்படி பல கனமான விஷயங்கள் படத்தில் இருந்தாலும் படத்தை மிக இலகுவாக , ஜனரஞ்சகமாக , சூரியின் நகைச்சுவைத் திருவிழாவாக கொண்டு போயிருக்கிறார் இயக்குனர் சரவணன் . ஆரம்பம் கொஞ்சம் தடுமாறும் படம் போகப்போக நரேன் சூரி கோஷ்டியின் காமெடி ரகளை கொடி கட்டுகிறது .

ஒரு பக்கம் சூரி நகைச்சுவை வெடிகளை வீசிக் கொண்டே இருக்கிறார் என்றால் இன்னொரு பக்கம் .. பாட்டி வள்ளி (ரெங்கு பாட்டி) சிரிப்புப் பட்டாசு கொளுத்திக் கொண்டே இருக்கிறார்.

பேச்சில் இருக்கும் மலையாள வாடை உறுத்தினாலும் அறிவழகன் கேரக்டரை, உணர்ந்து நடித்துள்ளார் நரேன் . கிராமத்துப் பாவாடை சட்டை இளம்பெண்ணாக சிருஷ்டி டாங்கே சாரப் பார்வை அழகு .

சந்தானமாக நடித்திருக்கும் ஜெயராஜ் ஆரம்பக் காட்சிகளில் கொஞ்சம் தடுமாறி இருந்தாலும் போகப்போக கேரக்டரை உணர்ந்து சிறப்பாக நடித்து இருக்கிறார் .

ஆளுங்கட்சி அரசியல்வாதியாக வரும் ஞானவேலின் பாத்திரப் படைப்பும் அதை அவர் நடித்திருக்கும் விதமும் சூப்பரோ சூப்பர் . படத்தின் கடைசியில் அவர் பேசும் வசனம் , இந்தப் படத்தின் மணி மகுடம் .

சூரி , நரேன் , நடுவில் இயக்குனர் இரா. சரவணன்

ஆரம்பக் காட்சிகளில் கொஞ்சம் கத்தரிக்கோலை ஸ்ட்ராங் ஆகப் போட்டு இருக்கலாம் . கர்நாடகா லாரிக்கரனுடன் குடி போதையில் அறிவழகனும் ஜிஞ்சரும் சண்டை போடும் காட்சி படாததின் பெரிய திருஷ்டி . மல்லாக்கப் படுத்துக் கொண்டு நம் மேல் நாமே எச்சில் துப்புவது போன்ற காட்சி அது . ஏன் சரவணன் ஏன் ?

ஒரு நல்ல அரசியல்வாதியின் தோல்வி உணர்வின் வலியை மிக அருமையாகப் பதிவு செய்யும் வகையில் மக்களின் மனங்களை இந்தப் படம் அசைக்கும் .

இந்தக் காலகட்டத்தில் இந்த மாநிலத்துக்கு மிகத் தேவையான படம் இது .

மொத்தத்தில் கத்துக் குட்டி…. சிங்கக் குட்டி .

மகுடம் சூடும் கலைஞர்கள்
——————————————-
இரா. சரவணன் , ஞானவேல்

Related Posts

பராரி @ விமர்சனம்

பணி @ விமர்சனம்

காதல் சாகச திரில்லர் ‘நேசிப்பாயா’?

About Su Senthilkumaran