ஸ்டுடியோ கிரீன் சார்பில் கே ஈ ஞானவேல் ராஜா தயாரிக்க , ஆர்யா, மகிமா நம்பியார், இந்துஜா, இளவரசு நடிப்பில் மவுன குரு படத்தை இயக்கிய சாந்தகுமார் இயக்கி இருக்கும் படம் ‘மகாமுனி’ .
கிராமப் புறத்தில் ஒரு தாழ்த்தப்பட்ட சமூகத்தைச் சேர்ந்த தாய் எடுத்து வளர்த்த காரணத்தால், தாழ்த்தபட்டவனாக அடையாளமாகி, ஆண்டை வீட்டுப் புரட்சிப் பெண் ( மகிமா நம்பியார்) காதலித்த காரணத்தால் ஆண்டையின் கோபத்துக்கு ஆளாகும் முனி ( ஆர்யா)….
நகர்ப்புறத்தில் தன்னை நம்பி வந்த பெண்ணையும் ( இந்துஜா) அன்பில் பிறந்த குழந்தையையும் காப்பாற்ற , லோக்கல் அரசியல்வாதி ஒருவருக்கு ( இளவரசு), வேண்டாத புள்ளிகளை தீர்த்துக் கட்ட ஆள் தயார் செய்யும் வேலை பார்த்து அதனால் பலரின் கோபத்துக்கு ஆளாகி, ஒரு நிலையில் முழுசாக வஞ்சிக்கப்படும் மகா ( இன்னொரு ஆர்யா )…
சிறுவயதில் அபலைத் தாயோடு பயணிக்கும் பொது ரயில் நிலையத்தில் பிரிந்த இந்த இரட்டை சகோதரர்களின் வாழ்வு , எப்படி உறவு அறியப்படாத நிலையிலேயே , அயோக்கியர்களின் அலட்சிய ஆணவ அதிகார வெறியால் , ஒருவரால் இன்னொருவருக்கு பாதிப்பை ஏற்படுத்துகிறது .. அதன் விளைவு என்ன என்பதே இந்த மகாமுனி .
கதையை விட திரைக்கதை சிறப்பு . திரைக்கதையைவிட இயக்கம் சிறப்பு . அப்படி ஓர் ஆழமான அழுத்தமான கனமான நிதானமான படமாக்கல் தந்திருக்கிறார் இயக்குனர் சாந்தகுமார் .
கடவுள் மற்றும் ஆன்மிகம் குறித்து மேட்டுக்குடி மக்களுக்குக்கு இல்லாத சித்தாந்தத் தெளிவோடு தாழ்த்தப்பட்ட முனி கதாபாத்திரத்தை படைத்த வகையிலும் தமிழ் உணர்வோடு அதை இணைத்த வகையிலும் கவனிக்க வைக்கிறார் . அந்த பகுதியில் வசனங்களும் அருமை .
ஆரம்பத்தில் மெல்ல நகரும் படம் அதற்கான காரண காரியங்களோடு தொடரும்போது ஒரு வாழ்வியலாக விரிகிறது .
இளவரசு – ஜே பி பழக்கத்தை ஆரம்பத்தில் ஒரு காட்சியில் ஜஸ்ட் லைக் தட் சொல்லி ,கிளைமாக்சில் அதில் இருந்து முனி மகா இருவரின் சிக்கல்களை ஒரு புள்ளியில் இணைக்கும் இடத்தில், திரைக்கதை பாராட்டுப் பெறுகிறது
பூடக முடிவு .
ஆர்யாவுக்கு அழுத்தமான இரண்டு கதாபாத்திரங்கள் . வித்தியாசப்படுத்தி நடித்து இருக்கிறார் .
வாழ்தல் குறித்த ஆர்வமும் ஆவேசமும் கொண்ட ஓர் ஏழைப் பெண்ணை சிறப்பாக பிரதிபலித்து இருக்கிறார் இந்துஜா .
தத்துவ சித்தாந்த தெளிவு கொண்ட பெண்ணாக சற்றே முரட்டு தோற்றம் கொண்ட கெட்டப்பில் மகிமா சூப்பர்மா . இளவரசு சிறப்பு .
அருண் பத்மநாபனின் ஒளிப்பதிவு மகா , முனி இருவரின் வாழ்வியல் சூழலையும் தன் பங்குக்கு வித்தியாசப்படுத்துகிறது .
சாபு ஜோசப்பின் படத் தொகுப்பு , இயக்குனரின் கதை சொல்லும் உத்திக்கு பெரிதாக உதவி இருக்கிறது .
தமனின் இசையும் பாடல்களும் ஏமாற்றி விட்டன .
கதை நிகழும் சூழல் வெகு யதார்த்தமாக இருக்கிறது. ஆனால் அதற்கு இரட்டை வேடம் என்பது பொருந்தவில்லை .
இதை சற்று மாற்றி , இரண்டு சூழல்களையும் அடுத்தடுத்து ஒரே பாத்திரத்துக்குத் தந்து , ரவுடியை விட அரசியல்வாதிகளும் அதிகாரிகளும் எப்படி கொடூஎரமாக இருக்கிறர்கள் என்ற கதையை இன்னும் விரிவாக சொல்லி இருக்கலாம் .
எனினும் … சிறப்பான படமாக்கல், விபரீத விளைவை முதலில் சொல்லி அப்புறம் எப்படி நடந்தது என்பதை சொல்லும் உத்தி அழுத்தமான இயக்கம் இவற்றால் ஓர் சிறந்த அனுபவமாக மலர்கிறது மகாமுனி .
3.5/5.
