டாக்டர் எம்ஜிஆர் கல்வி மற்றும் ஆராய்ச்சி நிறுவனப் பல்கலைக் கழகத்தின் நிறுவன வேந்தரான ஏ சி . சண்முகத்துக்கு சொந்தமான ராஜ ராஜேஸ்வரி கல்விக் குழுமம்,
பெங்களூரில் வைத்து இருக்கும் ராஜேஸ்வரி மருத்துவம் மற்றும் பல் மருத்துவக் கல்வி நிறுவனங்களை 2012 இல் பார்வையிட வந்த ,
இங்கிலாந்து கிளாஸ்கோவில் உள்ள ராயல் காலேஜ் ஆஃப் பிசியன்ஸ் அண்ட் சர்ஜன்ஸ் நிறுவனத்தின் தலைமைப் பேராசிரியர் இயான் ஆண்டர்சனின் தெரிவு மற்றும் ,
2013 ஆம் ஆண்டு பார்வையிட வந்த மேற்படி இங்கிலாந்து கல்லூரி நிறுவனத்தின் பேராசிரியர் ஃபிராங்க் டனின் தெரிவு இவற்றின் அடிப்படையில்
ஏழை மக்களுக்கு வசதி வாய்ந்த மருத்துவ மனைகளுக்கிணையாக இலவச மருத்துவம் வழங்கும் சேவைக்காக
ஏ சி சண்முகத்துக்கு கவுரவ ஃபெலோஷிப் வழங்கப்பட்டது .
பொதுவாக மருத்துவர்களுக்கு மட்டுமே வழங்கப்படும் இந்த விருதை , முன்னாள் இந்திய ஜனாதிபதி கே ஆர் நாராயணனுக்குப் பிறகு வாங்கும் மருத்துவர் அல்லாத பிரமுகர் ஏ சி சண்முகம்தானாம் . இந்த நிலையில், மேற்படி டாக்டர் எம் ஜிஆர் நிகர் நிலைப் பல்கலைக் கழகத்தில் வரும் மார்ச் 5 ஆம் தேதி திங்கள் அன்று மாலை நான்கு மணி அளவில் நடக்கவிருக்கும்,
எம் ஜி ஆர் நூற்றாண்டு விழா கட்டிட திறப்பு விழா மற்றும் பல்கலைக் கழக முப்பதாம் ஆண்டு விழாவில்
எம்ஜிஆரின் வெண்கலச் சிலையை ரஜினிகாந்த் திறந்து வைக்கிறார் .
மொரீஷியஸ் குடியரசுத் தலைவர் பரமசிவம் பிள்ளை வையாபுரியும் இலங்கை கல்வி அமைச்சர் வி எஸ் ராதா கிருஷ்ணனும் நிகழ்ச்சியில் கலந்து கொள்கிறார்கள் .
இந்த நிகழ்ச்சியில் எம்ஜி ஆர் விருதை இயக்குனர்கள் கே .பாக்யராஜ், பி வாசு, கே. எஸ் ரவிகுமார் , விக்ரமன், ஆர் கே செல்வமணி, கஸ்தூரி ராஜா, சுந்தர் சி ,\
நடிகர்கள் நாசர், விஜயகுமார், பிரபு, பாண்டியராஜன் , கஸ்தூரி , ஜெய சித்ரா, பழம்பெரும் நடிகைகள் எம் என் ராஜம், சரோஜா தேவி, சௌகார் ஜானகி, காஞ்சனா, பாரதி சச்சு, வெண்ணிற ஆடை நிரமலா , லதா ஆகியோர் பெற்றுக் கொள்கிறார்கள் .
சிறப்பு அழைப்பாளர்களாக ஐசரி கணேஷ், பாரதி ராஜா, எஸ் பி முத்துராமன், தாணு, ஆர் பி சவுத்ரி, முன்னாள் அமைச்சர்கள் ஹண்டே, வி வி சுவாமிநாதன், எஸ் ஆர் ராதா, மற்றும் பல முன்னாள் கலெக்டர்கள்,
கவிஞர் முத்துலிங்கம் , இசையமைப்பாளர் சங்கம் கணேஷ் , எம் ஜி ஆருக்கு சிறுநீரகம் கொடுத்த லீலாவதி, மற்றும் எம் ஜி ஆரின் உறவினர்கள் மற்றும் பல முக்கியப் பிரமுகர்கள் கலந்து கொள்கின்றனர் .
இதற்கான பத்திரிகையாளர் சந்திப்பில் மேற்கண்ட தகவல்களை எம் ஜி ஆர் கல்வி மற்றும் ஆராய்ச்சி நிறுவனத்தின் தலைவர் ஏ சி எஸ்அருண்குமார், துணை வேந்தர் முஸ்தபா ஹுசைன் , பதிவாளர் பழனிவேலு ஆகியோர் தெரிவித்தனர் .
அவர்களிடம் நான் , எல்லாம் சரி .. எம் ஜி ஆர் சிலை எம் ஜி ஆர் மாதிரி இருக்குமா ?” என்று கேட்டேன் . “கண்டிப்பாக இருக்கும் . சிலையைப் பார்த்த பலரும் இதுவரை அமைக்கப்பட எம் ஜி ஆரின் வெண்கல சிலைகளிலேயே இதுதான் சிறப்பானது என்று கருத்து தெரிவிக்கிறார்கள் ” என்றனர் .
அப்போ சந்தோசம் !
