மீண்டும் காமெடி பிளஸ் செண்டிமெண்ட் கதாநாயகனாக விவேக் !
எஸ் எஸ் எஸ் எண்டர்டெயின்மென்ட் சார்பில் ஜே. ஏ. லாரன்ஸ் வழங்க, மேக்னாஸ் புரடக்ஷச்ன தயாரிப்பில் விவேக் கதாநாயகனாக நடித்து, திரைக்கு வரத் தயாராக இருக்கும் படம் பாலக்காட்டு மாதவன் . சந்திர மோகன் என்பவர் இயக்கி இருக்கும் இந்தப் படத்தில் விவேக்கின் ஜோடியாக நடித்திருப்பவர் சோனியா அகர்வால்.
பிள்ளையைத் தத்தெடுப்பது வழக்கம் . விவேக் ஒரு அம்மாவைத் தத்தெடுத்துக் கொண்டு வந்து விடுகிறார். அந்த அம்மாவுக்கும் மனைவிக்கும் மாமியார் மருமகள் சண்டை வருகிறது. அப்புறம் என்ன என்பதை காமெடியும் செண்டிமெண்டும் கலந்து சொல்லி இருக்கும் படம் இது.
அம்மாவாக பழம்பெரும் நடிகை ஷீலா நடித்திருக்கிறார். “பொதுவாக இதுவரை மலையாளத்திலும் தமிழிலும் என்னை ரொம்ப சாஃப்ட்டான கேரக்டரில்தான் நடிக்க வைப்பார்கள். இதில் வித்தியாசமான வேடம் ” என்று ஷீலா சொல்ல , அதை வழி மொழிந்த விவேக் ” அவங்களுக்கு காமெடி நடிப்பில் இவ்வளவு திறமை இருக்கும்னு யாருமே நினைச்சிருக்க மாட்டாங்க. சும்மா கலக்கி இருக்காங்க ” என்றார் .
ஒருவன் திடீர் என பணக்காரன் ஆனால் என்னென்ன செய்வான் என்பது போல படத்தில் வரும் ஒரு பாடலை விவேக்கே எழுதி இருக்கிறார் . ஸ்ரீகாந்த் தேவா இசையில் இந்தப் பாடலை இசையமைப்பாளர் அனிருத் பாடி இருக்கிறார்.
எனவே ?
படத்தின் பாடல் வெளியீட்டு விழாவில் பாடல்களைப் பெற்றுக் கொண்டவர் அனிருத் . வெளியிட்டவர் சிவகார்த்திகேயன் .
“வொய் திஸ் கொலை வெறி பாட்டு ஹிட் ஆனப்போ எல்லாரும் என்னை பாராட்டினாங்க . ஆனா சினிமா உலகில் இருந்து என்னை பாராட்டிய முதல் மனிதர் விவேக் சார்தான் . அந்த நன்றிக்காகதான் அவர் கேட்டப்போ பாட்டுப் பாடினேன் . இப்போ நிகழ்ச்சிக்கும் வந்திருக்கேன் ” என்றார் அனிருத்.
“என் படத்தின் பாடல்களை வெளியிட வரணும்னு சிவ கார்த்திகேயனுக்கு ஒரு மெசேஜ்தான் அனுப்பினேன் .அவரே போன்ல வந்து ‘கண்டிப்பா வர்றேன்’னு சொன்னார் . இதன் மூலமா யாரும் போன் பண்ணினா சிவ கார்த்திகேயன் போனை எடுக்கறது இல்ல என்று சொல்லப்படுகிற குற்றச் சாட்டை அடிச்சு நொறுக்கிட்டார்.” என்றார் விவேக்
“சின்ன வயசுல இருந்தே நான் விவேக் சார் ஃபேன்” என்று ஆரம்பித்த சிவ கார்த்திகேயன் ” எப்போ பார்த்தாலும் அவரோட காமெடியை பார்த்துட்டே இருந்து வீட்ல திட்டு கூட வாங்கி இருக்கேன். அவர் ஒரு படத்துல சொன்ன ‘அடியே ரதி அக்னிஹோத்ரி!’ என்ற டயலாக்கை நான் ஒரு படத்துல அறியாமலே பேசிட்டேன் . அந்த அளவுக்கு அவர் காமெடி என்னை ஆக்கிரமிச்சு இருக்கு . இப்போ அவர் படப் பாடலை வெளியிட அவர் கூப்பிட்டதை பெருமையா நினைக்கிறேன் . கூடிய சீக்கிரம் அவர் கூட சேர்ந்து நடிக்கவும் ஆசைப்படுறேன் ” என்றார் .
அது மட்டுமல்ல …
காமெடி நடிகர்கள் ஹீரோ ஆகும்போது கதாநாயகி கிடைப்பதில் உள்ள கஷ்டம் பற்றி பேசிய சிவ கார்த்திகேயன் ” மான் கராத்தே படத்தில் எனக்கு ஹன்சிகா ஜோடியாக நடிக்க வந்த போது பல விமர்சனங்கள் வந்தது ” என்று கூற , இதற்கு பதில் சொன்ன விவேக் ” உங்க வருங்காலக் கணவர் எப்படி இருக்கணும்?னு’ எந்தக் கதாநாயகி கிட்ட கேட்டாலும் ‘சென்ஸ் ஆஃப் ஹியூமர் உள்ள ஆளா வேணும்’னு சொல்றாங்க . ஆனா நடிக்க கூப்பிட்டா மட்டும் வர மாட்டேங்கறாங்க. எங்க தொழிலே சென்ஸ் ஆஃப் ஹியூமரை வச்சுதானே நடக்குது ” என்றார்
சரி.. பாடலும் டிரைலரும் எப்படி இருக்கு ?
நாம் மூணாவது பாராவில் சொல்லி இருக்கும் கதையை டிரைலர் தெளிவாக விளக்குகிறது .
விவேக் எழுதியுள்ள பாடலும் , எப்படி இருந்த நான் இப்படி ஆகிட்டேன் என்று துவங்கும் பாடலும் நன்றாக இருக்கின்றன .
