நடனம், நடிப்பு இயக்கம் என்று சினிமாவின் அடுத்தடுத்த படிகளில் அழுத்தமாக ஏறும் பிரபுதேவா அடுத்தபடியாக….. அதாவது அடுத்த, படியாக தயாரிப்பாளர் ஆகிறார் .
தனது தயாரிப்பு நிறுவனத்திற்கு ‘பிரபுதேவா ஸ்டுடியோஸ் (Prabhu Deva Studios) என பெயர் வைத்துள்ளார்.
எடுத்த எடுப்பிலேயே மூன்று படங்களை தயாரிக்கிறார் .
முதல் படம் பிரபல மலையாள இயக்குனர் பிரியதர்ஷன் இயக்கத்தில் பிரகாஷ்ராஜ் நடிக்கும் படம் . பிரியதர்ஷனின் உதவியாளராக தனது சினிமா கேரியரைத் துவங்கிய இயக்குனர் ஏ.எல். விஜய் தனது திங்க் பிக் நிறுவனம் மூலம் இந்தப் படத்தில் இணைகிறார் .
விஜய் சார்பில் அவரது மனைவி அமலா பால்,
இந்தப் படத்தில் பிரபுதேவாவுடன் இன்னொரு தயாரிப்பாளராக செயல்படுகிறார். ஆக குருநாதர் பிரியதர்ஷன் இயக்கும் படத்தை அவரது சிஷ்யர் ஏ எல் விஜய் இயக்குகிறார் .
இரண்டாவதாக , ரோமியோ ஜூலியட் படத்தின் வெற்றிக் கூட்டணியான ஜெயம் ரவியும் இயக்குனர் லட்சுமணனும் இணையும் படம் .
இதன் எடிட்டர் இப்போது நைட்ஷோ படத்தின் மூலம் இயக்குனராகவும் ஆகி இருக்கும் ஆண்டனி .
மூன்றாவது படம் இயக்குனர் ஏ எல் விஜய்யின் உதவியாளர் விக்டர் இயக்க, நைட்ஷோ படத்தில் நாயகனாக நடித்திருக்கும் வருண் நடிக்கிறார் . இவர் மறைந்த அமரர் எம் ஜி ஆரின் தீவிரத் தொண்டராக நடிகராக இருந்து அமைச்சரான ஐசரி வேலனின் பேரன் . ஐசரி வேலனின் மகனும் வேல்ஸ் கல்விக் குழுமத் தலைவருமான ஐசரி கணேஷின் சகோதரியின் மகன்.
இந்தப் படத்துக்கு வினோதன் என்று பெயர் வைத்துள்ளனர் . ஒரு உடல் மற்றும் மனநலக் குறைபாடு உள்ள இளைஞனின் வாழ்வில் அதனால் எப்படி எல்லாம் முன்னேற்றம் கெடுகிறது என்பதை சொல்லும் படமாம் இது.
இரண்டு மூன்றாவது படங்களுக்கு இசை இமான் . “எடுத்த எடுப்பிலேயே எனக்கு இரண்டு படங்கள் கொடுத்து இருக்கும் பிரபுதேவாவுக்கு நன்றி ” என்றார் இமான் .
பிரபுதேவா பேசும்போது ” வித்தியாசமான சிறப்பான கதைகளையும் வெற்றிக் கூட்டணிகளையும் வெற்றி பெரும் என்ற நம்பிக்கையைத் தரும் கூட்டணிகளையும் தேர்ந்தேடுத்துளேன் . எனக்கு ஜெயம் ரவியை ரொம்பப் பிடிக்கும் . அவர் எனது உடன்பிறவா சகோதரர்.
நடிக்கப் போனால் ஷூட்டிங் சமயத்தில்தான் டென்ஷன் வரும் . டைரக்ஷன் செய்யப் போனால் ஷூட்டிங் எல்லாம் முடிந்து எடிட்டிங்குக்கு உட்காரும்போதுதான் டென்ஷன் வரும். ஆனால் படம் தயாரிக்கும் என்று அறிவிப்பு கொடுக்கும்போதே டென்ஷன் வருது. ஆனாலும் செய்யறதா முடிவு பண்ணிட்டேன்.
சர்வதேச தரத்தில் கதையம்சம் உள்ள திரைப்படங்களை ‘பிரபு தேவா ஸ்டுடியோஸ்’ தயாரிக்க திட்டமிட்டுள்ளது. முதலில் தமிழில் ஆரம்பிக்கிறோம் . ஏன்னா இதுதான் நமக்கு தெரிஞ்ச இடம் . மெல்ல மெல்ல தமிழ் மட்டுமல்லாது மற்ற மொழி திரைப்படங்களையும் தயாரிக்க திட்டமிட்டு உள்ளோம்.
தமிழ் திரை உலகில் திறமைக்கு பஞ்சமே இல்லை. தேர்ந்த, அனுபவமுடைய பலரை கொண்டிருக்கிறது. திறன் வாய்ந்த கலைஞர்கள்,படைப்பாளிகள் மொழி, ப்ராந்தியம் என குறுகிய வட்டத்தில் சிக்கி கொள்ளக்கூடாது அவர்கள் நாடெங்கும் சென்று தங்களது திறமையை வெளி காட்ட வேண்டும்.
நல்ல படைப்பாளிகளை தேர்ந்து எடுத்து வெவ்வேறு இடங்களுக்கு இட்டு செல்வதில் முனைப்பாக ‘பிரபு தேவா ஸ்டுடியோஸ்’செயல்படும்” என்றார் பிரபுதேவா .
சும்மா ஆடுங்க .
