வுண்டர்பார் பிலிம்ஸ் சார்பில் நடிகர் தனுஷ் தயாரித்துக் கதாநாயகனான நடிக்க, அமீர், சமுத்திரக்கனி, டேனியல் பாலாஜி, கிஷோர்,
ஆண்ட்ரியா, ஐஸ்வர்யா ராஜேஷ் நடிப்பில் வெற்றிமாறன் இயக்கி இருக்கும் படம் வட சென்னை. கலீஜா ? கெத்தா ? பார்க்கலாம் .
எம்ஜி ஆர் இறந்து போன 1987 ஆம் ஆண்டு படம் துவங்குகிறது . (ஆனால் எண்பதுகளின் மத்திய கால கட்டம் சம்மந்தப்பட்ட ஒரு ஃபிளாஷ்பேக்கும் படத்தில் உண்டு )
ஒரு நம்பிக்கை துரோக கொலையை செய்யும் ( பவன் உட்பட) , செந்தில் (கிஷோர்) , குணா (சமுத்திரக் கனி) தம்பி (டேனியல் பாலாஜி)என்ற நால்வரில்,
செந்தில்- குணா இருவரும் ரவுடிகளாக தாதாக்களாக வளர்வதோடு ஒருவருக்கு ஒருவர் அடித்துக் கொள்கின்றனர்.
அடிக்கடி ஜெயிலுக்கு சென்று மாதக் கணக்கில் அங்கே தங்கி ஆளுக்கொரு தனி ராஜ்யத்தையே நடத்துகின்றனர் . கடத்தல் கொலை என பெரும்பணம் புரள்கிறது . போலீசில் இவர்கள் இருவருக்கும் தனித்தனி உடந்தைகளும் உண்டு.
இருவரும் சாகட்டும் என்று காத்துக் கிடப்போரும் உண்டு
கேரம் போர்டில் திறமையும் ஆர்வமும் கொண்டு முன்னேறி ஜெயித்து , மத்திய அரசு வேலை வாங்கி அப்படியே அம்மாவை நன்றாக பார்த்துக் கொள்ள நினைக்கும்,
குடிசை வாழ் இளைஞன் ஒருவனுக்கு (தனுஷ்) , ஒரு திருட்டு விவகாரத்தின் மூலம் பரிச்சயமாகும் பெண்ணோடு (ஐஸ்வர்யா ராஜேஷ்) காதல்.
அந்த காதல், ஒரு முத்தத்தில் சற்றே மெய் மறக்கும் நேரத்தில் பலரும் பார்த்து விட, கிண்டலுக்கு ஆளாகின்றனர் .
ஒரு ரவுடி அந்தப் பெண்ணை தொடர்ந்து கிண்டல் கேலி செய்ய திட்டமிட, அவனுக்கும் நாயகனுக்கும் நடந்த சண்டையில், அவனை நாயகன் குத்திக் கொல்கிறான் . ஜெயிலுக்கு வருகிறான். ஜெயிலில் குணாவின் ஆட்களால் வெறுக்கப்பட்டு செந்திலின் ஆளாக மாறுகிறான் .
அரசியலில் வளர நினைக்கும் செந்தில், குணாவை போட்டுத் தள்ள முடிவு செய்கிறான் . எனவே முந்திக் கொண்டு செந்திலை போட்டுத்தள்ள குணா முடிவு செய்கிறான் .
அந்த முயற்சியில் செந்திலை போட முடியாத நிலையில் ஓர் எதிர்பாராத திருப்பம் . செந்தில் தாக்கப்பட்டு கை கால் இழுத்துக் கொள்கிறது .
நாயகனுக்கும் காதலிக்கும் திருமணம் ஆகிறது .
இந்த நேரத்தில் கடற்கரையில் இருந்து மீனவர்களை அப்புறப்படுத்தி ஒரு மல்டி நேஷனல் கம்பெனிக்கு தாரை வார்க்க முடிவு செய்கிறது அரசு . அதற்காக குணாவும் செந்திலும் பணத்துக்காக பகையை மறந்து ஒன்று சேர்ந்து மக்களுக்கு எதிராக செயல்படுகின்றனர் .
அதை நாயகன் எதிர்க்கிறான் . இந்த இடத்தில், 1980களின் மத்தியில் போப் ஆண்டவர் வருகையை காரணம் காட்டி மீனவ மக்களை அப்புறப்படுத்த அரசு முயன்றதையும் ,
அதற்காக போராடிய ராஜன் (அமீர்) துரோகமாக செந்தில் , குணா மற்றும் இருவரால் கொல்லப்பட்ட கதை (படத்தின் முதல் காட்சி) விளக்கப்படுகிறது
ராஜனின் மனைவி ( ஆண்ட்ரியா). இப்போது அவள் குணாவின் மனைவியாக இருப்பது சொல்லப்படுகிறது .
ராஜனின் சமூக அக்கறைப் பார்வையில் நாயகன் செயல்பட, இதுவரை பிரிந்து நின்று அடித்துக் கொண்ட செந்தில் குணா இருவரும் சேர்ந்து நாயகனுக்கு எதிராக களம் இறங்க , தற்காலிகமான நாயகன் மனைவியோடு வெளியூருக்கு கிளம்ப , வடசென்னை முதல் பாகம் முடிகிறது .
இரண்டாம் பாகம் இன்னும் ஆறு மாதத்துக்குள் வரும் . மூன்றாம் பாகமும் உண்டு .
சபாஷ் வெற்றி மாறன் !
1980 களின் மத்தியில் துவங்கி, வட சென்னைப் பகுதியை பூர்வீகமாக உரிமைப்பட்ட நிலமாகக் கொண்ட அந்த மக்களை விரட்ட ,
பல்வேறு பணக்கார நிறுவனங்களும் அந்நிய நிறுவனங்களும் முயல்வதையும் அதற்கு துணை போகும் பல்வேறு அரசியல் கட்சிகளின் செயல்பாடுகளையும் ,
மக்களின் வாழ்நிலை , சூழ்நிலைகளையும் அரசியல் மாற்றங்களால் அவர்களுக்கு ஏற்படும் பாதை மாற்றங்களையும் , தூசும் துப்புமாக வியர்வையும் கண்ணீருமாக ரத்தம் சதையுமாக சொல்லும் வகையில் வெற்றி மாறன் அமைத்து இருக்கும் முரட்டு திரைக்கதையும் ,
அதற்கு இணையாக அவர் கொடுத்திருக்கும் படமாக்கலும் பிரமிக்க வைக்கிறது .
எம் ஜி ஆர் இறந்த போது கடைகளை உடைத்து பொருட்களை பலரும் தூக்கிக் கொண்டு போனது , பலரும் எம்ஜி ஆருக்குப் பிறகு ஜானகி அணி பக்கம் நின்று ஏமாந்தது,
எம் ஜி ஆர் இறுதி ஊர்வல வண்டியில் இருந்து ஜெயலலிதா தள்ளி விடப்பட்டது , ஜெயலலிதாவின் வளர்ச்சி
(ஜெயலலிதாவை உருவாக திருநாவுக்கரசு எவ்வளவு முக்கிய பின்புலமாக இருந்தார் என்பதை ஞாபகப்படுத்தி திருநாவுகரசரின் தூக்கத்தைக் கெடுத்து விட்டார் வெற்றி மாறன் .வடசென்னையை பார்த்தால் திருநாவுகரசருக்கு வடை போச்சே என்றே எண்ணத்தில் துக்கம் தொண்டையை அடைக்கலாம்)என்று,
ஒரு பக்கம் வெகு ஜன ஈர்ப்பு அரசியலை பேசும் திரைக்கதை , இன்னொரு பக்கம் இத்தனை வருடத்தில் வட சென்னையில் ஏற்பட்டு இருக்கும் மாற்றங்களையும் காட்டுகிறது ,
அங்கே உள்ள மக்கள் பலரிடம் சில்லறைக் குற்றங்கள் இருந்தாலும் அவர்களின் எளிமை, அன்பு , மனிதாபிமானம் , யாதர்த்தம், உண்மை ,கெட்ட வார்த்தைகள் பேசும் குணம்….எனினும் மக்களின் நன்மைக்காக உழைக்கும் நிஜமான- ஆனால் அங்கீகரிக்கப்படாத ஹீரோக்கள் அங்கு உருவாகிக் கொண்டே இருப்பதை சொல்லும் விதம் அற்புதம் . 
படம் துவங்கிய கால் மணி நேரத்துக்குள் நாம் படம் பார்க்கவில்லை . நிஜ நிகழ்வுகளில் நாமும் ஒரு பார்வையாளராக இருக்கிறோம்,
படம் துவங்கிய கால் மணி நேரத்துக்குள் நாம் படம் பார்க்கவில்லை . நிஜ நிகழ்வுகளில் நாமும் ஒரு பார்வையாளராக இருக்கிறோம், -என்ற உணர்வை தந்து விடுகிறது படம் . இரண்டே முக்கால் மணி நேரம் அவ்வளவு சுவாரஸ்யமாக போகிறது.
அந்த இடைவேளை திருப்பம் யாரும் எதிர்பாராத ஒன்று .
அதே நேரம் அடுத்து வரும் சில விசயங்களை யூகிக்க முடிகிறது என்றாலும் அது நடக்கும்போது நாமும் ஏதோ, எதிர்பாராத காட்சியை எதிர்கொள்வது போலவே ரசிக்கிறோம் பாருங்கள் , அங்கேதான் பட்டொளி வீசிப் பறக்கிறது வெற்றி மாறனின் டைரக்சன் ! அருமை ! சிறப்பு .
இடைவேளை வரை எதற்கு இந்தப் படம் என்று திரைக்கதை ரீதியாக சலிப்பை ஏற்படுத்தும் படம் இரண்டாம் பாதியில் விஸ்வரூபம் எடுக்கிறது .
அமீர் நடித்திருக்கும் ராஜன் கதாபாத்திரத்தை அரசியலோடு சேர்த்து புது வண்ணம் கொடுத்தது வெற்றி மாறனின் திரைக்கதை அறிவின் சிறப்பு அம்சம் . பாராட்டுகள் பொன்னியின் செல்வனில் வரும் நந்தினி கதாபாத்திரதத்கை நினைவு படுத்துகிறது ஆண்ட்ரியா கதாபாத்திரம் .
அப்படி ஒரு பிரம்மாண்ட நாவலை ஒரேமுட்டாக படித்து முடித்த உணர்வு படம் முடிந்த பிறகு ஏற்படுகிறது . சின்னச் சின்ன விஷயங்கள் ரசனையாக ஈர்க்கின்றன .
ராஜன் இறந்து போது அவன் முகத்தில் குளிர்கண்ணாடி அணிவிப்பது சிறுசாக எழுதப்பட்ட கனமான கவிதை போன்ற காட்சி .
பல்வேறு கெட்டப் அதற்குரிய வயது அதற்குரிய பக்குவம் என்று நடிப்பில் அசத்தி இருக்கிறார் தனுஷ்
அமீர் ராஜனாக வாழ்ந்து விட்டார் . சமுத்திரக் கனி மிக சிறப்பு . இன்னும் பேச்சில் கன்னட வாசனையை தவிர்க்க முடியாதது தவிர கிஷோரும் சிறப்பு . மிக நுட்பமான கேரக்டரில் அசத்தி இருக்கிறார் டேனியல் பாலாஜி .
ஆண்ட்ரியா நுண்ணிய உணர்வுகளை வெளிப்படுத்தும் வகையில் ஈர்க்கிறார் .
ஐஸ்வர்யா ராஜேஷ் ஒகே .செந்திலின் (கிஷோர்) மனைவியாக வரும் பெண் .. முகம் தோற்றம், பேச்சு … அடேயப்பா ! நடிப்பது போலவே தெரியவில்லை . நிஜமாக அந்த கேரக்டராகவே இருக்கிறார் .
சந்தோஷ் நாராயண் இசை படத்தின் உணர்வுக் கூட்டலுக்கு உதவுகிறது . வேல்ராஜின் ஒளிப்பதிவு திரைக்குள் நம்மையும் ஒரு நபராக உலவ விடுகிறது . இரண்டே முக்கால் மணி நேரம் ஓடும் படத்தை தொய்வாகாமல் கொண்டு போவதில் ஜி பி வெங்கடேஷின் படத்தொகுப்பு பெரும்பங்கு வகிக்கிறது .
வட சென்னை … தவற விடக் கூடாத திரை அனுபவம் !
மகுடம் சூடும் கலைஞர்கள்
**************************************
வெற்றி மாறன் , தனுஷ், அமீர் , ஆண்ட்ரியா , டேனியல் பாலாஜி செந்திலின் மனைவியாக நடித்திருக்கும் பெண்
