லாபிரிந்த் ஃபிலிம்ஸ் தயாரிப்பில் குரு சோமசுந்தரம், சிபி புவன சந்திரன், விசாகன் சூலூர் வணங்காமுடி,
சாந்தினி தமிழரசன், அழகம் பெருமாள், ஜான் விஜய், அனிஷா அம்ப்ரோஸ் நடிப்பில் விநாயக்கின் கதை வசனத்துக்கு ,
அவரோடு சேர்ந்து திரைக்கதை அமைத்து மனோஜ் பீதா இயக்கியிருக்கும் படம் ‘வஞ்சகர் உலகம்’. ரசனையால் வீழ்த்தும் உலகமா இது ? பார்க்கலாம்
ஒரு பத்திரிகையின் கணிப்பொறிப் பிரிவில் பணியாற்றும் சண்முகம் என்ற இளைஞனை ( சிபி புவன சந்திரன்) ,
எதிர்வீட்டுப் பெண் மைதிலி (சாந்தினி தமிழரசன்) கொலை வழக்கில் கைது செய்கிறது போலீஸ் . அவன்தான் குற்றவாளி என்பதில் உறுதியாக இருக்கிறார்கள் இன்ஸ்பெக்டர் நீலமேகமும் (வாசு விக்ரம்) , கான்ஸ்டபிள் ஒருவரும் (பிச்சைக்காரன் மூர்த்தி).
காரணம், மைதிலியின் வீட்டில் இருந்து சண்முகம் வந்ததை பார்த்ததாக சொல்லும் வாட்ச்மேன் ( சிசர்ஸ் மனோகர்) ஆனால் அவர் மொடாக் குடியர் .
சம்மந்தப்பட்ட அன்று காலை போதை விலகும் நேரத்தில் எரியும் ஒரு வேனில் இருந்து உயிர் தப்பிய சண்முகத்துக்கு, இரவில் நடந்தது எதுவும் தெரியவில்லை .
சண்முகத்துக்கு உதவுவதற்காக ஸ்டேஷனுக்கு வருகிறார்கள் பத்திரிகையாளன் விசாகன் (விசாகன் சூலூர் வணங்காமுடி) மற்றும் பெண் பத்திரிகையாளரான சம்யுக்தா ( அனீஷா ஆம்ப்ரோஸ்) ஆகியோர். இருவருக்கும் புரிதல் மிக்க நட்பு .
ஆனால் விசாகனுக்கும் நீல மேகத்துக்கும் ஆகாது . சண்முகத்துக்கும் சம்யுக்தாவுக்கும் ஆகாது .
சண்முகமும் மொடாக் குடியன்தான்.ஆனாலும் எவ்வளவு குடித்தாலும் சண்முகம் கொலை எல்லாம் செய்திருக்க மாட்டான் என்பது விசாகன் எண்ணம் .
பத்திரிக்கை ஆசிரியரும் முன்னாள் காவல் துறை அதிகாரி மகாலிங்கமும் நண்பர்கள் . எனவே மகாலிங்கம் மூலமாக, சண்முகத்தை குற்றவாளி என்று முடிவு செய்ய முயலும் நீல மேகத்தை, தடுத்து வைக்கிறது பத்திரிகையாளர்கள் குழு .
மைதிலியின் கணவன் பாலுவின் ( ஜெயப்பிரகாஷ்) பால்ய காலந்தொட்ட நண்பன் சம்பத் (குரு சோமசுந்தரம்) என்ற,
போதைப் பொருள் கடத்தல் தாதா . அவனுக்கு எதிரான இன்னொரு தாதா மாறன் ( ஜான் விஜய்)
இந்த போதைப் பொருள் கடத்தல் கும்பலை போலீசிடம் பிடித்துக் கொடுக்க புலானாய்வு செய்து வரும் விசாகன் , மைதிலி கொலை வழக்குக்கும் போதைப் பொருள் கடத்தல் ஆட்களுக்கும் சம்மந்தம் இருக்கும் என்று நம்புகிறான் .
இந்த நிலையில் கொலை செய்யப்பட மைதிலியின் உடலில் சண்முகத்துடன் உடல் உறவு வைத்துக் கொண்டதற்கான அடையாளங்கள் இருப்பது தெரிய வருகிறது .
”மைதிலிக்கும் எனக்கும் பழக்கம் உண்டு . ஆனால் நான் கொல்ல வில்லை ; கொன்றது யார் என்றும் தெரியவில்லை” என்கிறான் சண்முகம் .
இதுவரை சண்முகத்துக்கு உதவியாக இருந்த முன்னாள் போலீஸ் அதிகாரி மகாலிங்கமே இப்போது அவனுக்கு எதிராக மாற , அப்புறம் நடந்தது என்ன ? மைதிலியை நிஜமாக கொன்றது யார் ? ஏன் ? போதைப் பொருள் கடத்தல் கும்பல் பிடிபட்டதா என்பதே இந்த வஞ்சகர் உலகம் .
அட்டகாசமான மேக்கிங் ! சூப்பரான டைரக்ஷன் !! சபாஷ் மனோஜ் பீதா !!!
படத்தின் மிகப பெரிய பலம் இயக்கம், படமாக்கல் மற்றும் திரைக்கதையுமே ! வளைந்து மடிந்து விதம் விதமான முடிச்சுகள் மற்றும் திருப்பங்களுடன் பயணிக்கிறது திரைக்கதை .
இரண்டு மணி நேரம் நாற்பது நிமிடங்கள் ஓடினாலும் புதுசு புதுசாக ஏதாவது சலிக்காமல் சொல்லிக் கொண்டே இருக்கிறார்கள் . பாராட்டுகள் மனோ பீதா மற்றும விநாயக் .போலீஸ் ஸ்டேஷன் விசாரணை மற்றும் நிகழ்வுகள் எல்லாம் யதார்த்தத்துக்கு அவ்வளவு நெருக்கம் . போதை மாபியாவின் இருண்ட பக்கங்களை காட்டும் காட்சிகளும் அப்படியே .
விசாகனும் சம்யுக்தாவும் நண்பர்கள் . விசாகன் சண்முகத்தின் மேல் பரிதாபப் பட, சம்யுக்தா வெறுப்பது….
அதற்காக சண்முகதை விசாகன் புறக்கணிக்காதது என்று ரசனையான குணாதிசய ரசவாதங்களும் படத்தில் ரசிக்க ருசிக்க நிறைய இருக்கின்றன . அருமை .
சண்முகம் மைதிலி இடையேயான ரகசிய உறவை சொன்ன விதம் கிக் ஆக இருக்கும் அதே நேரம் படமாக்கிய விதத்தில் ,
அழகியல் குறையாமலும் பார்த்துக் கொண்ட வகையில் ஓ போட வைக்கிறார் இயக்குனர் மனோஜ் பீதா . இருவரும் முதன் முதலாக படுகையில் வீழும் போது கெட்டி மேளம் ஒலிப்பது …
சம்பத் துப்பாக்கியால் சகட்டு மேனிக்கு பலரையும் சுட்டுக் கொல்லும்போது பின்னணியில் ”குழலூதும் கண்ணனுக்கு….” என்று துவங்கும் கர்நாடக இசைப் பாடல் வருவது…
இப்படி அப்நார்மலான கிம்மிக்ஸ் நிறைந்த பல சமாச்சாரங்களை உள்ளே வைத்து ரசனையால் ரகளை கூட்டுகிறார் இயக்குனர் மனோஜ் பீதா .
படம் முழுக்கவே சாம் சி எஸ் -ன் அட்டகாசமான பின்னணி இசை படத்துக்கு பலம் சேர்க்கிறது . பாடல்களும் கூட !
வெவ்வேறு சூழல்கள், இடங்கள் , காட்சியின் வித்தியாச உணர்வுகள் இவற்றுக்கு ஏற்ற இருள் ஒளிப் பயன்பாடு , வண்ண ஆளுமை என்று, அசத்தி இருக்கிறார்கள் ஒளிப்பதிவாளர்கள் ரோட்ரிகோ டெல்ரியோ ஹெரேரா மற்றும் சரவணன் ராம சாமி இருவரும் .
படத்தின் வேகத்துக்கும் போரடிக்காமல் இருப்பதற்கும் மிக முக்கியப் பங்களிப்பை தனது அட்டகாசமான் கட்டிங்குகள் மூலம் செய்து இருக்கிறார் ஆண்டனி .
ஒரு குறிப்பிட்ட காட்சி அல்லது சம்பவம் அல்லது கதைப் பகுதியின் முடிவை காட்டி விட்டு அப்புறம் நடந்ததைக் காட்டுவது என்ற — 
தமிழில் அரிதாக மட்டுமே பயன்படுத்தப்பட்ட— உத்தியை இந்தப் படத்தில் பயன்படுத்தி தெறிக்க விட்டிருக்கிறார்கள் ஆண்டனியும் மனோஜ் பீதாவும்.
தமிழில் அரிதாக மட்டுமே பயன்படுத்தப்பட்ட— உத்தியை இந்தப் படத்தில் பயன்படுத்தி தெறிக்க விட்டிருக்கிறார்கள் ஆண்டனியும் மனோஜ் பீதாவும். மேலும் பல சுவையான ரசனையான இன்டல்லக்சுவலான தொழில் நுட்ப உத்திகளும் படத்தில் இருக்கின்றன .
ஏற்றுக் கொண்டிருக்கும் பாத்திரத்துக்கு ஏற்ப இளைத்து கன்னத்தில் டொக் விழுந்து தோன்றுவதோடு,
நுணுக்கமாக உணர்வுகளை வெளிப்படுத்தல் , வித்தியாசமான உடல் மொழிகள் , நல்ல டைமிங் என்று நடிப்பில் அசத்தி இருக்கிறார் குரு சோமசுந்தரம் .
பொதுவாக டெர்ரர் ஆக நடந்து கொள்ளும் சம்பத், பொட்டலம் மடிக்கும் கீழ் அடித்தட்டு வர்க்கத் தொழிலாளிகளுடன் அன்பாக பேசுவதும் … ” நீங்க துப்பாக்கியால ஆளுகளை சுடும்போது வரும் சத்தத்துல காது அடைக்குது. ரொம்ப டிஸ்டர்பா இருக்கு .
அதை எல்லாம் வேற எங்கயாவது வச்சுக்குங்களேன் ” என்று சொல்லும்போது ,கனிவோடு ”சரிம்மா” என்று சொல்வது எல்லாம் வேற லெவல்
சிவி, விசாகன், அனிஷா, அழகம் பெருமாள், போன்றோர் தங்களுக்கே உரிய தனித்தன்மையான இயல்போடு இயற்கையாக நடித்துள்ளனர் .
சாந்தினி தமிழரசனுக்கு இருக்கிற — “வர்றியா ?” என்று கூப்பிடுகிற மாதிரியான – கண்களை அழகாக பயன்படுத்திக் கொண்டிருக்கிறார் இயக்குனர் . ஜான் விஜய், வாசு விக்ரம், மூர்த்தி ஆகியோரும் ஒகே.
இவ்வளவு நேர்த்தியாக பார்த்துப் பார்த்து படம் எடுத்தவர்கள் , இன்னும் சிறப்பான கதையை எடுத்துக் கொண்டு,
அதில் இந்த வித்தைகளை எல்லாம் காட்டி இருந்தால் சும்மா தெறிக்க விட்டிருக்கலாம் .
கள்ளக் காதல், போதைப் பொருள் கடத்தல் , என்று வழக்கமான கதையில் நின்று விட்டார்கள் .
எனினும் தொழில் நுட்பத்தோடு படைப்பாற்றலை இணைத்த விதம் , அபாரமான படமாக்கல் , வித்தியாசமான சிந்தனைகள் , படம் முழுக்க வரும் ஒரு மெல்லிய எள்ளல் இவற்றால் ..
என்றென்றும் குறிப்பிடத்தக்க ஒரு ரசனையான படமாக வந்திருகிறது வஞ்சகர் உலகம் .
கதைக் கரு மற்றும் நல்ல அடிப்படைக் கதைகளில் கவனம் செலுத்தினால் தமிழ் சினிமாவின்,
தவிர்க்க முடியாத இயக்குனராக ஜொலிப்பார் மனோஜ் பீதா . இதில் துளியும் சந்தேகம் இல்லை .
