வாசன் புரடக்சன்ஸ் சார்பில் வாசன் @ சக்திவாசன் மற்றும் பர்மா டாக்கீஸ் சார்பில் இயக்குனர் தரணிதரன் தயாரிப்பில் ,
மெட்ரோ சிரிஷ், சாந்தினி, கல்லூரி வினோத், ஜெய குமார், விஜய் சத்யா , அனுபமா குமார், மது ரகுராம், வாசன் @ சக்திவாசன் நடிப்பில் , பர்மா , ஜாக்சன் துறை போன்ற
படங்களை இயக்கிய தரணிதரன் இயக்கி இருக்கும் படம் ராஜா ரங்குஸ்கி . படம் ராஜாவா ? இல்லை கூஜாவா ? பார்க்கலாம் .
இளம் காவல் அதிகாரியான ராஜாவுக்கு ( மெட்ரோ சிரிஷ்), இளம் பெண்ணான ரங்குஸ்கி ( சாந்தினி) மீது காதல்.
உயர் அதிகாரியான ஆரோக்கியத்துக்கு (விஜய் சத்யா) ராஜாவை பிடிக்காது. எதிலாவது அவனை மாட்டி விட காத்திருக்கிறான் ஆரோக்கியம் . ராஜா பணியாற்றும் காவல் நிலைய எல்லைக்குள் அடங்கியதொரு, தனி வில்லாக்கள் குடியிருப்பில் வசிக்கிறாள் ரங்குஸ்கி .
ரங்குஸ்கி என்பது எழுத்தாளர் சுஜாதாவின் சொந்தப் பெயர் . சுஜாதாவின் ரசிகையான ரங்குஸ்கி தானும் ஓர் எழுத்தாளர் என்கிறாள்
அங்கே இருக்கும் மரியா என்ற பெண்ணுடன் ( அனுபமா குமார் ) ராஜாவுக்கு அலுவல் பணி இருக்கிறது . மரியா ஒரு பழம்பொருள் சேகரிப்பாளர்.
ராஜாவின் காதலறிந்த மரியா , ‘ எதை வேண்டாம் என்று சொல்கிறோமோ அதைத்தான் ரங்குஸ்கி செய்வாள்” என்கிறாள் . எனவே இன்னொரு போனில் இருந்து “ராஜாவுடன் பேசக் கூடாது ”என்று குரல் மாற்றிப்
பேசி ரங்குஸ்கியை மிரட்டுகிறான் ராஜா .
கோபப் படும் ரங்குஸ்கி ராஜாவுடன் பேசுகிறாள். நெருங்கிப் பழகுகிறாள் . காதல் வருகிறது
ஆனால் அதன் பின்னரும் அந்தக் குரல் தொடர்கிறது . தவிர ராஜாவுக்கும் போன் வருகிறது . தன் குரலில் தன்னை யாரோ மிரட்டுவது கேட்டு அதிர்கிறான் ராஜா .
இந்த நிலையில் மரியா கொல்லப் படுகிறாள். ராஜாவை குற்றவாளியாக்கத்துடிக்கிறான் ஆரோக்கியம் . ஆனால் ஆதாரம் எதுவும் கிடைக்காத நிலையில் வழக்கு சி பி சி ஐ டி க்கு போகிறது .
அதற்கென வரும் அதிகாரி கே கே ஆதாரம் தேட , ராஜாவை நோக்கியே பாதை நீள்கிறது .
மரியாவைக் கொன்றது யார் ? ராஜா தப்பினானா ? என்பதே இந்த ரங்குஸ்கி.
பழம்பொருள் சேகரிப்பு, அதற்கு இருக்கும் சந்தை மதிப்பு, அதனால் ஏற்படும் குற்றங்கள், கடத்தல்கள் , கொலைகள், சிக்குதல்கள்,
தப்பிப்புகள், நம்பிக்கை துரோகங்கள், அதிர்ச்சிகள் இவற்றை வைத்து அழுத்தமாக ஒரு படத்தைக் கொடுத்துள்ளார் இயக்குனர் . அடுத்தடுத்த திருப்பங்கள், எளிதில் யூகிக்க முடியாத முடிவு , பழம்பொருள் சேகரிப்பு பற்றிய சுவையான விஷயம் இவை திரைக்கதையின் பலம்.
மரியா – மேரி திருப்பம் அட்டகாசம் .
மிக சிறப்பான கேமரா நகர்வுகள், சூழல் உருவாக்கம் , நல்ல படமாக்கல் இவற்றாலும் கவர்கிறார் இயக்குனர் தரணிதரன் .
படத்தை பல மடங்கு உயரத்தில் தூக்கி நிறுத்துகிறது யுவன் சங்கர் ராஜாவின் அட்டகாசமான பின்னணி இசை .
அது இல்லாமல் இந்தப் படத்தை யோசிக்கக் கூட முடியவில்லை . அப்படி உயிர் கொடுத்து இருக்கிறார் யுவன் .
மிக அற்புதமான ஒளிப்பதிவு . திரைக்கதைக் கேற்ற ஒரு மர்மத் தன்மையை உருவாகுவது, ஈர வண்ணக் குழைவு, இருள் – ஒளி ஆளுமை என்று மிக நேர்த்தியாக பணியாற்றி இருக்கிறார் ஒளிப்பதிவாளர் யுவா .
ஷாபிக் முகமது அலியின் படத் தொகுப்பும் கபிலனின் கலை இயக்கமும் அருமை அருமை .
மிக இயல்பாக மென்மையாக நடித்துள்ளார் சிரிஷ். சாந்தினி பொருத்தம் .
இதுவரை சிறு சிறு வேடங்களில் நடித்து வந்த விஜய் சத்யா, போலீஸ் அதிகாரி ஆரோக்யமாக சிறப்பாக இயல்பாக அசால்ட்டாக நடித்துள்ளார் . அருமை . வாழ்த்துகள் .
ஜெயா குமாரும் கேஷுவலான நடிப்பில் கவர்கிறார் . தயாரிப்பாளர் சக்தி @ சக்திவாசனும் ஒரு கதாபாத்திரத்தில் நடித்துள்ளார் . குறையில்லை . ஆரம்பத்தில் குடியிருப்பு சுவரில் இருட்டில் ஒரு பிரம்மாணடமான நிழல் தெரிகிறதே . அது யார் ? அல்லது எதுக்கு ?
ராஜா ஏதோ ஸ்பிலிட் பர்சனாலிட்டியாக இருப்பான் என்பது போல வரும் சில ஷாட்கள் ஏன் ?
இது போன்ற வலிந்து திணிக்கப்படும் ஓரிரு விசயங்களை தவிர்த்து இருக்கலாம் .
எனினும் ஒழுங்கான சிரத்தையான திரில்லராக மனத்தைக் கவர்கிறது ராஜா ரங்குஸ்கி.
