இயக்குனர் கேஸ் ரவிகுமார் தயாரித்து முதன்மை வேடத்தில் நடிக்க, லாஸ்லியா , தர்ஷன், யோகி பாபு நடிப்பில் சபரி – சரவணன் இரட்டையர் இயக்கி இருக்கும் படம்.
மலையாளத்தில் வந்த ஆண்ட்ராய்டு குஞ்சப்பன் படத்தின் மறு உருவாக்கம்.
மனைவியை இழந்து விட்ட நிலையில் மகனுக்காகவே (தர்ஷன்) வாழ்கிறார் கிராமத்துப் பெரிய மனிதர் ஒருவர் (கே எஸ் ரவிகுமார்) . ஆனால் அந்த மகனோ மெக்கட்ரானிக்ஸ் படித்து விட்ட நிலையில் ஜெர்மன் போய் பணியாற்ற முடிவு செய்கிறான் . அப்பாவின் விருப்பத்தை மீறி செல்லும் அவன் , அப்பாவுக்குத் துணையாக – உதவியாளாராக ஒரு மனித ரோபோவை விட்டு விட்டுப் போகிறான். 
அந்த ரோபோவின் இயந்திரத்தனமான உதவிகள் மற்றும் துணையை பாசமாக உணர்கிறது பெரியவரின் வெள்ளந்தி மனசு. ஒரு நிலையில் அதை மகனே வெறுக்க, இன்னொரு பக்கம் மீண்டும் அந்த ரோபோவை ஜெர்மனிக்கே கொண்டு போக வேண்டிய கட்டாயம் வர மற்றொரு பக்கம் அந்த ரோபோ தான் தாக்கப்பட்டால் தாக்கியவரை கொன்று விடும் என்பது தெரிய வர நடந்தது என்ன என்பதே இந்த கூகுள் குட்டப்பன்.
பெரிதாகப் பாராட்டவோ பெரிதாக குறை சொல்லவோ வாய்ப்பில்லாத படம் .
ரவிக்குமாருக்கு அந்த கேரக்டர் பொருந்திப் போகிறது . லொக்கேஷன்கள் அருமை 
யோகி பாபு காமெடிக்கு முயற்சி செய்து இருக்கிறார் . சிறுவன் பாவையர் சிறப்பாக நடித்து இருக்கிறார் . ரோபோ வடிவம், குரல் சிறப்பு
ரோபோ மனிதத்தனமாக நடித்து இருக்க மற்ற எல்லோரும் ரோபோ மாதிரி படத்தில் வருகிறார்கள் போகிறார்கள் .
ரோபோவும் பெரியவரும் நெருக்கமாகி விட்ட பிறகு , தன்னைத் தாக்குவோரை ரோபோ கொல்லும் என்று சொல்லி இன்டர்வல் விடுவதில் என்ன சுவாரஸ்யம்?
பெரியவரின் முதியோர் காதல் பகுதி படத்தின் அப்போதைய நீளத்துக்கு உதவுகிறதே தவிர அதனால் படத்தின் முழுமைக்கு என்ன பலன்? தவிர ஏன் அப்படி ஒரு விட்டேத்தியான மேக்கிங் ?
பிராங்க் ஸ்டர் கேரக்டரில் ஏன் அவ்வளவு குழப்பம்? நாடகத்தனம்?
திரைக்கதை இன்னும் சிறப்பாக இருந்திருக்க வேண்டும்.
