ரைட் வியூ சினிமாஸ் சார்பில் ஜெய்ஸ்மன் பழயாட்டு தயாரிக்க , ஆர் பி எம் சினிமாஸ் சார்பில் ராகுல் வெளியிட,
நிகில் மோகன் , இனியா, ரகுமான்,சுவாதி தீக்ஷித், எம் எஸ் பாஸ்கர் , மனோபாலா, கோவை சரளா நடிப்பில் ஜெய்சன் என்பவர் எழுதி இயக்கி இருக்கும் படம் சதுர அடி 3500 . ரசனை பில்டிங் கட்டலாமா ? பார்க்கலாம்
பல வீடுகள் அடங்கிய ஒரு பெரிய அபார்ட்மென்ட் கட்டிக் கொண்டு இருக்கும் இஞ்சினீயர் அந்த கட்டுமாணத்துக்கு உள்ளேயே தூக்கில் தொங்குகிறார் . வழக்கை விசாரிக்க வருகிறார் ஒரு இன்ஸ்பெக்டர் .
இன்ஜினீயருக்கு வேண்டிய பெண்ணின் தகப்பன் , தாய் மற்றும் பலர் அந்த எஞ்சினீயரின் ஆவியை பார்க்கிறார்கள் . பார்த்து பயப்படுவோரில் உயர் போலீஸ் அதிகாரி ஒருவரும் அடக்கம் .
ஆனால் வழக்கை விசாரிக்கும் இன்ஸ்பெக்டர் ஆவி நம்பிக்கை இல்லாதவர் . ஆனால் அவரது காதலி ஆவி நம்பிக்கை உள்ளவள் .
ஒரு நிலையில்இன்ஸ்பெக்டர் கண்ணிலேயே ஆவி படுகிறது . அப்புறம் நடந்தது என்ன ? என்பதே இந்தப் படம் .
ஒரு உண்மைக் கதையின் அடிப்படையில் எழுதப்பட்ட கதை என்கிறார்கள் .
ரொம்ப ஆர்வமாக உற்சாகமாக கதை சொல்கிறார்கள் .
ரகுமான் கெஸ்ட் ரோலில் நடிக்கிறார் . இனியா கதாநாயகியாக நடித்துள்ளார் . தூக்கில் தொங்கும் என்ஜினீயர் , மற்றும் இன்ஸ்பெக்டராக வரும் புதுமுகங்கள் உற்சாகமாக நடிக்கிறார்கள்
ஆனால் பழம் தின்னு கொட்டை போட்ட நடிகர்களான எம் எஸ் பாஸ்கரும் , கோவை சரளாவும் , மனோபாலாவும் காமெடி என்ற பெயரில் சோதிக்கிறார்கள் .
ஆவி நம்பிக்கை இல்லாத இன்ஸ்பெக்டர் முன்பு ஆவி தோன்றுவதும் அப்போது சொல்லப்படும் திருப்பமும் பரவாயில்லை .
கடன் தொல்லை காரணமாக செத்துப் போனதாக அறிவித்துக் கொள்ளும் கேரக்டர் சம்மந்தப்பட்ட விஷயம் (இதுதான் உண்மை சம்பவமோ?) கனமான விசயம்தான் .
ஆனால் அதை இன்னும் அழுத்தமாக நெகிழ்வாகவோ அல்லது பரபரப்பாகவோ சொல்லி இருக்கலாம்
திரைக்கதை மற்றும் இயக்கத்தில் இன்னும் நிறைய நேர்த்தி, கவனம் , சிரத்தை இருந்திருந்தால் நன்றாக விலை போயிருக்கும் இந்த சதுர அடி 3500 .
