ஜே எஸ் பி ஃபிலிம் ஸ்டுடியோஸ் சார்பில் ஜே எஸ் பி சதீஷ் தயாரித்து வழங்க, விக்ரம் பிரபு, மகிமா நம்பியார் , யோகி பாபு மற்றும் பலர் நடிப்பில் ராஜ் தீப் இயக்கி இருக்கும் படம் அசுர குரு.
ஓடும் ரயிலில் மேற் கூரையை வெல்டிங் வைத்து ஓட்டை போட்டு உள்ளே இறங்கி ரிசர்வ் வங்கியின் பணத்தைக் கொளையடிக்கும் நாயகன் ( விக்ரம் பிரபு) , அடுத்தடுத்து ஹவாலா மோசடி செய்யும் ஒரு தாதா , பண இரட்டிப்பு மோசடி செய்யும் ஒரு நபர் , ஒரு வங்கி உட்பட பல்வேறு தரப்புகளிலிருந்து பெரும் பணத்தை கொள்ளையடிக்கிறான் .
ஒரு பக்கம் போலீஸ் அவனை துரத்த, இன்னொரு பக்கம் ஹவாலா தாதா , ஒரு தனியார் துப்பறியும் நிறுவனத்தை நியமிக்கிறார் . துப்பறியும் நிபுணி ஒருவர் ( மகிமா நம்பியார்) , நாயகனை தேடிக் கண்டு பிடிக்கிறார் .
அப்போதுதான் அவன் பணத்தை திருடுவது சுயநலத்துக்கு அல்ல என்பதும் , அந்த பணத்தில் இருந்து அவன் ஒரு ரூபா கூட செலவு செய்வதில்லை என்பதும், அப்படி அவன் திருடுவது ஒரு வித மனோ வியாதி என்பதும் அந்த மாதிரி ஒரு வியாதி உண்மையிலேயே இருப்பதும் தெரியவருகிறது .
அதை தடுக்க முடியாது என்பதால்தான் ‘கெட்டவர்களாகப் பார்த்து திருடும் அளவுக்கு அவனை மாற்றினேன்’ என்கிறான் நண்பன் ( ஜெகன்)
போலீஸ் வியாதித் திருட்டு நாயகனை கண்டு பிடிக்க துரத்த, அவனைக் கண்டு பிடித்து இழந்த பணத்தைப் பிடுங்கி அவனை கொன்று போட ஹவாலா தாதா வெறி கொண்டு அலைய , அதற்குள் துப்பறியும் நிபுணிக்கும் நாயகனுக்கும் காதல் வந்து விட, அப்புறம் என்ன ஆச்சு என்பதே இந்த அசுர குரு . 
இதுவரை தான் நடிக்கும் பாணியிலேயே நடித்து இருக்கிறார் விக்ரம் பிரபு .
துப்பறியும் நிபுணராக கெத்து , பந்தா , தம் அடித்தல் என்று வித்தியாச முகம் காட்டுகிறார் மகிமா நம்பியார் . நடை உடை பாவனைகளில் கேரக்டருக்கு ஏற்ற கவனம் செலுத்தி இருக்கலாம்.
ஓ.பன்னீர் செல்வம் மற்றும் மோடியின் தொண்டராக வரும் டீக்கடை ஓனர் ( புரியுதா?) யோகிபாபு சிரிக்க வைக்கிறார் . பண மதிப்பிழப்பு நடவடிக்கைகளை சீண்டும் காமெடிகள் பலே .
ஆனால் கெட்டவர்களாக பார்த்து திருடுவதாக சொல்லப்படும் நாயகன் , ரிசர்வ் வங்கியின் பணம் , இன்னொரு வங்கியில் பணம் ஆகியவற்றை திருடுவதாக காட்டுவது……. செம நக்கல் .
செல்வகுமாரின் ஒளிப்பதிவு மிக சிறப்பு . இசை மற்றும் படத் தொகுப்பு விஷயங்கள் ஜஸ்ட் ஒகே .
இதுவரை சொல்லப் படாத வித்தியாசமான கதை . பாராட்டலாம் .
ஆனால் அதை இன்னும் ஒரு கமர்ஷியல் படத்துக்கான தன்மைகளோடு , லாஜிக்கோடு , இன்னும் சிறப்பான திரைக்கதை மற்றும் மேக்கிங்கில் சொல்லி இருந்தால் இன்னும் நன்றாக வந்திருக்கும் அசுர குரு.
