M Quest மூவிஸ் தயாரிப்பில் ராகவ் ரங்கநாதன், யாமினி லக்ஷ்மணன், பிரேர்னா கண்ணா, பிரியதர்ஷினி, நிதீஷ் வீரா நடிப்பில் ஷண்முக சுந்தர் என்பவர் எழுதி இயக்கி முக்கிய வேடத்தில் நடித்து வெளியாகி இருக்கும் படம்.
பீப் என்பது கெட்ட வார்த்தைகள் வரும் இடத்தில் அது கேட்காமல் செய்யப் பயன்படுத்தப்படும் ஒலியைக் குறிக்கும் சொல்.
பிரபல நடிகை மீது வெறி கொண்டு அலையும் கல்லூரி மாணவன் (ராகவ்) ஒருவனுக்கு, ஒரு புகைப்படத்தைக் காட்டினால் அதை வைத்து, படத்தில் பிடிக்கப்பட்ட நொடிக்கு முன்னும் பின்னும் நடந்த செயல்கள் , அதில் இருப்போரின் குணாதிசயம் எல்லாவற்றையும் சொல்லும் சக்தி உண்டு.
அவனுக்கு ஒரு விலைமாதுவின் (யாமினி) நட்பு கிடைக்கிறது. பிரபல நடிகையை அறிமுகப்படுத்துவதாக அவள் சொல்கிறாள், அவளை தனது கல்லூரியின் நிகழ்சசிக்கு எல்லாம் தலைமை தாங்க அழைத்து வருகிறான் கல்லூரியின் புரபஸரே (ஷண்முக சுந்தர்) அவளை பிக்கப் செய்கிறார் .
அவரோடு அவள் போவதை அவன் பார்க்கிறான். புரஃபஸரின் மனைவிக்கு விஷயம் தெரிய வருகிறது
ஒரு நிலையில் புரஃபஸரும் சக நண்பன் ஒருவனும் குடியிருக்கும் அப்பார்ட்மெண்ட் ஒன்றில் இருந்து அவள் கீழே விழுந்து தலை சிதறி இறந்து கிடக்கிறாள். தற்கொலை என்கிறது போலீஸ். வாய்ப்பில்லை என்கிறான் இவன்.
நடந்தது என்ன என்பதே பீப்
படத்தின் துவக்கத்தில் மேக்கிங்கில் ஒரு வித்தியாசம் தெரிந்தது.கால் கேர்ள் சம்மந்தப்பட்ட காட்சிகள் அவளுக்கு மாணவனுக்குமான நட்பு இவற்றை டீல் செய்த விதமும் நன்றாக இருந்தது .அதுவும் அவள் நடிகையை அறிமுகப்படுத்துவதாக சொல்வது, கல்லூரிப் போட்டிகளுக்கு நடுவராக எல்லாம் அவள் வருவது… இது போன்ற இடங்களில் எல்லாம் ஒரு சைலன்ட் குறும்பும் தெரிந்தது.
ஆனால் இரண்டாம் பகுதி மரணம் விசாரணை என்று போகும்போது (அதற்கு ஏற்றார் போல அவன் போட்டோவை வைத்தே முழு ஜாதகமும் சொல்வான் என்ற விஷயம் எல்லாம் சொல்லி இருந்தாலும் கூட) , படம் வழக்கமான ஒன்றாக மாறிவிட்டது.
ஒரு புரபஸரை விட விலைமாது எவ்வளவு நல்லவள் ; இரக்கம் உள்ளவள் என்பது போல ஆங்காங்கே சில ‘ரீடிங் பிட்வீன் லைன்ஸ்’ நன்றாக இருந்தாலும் கூட, படம் முடியும்போது எந்த பாதிப்பையும் ஏற்படுத்தவில்லை.
அந்த அளவு படம் ஜஸ்ட் லைக் தட் ஓர் அலட்சியத்தோடே எடுக்கப்பட்டுள்ளது .
எனவே பீப் …. மியூட். (MUTE )
