கலை சினிமாஸ் சார்பில் கலைச் செல்வன் தயாரிக்க, சாருஹாசன் , ஜனகராஜ், ஆனந்த் பாண்டி, ஸ்ரீ பல்லவி,
நடிகை கீர்த்தி சுரேஷின் பாட்டியான சரோஜா நடிப்பில் விஜய ஸ்ரீ ஜி என்ற புது இயக்குனர் இயக்கி இருக்கும் படம் ‘தாதா 87’ .
நிஜத்தில் 87 வயதான நடிகர் சாருஹாசன் இந்தப் படத்தில் அதே வயதில் – ஆனால் தாதாவாக வருகிறார் .
தாதாவாக வந்து, சிறுமிகளை பாலியல் பலாத்காரத்துக்கு ஆட்படுத்தும் நபர்களை மண்ணெணெய் ஊற்றி , தான் புகைக்கும் சுருட்டை அவர்கள் மேல் வீசி எரிக்கிறார் . படத்தில் இசை வெளியீட்டு விழாவில் முன்னோட்டமும் பாடல்களும் திரையிடப்பட்டன.
ஒரு பக்கம் வயதானவரின் சாகசம் இன்னொரு பக்கம் இளம் ஜோடிகளின் கிளாமர் இரண்டும் படத்தில் இருந்தன .
சாருஹாசனை கஷ்டப்படுத்தாமல் அதேநேரம் கமர்ஷியலாக படம் பிடித்து இருக்கும இயக்குனரின் செய் நேர்த்தி கவனிக்க வைத்தது .
பாடல்களும் படமாக்கலும் நன்றாக இருந்தது . கண்ணை உருட்டி கம்பீர வெறியோடு சிரித்து ”பெண்ணைத் தொட்டா.. கொளுத்திடுவேன் ” என்று பஞ்ச் டயலாக் பேசுகிறார் சாருஹாசன் .
சாருஹாசன் பற்றிய ஒரு செய்திப் படம் ”அவர் இரண்டு முறை இருதய அறுவை சிகிச்சை , ஒரு முறை மூளையில் அறுவை சிகிச்சை செய்து கொண்டவர் .
ஆனால் அவர் நடித்திருக்கும் விதத்தைப் பாருங்கள்” என்று சொல்லி வியக்க வைத்தது .
நிகழ்ச்சியில் பேசிய ஜாகுவார் தங்கம் , “பெண் அடிமை ஒழிய வேண்டும் . பெண்களுக்கான வன் கொடுமை ஒழிக்கப் பட வேண்டும். தமிழ்நாட்டை தமிழன்தான் ஆள வேண்டும் . இந்தப் படத்தை இயக்குனர் எடுத்து இருக்கும் விதத்தைப் பார்த்தால் அவர் இன்னொரு மணிரத்னம் ஆக வருவார் ” என்றார் .
சிறப்பு விருந்தினராக வந்திருந்த நடிகை கௌதமி உட்பட அனைவரும் படத்தில் வரும் பெண்ணைத் தொட்டா கொளுத்துவேன் என்ற வசனத்தை பாராட்டிப் பேசினார்கள் அதே கருத்தைப் பேசிய கவிஞர் சினேகன் தொடர்ந்து,
” தண்ணீர் தண்ணீர் என்று எல்லோரும் கேட்டோம். இப்போ வருது . அனால் சேமிக்காம வீணாக்கறோம்” என்றார் .சரோஜா பாட்டி பேசும்போது , ” தமிழ் நாட்டை தமிழன்தான் ஆளணும்னு இல்லே. . யார் வேண்ணா ஆளலாம் . யார் வேண்ணா வாழலாம் .
ஆனா தமிழர்கள் ஒண்ணுமே இல்லாம போயிண்டு இருக்காளே . அதான் தாங்க முடியல . அவா அவா வேலையை அவா அவா சரியா செய்யணும் .
இந்தப் படத்தோட இயக்குனர் ஒரு லாயர் . ஒரு முறை நாங்க ஷூட்டிங் முடிஞ்சு வந்துண்டு இருந்தப்போ , ஒரு ஆக்ஸிடென்ட் . உடனே எங்க காரை விட்டு இறங்கனார் . ராங் சைடுல வந்து டூ வீலர் மேல இடிச்ச அந்த காரை போலீஸ்ல ஒப்படைச்சுட்டுதான் வந்தார் .
அவ்வளவு சரியானவர் . மழை பெஞ்சா தண்ணி வர தான் செய்யும் . ஆனா நாம கேட்டப்போ அவங்க தரலையே ” என்றார் . 
படத்தின் நாயகன் ஆனந்த் பாண்டி பேசும்போது , ” சேலம் ஆத்தூர் எனது சொந்த ஊர் . நிறைய போராட்டத்துக்கு பிறகு,
படத்தின் நாயகன் ஆனந்த் பாண்டி பேசும்போது , ” சேலம் ஆத்தூர் எனது சொந்த ஊர் . நிறைய போராட்டத்துக்கு பிறகு, சினிமாவில் வாய்ப்பு பெற்று இருக்கிறேன். தமிழ்நாட்டை தமிழன் ஆள வேண்டும் . அதுதான் சரி ” என்றார்
சாருஹாசன் பேசும்போது ,
” லாயர்களுக்குள் சமூக அக்கறை இருக்கறது அதிசயம் இல்ல. சுதந்திர இந்தியாவின் சிற்பிகளான, மகாத்மா காந்தி , நேரு, ராஜ கோபாலாச்சாரியார் எல்லோரும் லாயர்கள்தான் . (அம்பேத்கார் கூட லாயர்தான் சாரு சாரே ) .
இந்தப் படத்தில் என்னை வைத்தே நிறைய எடுத்துக் கொண்டு இருந்தார்கள் . நான் கூட ‘என்னை வச்சே எடுத்தா எப்படி சரி வருமா?’ என்று கேட்டேன் .
ஆனால் இப்போ பார்க்கிறேன் . எல்லாமும் எடுத்து இருக்கிறார் . நன்றாகவும் எடுத்து இருக்கிறார் “என்றார் .
படத்தில் ஒரு முக்கிய வேடத்தில் நடித்திருக்கும் இயக்குனர் மனோஜ்குமார், ” சாரு அண்ணாவுக்கு தேசிய விருது வாங்கித் தந்த தபர்ன கதா கன்னடப் படத்தின் கதை … பதவியில் இருந்து ஒய்வு பெற்ற பின்னர் ஓய்வூதியத்துக்கு அலையும் ஒரு முதியவரைப் பற்றியது . அவருக்கு முதல் ஓய்வூதியம் வரும்போது அந்த முதியவர் செத்தே இருப்பார்.
அந்த படம் வந்த பிறகு , ஒய்வு பெற்றவருக்கு உடனே ஓய்வூதியம் கிடைக்க அரசுகள் ஏற்பாடுகள் செய்தன . அதே போல இந்தப் படத்தில் சாரு அண்ணா பேசும்,
‘ பெண்ணைத் தொட்டா கொளுத்துவேன் ‘ என்ற வசனமும் சட்டமாக்கப்படவேண்டும் ” என்றார் .
நிறைவாகப் பேசிய இயக்குனர் விஜய ஸ்ரீ ஜி ,
“அப்படி சட்டமானால் என்னை விட சந்தோஷப் படுபவன் யாரும் இருக்க முடியாது . அவசியம் சட்டமாக வேண்டிய விசயம்தான் அது.
ஏனென்றால் பாலியல் பலாத்காரம் என்பது உலகிலேயே மிகக் கொடிய துன்பம். வளர்ந்த பெண்களுக்கே அப்படி எனில்,
பாலியல் பலாத்காரத்துக்கு உட்படும் சிறுமிகளை எண்ணிப் பாருங்கள் . மாற்றுத் திறனாளி சிறுமிகளை பாலியல் பலாத்காரம் செய்யும் கொடுமையை, என்ன என்று சொல்ல முடியும்? அதிலும் மனநிலை பாதிக்கப்பட்ட பலாத்காரம் செய்யும்போது அவர்கள் என்ன வென்றே புரியாமல் சிரித்துக் கொண்டு இருப்பார்களாம் .
எனில் அந்த பாலியல் பலாத்காரம் எவ்வளவு கொடூரம் ? எனவே பெண்ணைத் தொட்டா கொளுத்தணும் . அது சட்டம் ஆகணும் ” என்றார் .
உண்மை .
