வேலம்மாள் சினி கிரியேஷன்ஸ் சார்பில் மதுரை செல்வம் தயாரிக்க, சஞ்சய் , ஓவியா, ராதாரவி, செந்தில், சரவணன், அருள்தாஸ் நடிப்பில் ராஜதுரை எழுதி இயக்கி இருக்கும் படம் ஓவியாவை விட்டா யாரு ( சீனி ) . படம் எப்படி ? பேசலாம் .
சுயதொழில் செய்து முன்னேற விரும்பும் சீனிக்கு (சஞ்சய்) அம்மா ( மீரா கிருஷ்ணன்) மற்றும் தாத்தாவின் ( டி பி கஜேந்திரன்) ஆதரவு இருந்தும் அப்பாவின் (மனோஜ்குமார்) ஆதரவு இல்லாததால் பலன் இல்லை . சீனியின் காதலி திவ்யா ( ஓவியா ).
அம்மா , தாத்தா உதவியில் ஆரம்பித்த தொழிலில் ஏமாற்றப்படுகிறான் சீனி . எப்படியாவது சுய தொழில் செய்யும் முனைப்பில் இருக்கும் அவனிடம் அவன் காதலியையே கரெக்ட் செய்து தர சொல்கிறார் ஒரு மளிகைக் கடைக்காரர் ( சரவணன்).
இந்த நிலையில் ஆண்மையை அதிகரிக்கும் என்று முட்டாள்தனமாக நம்பப்படும் மண்ணுளி பாம்புக்கு அலையும் ஒரு வங்கி மேலாளர் ( சின்னி ஜெயந்த்), அதிர்ஷ்டம் என்ற நம்பிக்கையில் நாகரத்தினக் கல்லுக்கு அலையும் ஒரு கலெக்டர் ( அருள் தாஸ்) , இரும்பை உடைக்கும் என்று நம்பப்படும் சஞ்சீவி குச்சிக்கு அலையும் ஒரு போலீஸ் அதிகாரி ( ரவி மரியா) ஆகியோரின் ஆசையை பயன்படுத்திக் கொள்கிறான் சீனி .
இவற்றை எல்லாம் தருவதாக சொல்லி சீனி உட்பட அனைவரையும் நம்ப வைத்து ஏமாற்றும் நபர் ( ராதாரவி ) ஒரு நிலையில் தப்பி விட , போலீசிடம் வசமாக மாட்டிக் கொள்கிறான் சீனி . சுயதொழில் செய்து முன்னேற நினைத்த சீனியின் நிலை என்ன ? என்பதே இந்த படம் .
சுய தொழில் செய்யும் லட்சியம் , மூட நம்பிக்கைகளின் விளைவு போன்றவற்றை எளிமையாக பேசுகிறது படம் . எம் ஜி ஆர் சிலைக்கு சேவகம் செய்யும் யானை, அதன் பாகனாக நடிகர் செந்தில் !
பல இடங்களில் வசனங்கள் சுவாரஸ்யம் .
ஸ்ரீகாந்த் தேவா இசையில் கரகாட்டப் பாடல் , மற்றும் ரியா ரியா பாடல்கள் சிறப்பு . சாய் பாரதியின் நடன இயக்கம் எளிமையான இனிமை.
இளம் நாயகன் சஞ்சய் உற்சாகமாக நடிக்கிறார் . ஓவியா ஒகேவ்யா .
ராதாரவி கெட்டப் , நடிப்பு என்று சகல விதத்திலும் அசத்துகிறார் . சரவணன் ஒகே .
கிராமியப் பின்னணியிலான யதார்த்தமான படம் !
