ஷிவானி ஸ்டுடியோஸ் சார்பில் சுபா செந்தில் தயாரிக்க, சிவகுமார், பாடினி குமார், ராம்ஸ் , ஜான் விஜய் நடிப்பில் ஷிவானி செந்தில் இயக்கி இருக்கும் படம் டேக் டைவர்சன்.
நொட்டை, நொள்ளை சொல்லியே பல பெண்களை திருமணத்துக்கு நிராகரித்த ஐ டி நிறுவன இளைஞன் ஒருவன் (சிவ குமார்) ஒரு நிலையில் முதன் முதலில் பார்த்த பெண்ணையே திருமணம் செய்து கொள்ளும் முடிவுக்கு வருகிறான் .
நிச்சயதார்த்தம் நடைபெறும் தினத்தன்று ஐ டி நிறுவன அதிகாரி (ஜான் விஜய்) அவனுக்கு போன் செய்து சக ஊழியரான இளம்பெண் ஒருவரை ( பாடினி குமார்) இரண்டு நாளாகத் தொடர்பு கொள்ள முடியவில்லை என்றும் அவரைப் பார்த்து என்ன என்று தகவல் சொல்லி விட்டு நிச்சயதார்த்தத்துக்குப் போகும்படியும் பணிக்கிறார் .
அங்கே போனால் அந்தப் பெண் 70 கிட்ஸ் தாதா ஒருவனின் ( ராம்ஸ் ) பிடியில் இருப்பது தெரிகிறது . அதன் பின் நடக்கும் சம்பவங்களே டேக் டைவர்சன் சரியான சமயத்தில் டேக் டைவர்சன் எடுப்பது அவசியம்தான் . அதற்காக எதற்கு எடுத்தாலும் டேக் டைவர்சன் எடுத்தால் போக வேண்டிய ஊர் அங்கேயே இருக்கும். நாம் இங்கேயே இருப்போம் என்று சொல்ல ….. முயன்று இருக்கிறார்கள் .
சிவகுமார் இயல்பு .
பாடினி குமார் அழகாக இருக்கிறார் .
நல்ல முக பாவனைகள் வருகிறது . நல்ல கதாபாத்திரங்கள் அமைந்தால் ஜொலிப்பார் . முற்றிலும் புதிய தோற்றத்தில் ராம்ஸ்.
ஜான் விஜய் வழக்கம் போல.
ஜோஸ் பிராங்க்ளினின் பின்னணி இசை அருமை .
திரைக்கதையில் இவர்களே எதற்கு எடுத்தாலும் ஏகப்பட்ட டைவர்ஷன் எடுக்கிறார்கள் . அல்லது பயணமே போகாமல் திரைக்கதையில் நின்ற இடத்திலேயே நிற்கிறார்கள்.சிரத்தை இல்லாத திரைக்கதை, அதீத நாடகத்தனம், நீள நீளத்துக்கு காட்சிகள், வண்டி வண்டியாய் வசனங்கள் – அதுவும் சுவாரஸ்யம் இல்லாமல், தீர்மானமற்ற படத் தொகுப்பு ஆகியவை குறைகள் . 
தான் எந்தப் பெண்ணையும் நிராகரிக்காத ஆனால் பல பெண்களால் நிராகரிக்கப்பட்டு கல்யாணத்துக்கு பெண் தேடும் ஒருவனாக நாயகன் இருப்பது அல்லவா இந்தக் கதைக்கு பொருத்தம்?எனினும் நாயகிக்கு முக்கியமான வில்லன் யார் என்ற அந்த திருப்பமும் அடுத்து வரும் நெகிழ்வான காட்சியும் அருமை
