ஏராளமான தெலுங்குப் படங்களை இயக்கியதோடு , உத்தம புத்திரன், படகோட்டி, களத்தூர் கண்ணம்மா போன்ற சரித்திரம் படைத்த தமிழ்ப் படங்களையும் இயக்கியவர் டி. பிரகாஷ் ராவ் .
டி எல் வி பிரசாத்தும் தெலுங்கிலும் இந்தியிலும் ஐம்பதுக்கும் மேற்பட்ட படங்களை இயக்கியவர் .
இப்போது வைக்கிங் மீடியா ஆண்டு எண்டர்டெயின்மென்ட் சார்பில் ரைனா ஜோஷி என்பவர் தயாரிக்க, சச்சின், ஈஷா குப்தா, பிரபு , கிஷோர், தன்யா பாலகிருஷ்ணன் ஆகியோர் நடிப்பில்,
டி. பிரகாஷ் ராவின் பேரனும் டி எல் வி பிரசாத்தின் மகனுமான டி.சத்யா என்பவர் எழுதி இயக்கும் படம் யார் இவன்.
வெண்ணிலா கபடிக் குழு உட்பட மூன்று படங்களை தெலுங்கில் ரீமேக் செய்த இந்த டி.சத்யா , தமிழ் தெலுங்கு இரு மொழிகளிலும் இயக்கும் படம் யார் இவன் ? தமிழில் இது இவருக்கு முதல் படம்.
படத்தின் பத்திரிகையாளர் சந்திப்பில் படத்தின் முன்னோட்டத்தை திரையிட்டனர் . கொலைக்குற்றம் சாட்டப்பட்ட ஒருவனை தனி அறையில் கை விலங்கு போட்டு வைத்து ,
காவல் துறை விசாரணை அதிகாரி கிஷோர் விசாரணை செய்வது போல அமைந்த முன்னோட்டத்தில் கொலை , ஆக்ஷன் , காதல் எல்லாம் வருகிறது
நிகழ்ச்சியில் பேசிய ஸ்டான்ட் மாஸ்டர் கனல் கண்ணன் ” படத்தின் நாயகன் சச்சின் ஜோஷி பெரிய பிசினஸ் மேன். எனினும் சினிமா அவரது ஆசை . மிக சிறப்பாக நடித்தார் .
ஒளிப்பதிவாளர் அசத்தி இருக்கிறார் . இயக்குனர் மிக சிறப்பாக படமாக்கி உள்ளார் . ஆங்கிலப் படம் பார்க்கும் அனுபவம் தரும் ” என்றார் .
இசை அமைப்பாளர் தமன் பேசும்போது ” எனது அம்மாவும் இயக்குனரின் அம்மாவும் தோழிகள் . என்னை சத்யா சந்தித்தபோது நல்ல கதை திரைக்கதை கொண்டு வாருங்கள் .
கண்டிப்பாக ஜெயிக்கலாம் என்றேன் . அப்படியே கொண்டு வந்தார் . ஒளிப்பதிவு ஆபாரமாக உள்ளது . படம் நன்றாக வரும் ” என்றார் .
நடிகர் கிஷோர் தனது பேச்சில் ” இது ஒரு நேர்மையாக உருவாக்கப்பட்ட கிரைம் திரில்லர் ஆக்ஷன் படமாக இருக்கும் .
படம் சிறப்பாக உருவாகப்பட்டுள்ளது . எல்லோரும் கடுமையாக உழைத்துள்ளனர் ” என்றார் .
“தமிழில் நடிப்பது சந்தோஷமாக உள்ளது ” என்றார் நாயகன் சச்சின்
படம் பற்றிக் கூறும் இயக்குனர் சத்யா ” இது ஒரு மர்டர் மிஸ்ட்ரி திரில்லர் படம் .
கபடி விளையாட்டின் பின்னணியில் படத்தை உருவாக்கி இருக்கிறோம் . ஹீரோ ஒரு கபடி வீரன் . கபடியை ரசிக்கும் கோடீஸ்வரப் பெண் ஒருத்தி அவனை நேசித்து ,மணந்து கொள்கிறார் .
ஒரு நிலையில் அந்தப் பெண் கொல்லப் படுகிறாள். கொலைப் பழி ஹீரோ மீது விழுகிறது .
ஹீரோயின் அப்பாவான கோடீஸ்வரர் குற்றவாளியை தண்டிப்பதில் தீவிரமாக இருக்கிறார் . ஹீரோ என்ன செய்தான் என்பதுதான் கதை . ஹீரோயின் அப்பாவாக பிரபு சார் நடிக்கிறார்
மேலோட்டமாக பார்த்தால் இது வழக்கமான திரில் படம் போல இருக்கும் . ஆனால் அப்படி இல்லாமல் மனோவியல் முறையில் படத்தை கொண்டு போகிறோம் .
இது ஒரு மைன்ட் கேம் படமாக அதாவது மூளை விளையாட்டுப் படமாக இருக்கும் வித்தியாசமான காட்சிகள் . வித்தியாசமான சூழல்கள் ரசிகர்களைக் கவரும் .
படத்தின் எல்லாப் பாடல்களையும் மறைந்த நா . முத்துக் குமார் எழுதி இருக்கிறார் அவர் கடைசியாக பாடல் எழுதிய படம் இதுதான் என்று நினைக்கிறேன் .” என்றார்
