நக்கலைட்ஸ் தயாரிப்பில் கே ராஜேஸ்வர் இயக்கத்தில் வெளிவந்திருக்கும் படம் அம்முச்சி 2 .
காதலியை அவளது கிராமத்துப் பெற்றோர் மேற்படிப்புப் படிக்க விடாமல் தடுக்க, அவளுக்கு உதவ அதே கிராமத்தில் உள்ள தனது தாய்மாமன் வீட்டுக்கு வருகிறான் காதலன் .
பிரச்னை என்ன வென்றால் காதலியின் தகப்பனுக்கும் காதலனின் தாய் மாமனுக்கும் பல ஆண்டு ஜென்மப் பகை . இதனால் காதல் மற்றும் கல்விப் பிரச்னை மேலும் சிக்கலாக, முரட்டு ரவுடிக்கு தன் மகளைத் திருமணம் செய்து கொடுக்க முடிவு செய்கிறான் காதலியின் தகப்பன்.
காதலனுக்கும் ரவுடிக்கும் முட்டிக் கொள்ள ஊர்ப் பஞ்சாயத்துக் கூடி , வர விருக்கும் திருவிழாவையொட்டி தொடர்ந்து மேளம் அடிப்பது, உண்டி வில்லில் அதிக மாங்காய் அடிப்பது, மல்யுத்தம், சிலம்பம், ரேக்ளா ரேஸ் ஆகிய ஐந்து போட்டிகளை நடத்தி, இருவரில் யார் ஜெயிக்கிறாரோ அவர் விருப்பமே இறுதியாகும் என்று முடிவு செய்கிறது .
என்ன நடக்கும் என்ற உலகறிந்த கதையை காமெடி செண்டிமெண்ட் கலந்து சொல்லி இருக்கிறார்கள்
படத்தின் மிகப் பெரிய பலம் கொங்குத் தமிழ் , அந்த முகங்கள் , அவர்களின் வாழ்வியல், உறவுப் பிணைப்புகளை அச்சு அசலாகக் கொண்டு வந்திருப்பது . நாயகிக்கும் அவரது மகளுக்குமான சண்டையும் பாசமுமான காட்சிகள் அழகு. காமெடி நன்று நட்பு துரோக செண்டிமெண்ட் காட்சிகள் இதம் வசனம் ரகளை . குறிப்பாக பேச வந்த விஷயத்தை விட்டு விட்டு அடுத்தடுத்த சப்ஜெக்ட்டுக்கு மாறி பாதிக்கப்பட்டவரை வெறுப்பேற்ற வைக்கும் காட்சிகள் .
பலவீனம் மற்றது எல்லாம் . தோற்றால் தமது குடும்பத்துக்கு என்ன ஆகும் என்று தெரிந்தும் பாட்டி உள்ளடி வேலை செய்வதும் அப்புறம் கண்ணீர் விடுவதும் நாடகத்தனம் .
இடைவேளைக்கு முன்பே வில்லனை ஹீரோ சீரியல் பல்ப் ஒயர் மூலமே கட்டி உருட்டிக் கொண்டு வந்து பஞ்சாயத்து முன்னால் போட்ட பிறகு நடப்பது எல்லாமே பம்மாத்து என்று ஆகி விட்டது .
என்னதான் காமெடி பொழுது போக்கு சினிமா என்றாலும் லாஜிக் மாதிரியாகவாவது எதாச்சும் இருக்கணும் இல்லையா? அது கூட இல்லை அதுதான் எரிச்சல் என்றால் அந்த எரிச்சலுக்கு சந்தணம் பூசுகிறது கொங்கு முகங்களும் மொழியும் .
