விஜய் சேதுபதியின் நன் மதிப்பில், ‘ கன்னிமாடம்’

அட்டகாசமான ஆர்வத்தை தூண்டும் டிரைலர் , ஹரி சாய் இசையில் இனியனின் ஒளிப்பதிவில் அமைந்த சிறப்பான பாடல்கள் படத்தின் மீதான ஆர்வத்தை தூண்டியது . 

 

 

விழாவில் கலந்து கொண்ட ஒவ்வொரு ஆளுமையையும் அவர்களின் அட்டகாச அறிமுகத்துடன் படத்தில் அவர்களது பங்கு குறித்தும் கூறி, இந்நிகழ்வை வெகு அற்புதமாக தொகுத்து வழங்கினார் இயக்குநர் போஸ் வெங்கட்.

நிகழ்ச்சியில் பேசிய நடிகர் ரோபோ சங்கர் ,

 

“நான் பல இசை விழாக்களில் பங்கு கொண்டிருக்கிறேன் ஆனால் இந்த மேடை எனக்கு மிக நெருக்கமானது. முதல் முறையாக பாடகராக இங்கு மேடையேறியுள்ளேன். என்னை பாடகராக அறிமுகப்படுத்திய இசையமைப்பாளர் ஹரி சாய்க்கு நன்றி தெரிவித்து கொள்கிறேன். மேலும் இப்படத்தில் வாய்ப்பு தந்ததற்கு அண்ணன் போஸ் வெங்கட்டுக்கு நன்றி.

 

அவர் என் வாழ்வில் ஒவ்வொரு படியிலும் பேருதவியாக நின்றிருக்கிறார்.பல வருடங்கள் முன்பாகவே இந்தக்கதையை என்னிடம் கூறியுள்ளார். ஒரு அற்புதமான படைப்பாக இப்படம் இருக்கும். தான் முதன் முதலாக பணிபுரிந்த ஆட்டோ டிரைவர் தொழிலை மறக்காமல் இந்தப்படத்தில் அவர்களுக்கு மரியாதை செய்துள்ளார். அவர் இன்னும் பல வெற்றிபடங்களை இயக்கி பெரிய இயக்குநராக வரவேண்டும் என்று வாழ்த்துகிறேன்” என்றார் 

நடிகர் விஜய் சேதுபதி , “எல்லோருக்கும் காதலர் தின நல்வாழ்த்துகள். நடிகர் போஸ் வெங்கட் சிறப்பான ஆளுமையாளர். அவரை மெட்டி ஒலி தொலைக்காட்சி தொடரில் பார்த்து வியந்திருக்கிறேன். அவரது முகத்தை பார்த்தாலே நம்முள் ஒரு நேர்மறைதன்மை கொண்ட நம்பிக்கை பிறக்கும். நாம் சோர்வாகும் போது, தோல்வி எண்ணங்கள் வரும்போது அவரது முகத்தை பார்த்தாலே போதும் பெரும் நம்பிக்கையை அந்த முகம் தரும்.

 

நான் இப்படத்தின் பாடல்களை  கேட்கவில்லை. எல்லோரும் இங்கு பேசுவதைப் பார்க்கும் போது படம் கண்டிப்பாக நேர்த்தியானதாக இருக்குமென தெரிகிறது. போஸ் வெங்கட் வெகு திறமை வாய்ந்தவர். கன்னி மாடம் வெற்றிப் படமாக அமைய வாழ்த்துகள்” என்றார். 

இயக்குநர் விக்ரமன் “சமீப காலங்களில் சினிமாவில் சிறு பட்ஜெட்டில் தயாராகும் தரமான படங்களே, சினிமாவின் அனைத்து தரப்பினருக்கும் லாபகரமானதாக அமைகிறது. பெரிய முதலீட்டு படங்கள் வெற்றியடைவது அனைவரையும் இக்கட்டில் வைக்கும் சவாலானாதாக இருக்கிறது. கன்னிமாடம் தரத்தில் உயர்ந்து விளங்குகிற படைப்பாக இருக்கிறது. கண்டிப்பாக இப்படம் பெரு வெற்றி பெறும். வாழ்த்துகள்.  ” என்றார் 

 சமுத்திரகனி , ” நடிகர் போஸ் வெங்கட்  சினிமா மீது பெருங்காதல் கொண்டவர். நாங்கள் எப்போது சந்தித்தாலும் அவர் சினிமா பற்றியே தீவிரமாக பேசிக்கொண்டிருப்பார். அவரின் இந்த கன்னி முயற்சி கண்டிப்பாக தரமானதாகவே இருக்கும். “கன்னி மாடம்” நல்ல வெற்றியடையும். போஸ் வெங்கட்டுக்கு வாழ்த்துகள்.”என்றார் 

நடிகர் பரத் , “நானும் போஸ் வெங்கட் அவர்களும் சகோதரர்கள் போலவே பழகி வருகிறோம். என் மீது எப்போதும் அன்புடன் இருப்பார். சிறு பட்ஜெட் படங்களை பொறுத்தவரை அதில் வேலை செய்யும் அனைவரும் படத்தின் மீது காதலுடன், படத்தில் தங்கள் முழுத்திறமையை வெளிப்படுத்துவார்கள். “கன்னிமாடம்” தரமான படைப்பாக வந்திருக்கிறது. படம் வெற்றி பெற வாழ்த்துகள்” என்றார். 

திண்டுக்கல் லியோனி , “தமிழ் சினிமா வெகு அரிதாகவே ஆட்டோ, ரிக்‌ஷா டிரைவர்கள் பற்றி படம் எடுத்துள்ளது. கடந்த காலத்தில் எம் ஜி ஆர், சிவாஜி இருவரும் ரிக்‌ஷா ஓட்டுநராக நடித்துள்ளனர்.  ரஜினி ஆட்டோ டிரைவராக  நடித்துள்ளார். போஸ் வெங்கட் ஆட்டோ டிரைவர்கள்  மீது உள்ள அன்பில் அவர்களை பற்றி அழகாக படம் எடுத்துள்ளார். நல்ல கருத்துக்கள் கொண்ட தரமான படைப்பாக படம் இருக்கிறது. படம் வெற்றி பெற என்னுடைய வாழ்த்துகள்.” என்றார் . 

நடிகை காயத்ரி, “போஸ் வெங்கட் அவர்களுக்கும்  தயாரிப்பாளர் ஹஷீர் அவர்களுக்கும் எனது நன்றியை தெரிவித்துகொள்கிறேன். எனக்கு ஒரு அற்புதமான கதாபாத்திரத்தை தந்துள்ளார்கள். படம் நன்றாக வந்துள்ளது. படத்திற்கு எல்லோரும் ஆதரவு தாருங்கள் ” என்றார் 

இசையமைப்பாளர் ஹரி சாய், “இயக்குநர் போஸ் வெங்கட் அவர்களுக்கு  எவ்வளவு நன்றி சொன்னாலும் பத்தாது. எனக்கு இப்படத்தில் வாய்ப்பு தந்ததற்கு நன்றி. நாங்கள்  முழு ஈடுப்பாட்டுடன் இப்படத்தை உருவாக்கியுள்ளோம். உங்களுக்கு இப்படத்தின் பாடல்கள் பிடிக்கும் என்று நம்புகிறேன். ” என்றார் 

நாயகன் ஶ்ரீராம் கார்த்திக் , “நானும் போஸ்வெங்கட் சாரும் சில காலம் முன் ஒரு படப்பிடிப்பில் இருந்தபோது என்னை ஹீரோ வைத்து படம் எடுப்பதாக சொன்னார். சொன்னது போலவே இப்படத்தில் எனக்கு நாயகன் வாய்ப்பு தந்தார். எனது நெடுநாள் கனவு நனவாகியிருக்கிறது. “கன்னி மாடம்” உருவாக உழைத்த அனைத்து நல்ல உள்ளங்களுக்கும் நன்றி.” என்றார் . 

பாடலாசிரியர் விவேக் , “முதல் முறை போஸ் வெங்கட் போனில் இந்தக்கதை பற்றி சொன்னபோதே, என்னை ஈர்த்துவிட்டது. உடனடியாக நான் பாடல் வரிகளை எழுத ஆரம்பித்தேன். மறு நாள் எனக்கு முழு கதையையும் கூறினார். தமிழ் சினிமாவில் ஒரு தரமான படைப்பாக இருக்குமென தோன்றியது. போஸ் வெங்கட் அற்புதமாக இயக்கியுள்ளார். அவர் மிகச்சிறந்த இயக்குநராக வலம் வருவார். அனைவருக்கும் வாழ்த்துகள்” என்றார் 

ஒளிப்பதிவாளர் இனியன், “இப்படம் சின்ன பட்ஜெட்டில் வெகு திட்டமிடலுடன் குறுகிய காலத்தில் எடுக்கப்பட்டது. படப்பிடிப்பு தளத்தில் ஒரு முறை மிகவும் பரபரப்பாக இருந்த போது தயாரிப்பாளர் ஹஷீர் இருந்தார் அவரை யார் எனத் தெரியாமல் வேகமாக ஒதுங்கி போகச் சொல்லி சத்தமாக சொன்னேன். அவரும் ஒதுங்கி போய்விட்டார். பின் தான் அவர் தயாரிப்பாளர் என்பதே தெரிய வந்தது. அந்த நிகழ்வுக்காக நான் மன்னிப்பு கேட்டு கொள்கிறேன். தயாரிப்பாளர் மிக இயல்பான சுபாவமுடையவர். படக்குழுவினருடன் மிகவும் நட்பாக பழகக்கூடியவர். அவரின் படத்தில் எதிரொலித்துள்ளது. படம் நன்றாக வந்துள்ளது உங்கள் அனைவருக்கும் பிடிக்கும் ” என்றார் . 

Rooby Films தயாரிப்பாளர் ஹஷீர் , ” போஸ் வெங்கட் முதல் முறையாக கதை கூறியபோதே  மிக நல்ல படமாக இப்படம் வரும் எனத் தோன்றியது. உடனடியாக படம் தயாரிக்க ஒப்புக்கொண்டேன். நல்ல படங்களை தருவது என்பதே எங்கள் நிறுவனத்தின் குறிக்கோள். “கன்னி மாடம்” தமிழ் சினிமாவில் ஒரு முக்கியமான படைப்பாக இருக்கும். இப்படத்தை பெரிய அளவில் ரிலீஸ் செய்யும் செண்பகமூர்த்தி அவர்களுக்கு நன்றி.” என்றார் . 

 

இயக்குனர் போஸ் வெங்கட் தனது பேச்சில், ” இந்தப் படத்துக்காக தயாரிப்பாளர் , நடிக நடிகையர் , மற்றும் தொழில் நுட்பக் கலைஞர்கள் தந்த ஒத்துழைப்பு அபாரமானது . எல்லோரும் ஆர்வத்தோடு நம்ம படம் என்ற உணர்வில் நடித்துக் கொடுத்தார்கள். உடை கொண்டு வந்து நடித்துக் கொடுத்த ஆறு பாலா , ஒரே நாளில் மூன்று பாடல் எழுதிக் கொடுத்த விவேகா , உயிரைக் கொடுத்து உழைத்த மற்ற தொழில் நுட்பக கலைஞர்கள், குறை வைக்காத தயாரிப்பாளர் ஹசீர் என்று எல்லோருக்கும் மனமார்ந்த நன்றி .

 

என் மீது கொண்ட அன்பால் வந்து கலந்து கொண்ட பரத் , சமுத்திரக் கனி, எனக்காக பயணத்தை தள்ளி வைத்த லியோனி, தன் வருகையின் மூலம் இந்த நிகழ்ச்சிக்கு நட்சத்திர அந்தஸ்து கொடுத்த விஜய் சேதுபதி அனைவருக்கும் மறக்க முடியாத நன்றிகள். இந்தப் படம் எல்லோருக்கும் பிடிக்கும் ” என்றார் . 

.