பிளாக் டிக்கட் பிலிம்ஸ் சார்பில் எஸ் வி டி ஜெயச் சந்திரன் தயாரிக்க,
வால்டர் பிலிப்ஸ், இஷா தல்வார் நாசர் , தலைவாசல் விஜய் , அர்ஜுன் , வித்யு லேகா , வெங்கட் ஆகியோர் நடிக்க,
மித்ரன் ஜவகர் இயக்கத்தில் வந்திருக்கும் படம் மீண்டும் ஒரு காதல் கதை .
காதலா ? சும்மா கதையா ? பார்க்கலாம்
அந்தஸ்து , அதிகாரம், ஆள் பலம் , பண பலம் . அரசியல் பலம் எல்லாம் நிறைந்த ஒரு ஆர்த்தடாக்ஸ் முஸ்லிம் குடும்பத்துப் பெண் ஆயிஷாவுக்கும் (இஷா தல்வார் ) ,
நடுத்தர வர்க்க – எளிமையான இந்து பையன் வினோத்துக்கும் ( வால்டர் பிலிப்ஸ்) காதல் .
பையனுக்கு நண்பர்களும் ஒரு இன்ஸ்பெக்டரும் ஆதரவு .
கட்டுப்பாடு , மதம், வன்முறை இவற்றை மீறி அந்தக் காதல் ஜெயித்ததா இல்லையா ? என்பதே இந்த மீண்டும் ஒரு காதல் கதை .
மலையாளத்தில் பட்டையைக் கிளப்பிய தட்டத்தின் மறயத்து படத்தின் ரீமேக் வடிவமே இந்தப் படம்
மித்ரன் ஜவஹர் ரசித்து ரசித்து காட்சிகளை இயக்கி இருக்கிறார் . அழகு மட்டுமல்லாது கவிதையான முக பாவனைகளாலும் இஷா தல்வார் , நிஜ காதலியை உணர வைக்கிறார் .
அல்டாப் வெங்கட்டின் காமெடிகள் சிரிக்க வைக்கின்றன .
குணச்சித்திர நடிப்பில் கவனம் கவர்கிறார் தலைவாசல் விஜய் .
ஜி வி பிரகாஷின் இசையில் பாடல்கள் மிக இனிமை . விஸ்ணு சர்மாவின் ஒளிப்பதிவும் அழகு .
எங்கே பிரச்னை என்றால் ஒரு மலையாளப் படத்தை தமிழில் ரீமேக் செய்யும்போது அதை தமிழ் நேட்டிவிட்டிக்கு ஏற்ற மாதிரி மாற்ற வேண்டும் . அது படத்தில் இல்லை .
என்னதான் கன்யாகுமரி பகுதியில் கதை நடப்பதாக ஒரு சப்பைக் கட்டு கட்டிக் கொண்டாலும் கூட,
மேக்கிங்கில் மலையாள நெடி ஓவர் . இது போதாது என்று பின்னணியில் மலையாளப் பாடல்களை வேறு ஒலிக்க விடுகிறார்கள் . அப்புறம் எதுக்கு ரீமேக் செய்யணும் ?
ரீமேக் படம் செய்யும் இயக்குனர்கள் எல்லாம் ஒரு முறை வான்மீகி ராமாயணத்தை படித்து விட்டு அதே சூட்டில் கம்பராமாயணத்தை படிக்க வேண்டும்
எப்படி கம்பன் வான்மீகி ராமாயணத்தின் உடல் ,, உயிர் , ஆன்மா எல்லாவற்றையும் மேம்படுத்தி கம்பராமாயணம் படைத்து இருக்கிறான் என்பது புரியும்
எனினும் படத்தின் இரண்டாம் பகுதி படத்தை ஓரளவுக்கு காப்பாற்றுகிறது .
ஆயிஷாவின் வீட்டுக்குள் இருந்து ஒரு புது மாற்றம் வருவது அழகு
அங்கே தலைவாசல் விஜய் பேசும் வசனங்கள் மலாலாவை நினைவூட்டுகின்றன .
மீண்டும் ஒரு காதல் கதை … காதல் கொஞ்சம் கதை கொஞ்சம்
