ஏ ஜி எஸ் எண்டர்டெயின்மென்ட் சார்பில் கல்பாத்தி அகோரம் தயாரிக்க , ஜெயம் ரவி, நயன்தாரா நடிப்பில் ஜெயம் ராஜா இயக்கும் படம் தனியொருவன். இதுவரை டைட்டிலில் தனது பெயரை எம்.ராஜா என்று போட்டு வந்த இயக்குனர் ஜெயம் ராஜா , மோகன் ராஜா என்று இந்தப் படத்தில் இருந்து பெயர் மாற்றம் அடைகிறார் . அப்பா பெயர் (எடிட்டர் ) மோகன் என்பதையும் சேர்த்துதான் இந்தப் பெயர் . தம்பியும் ஜெயம் ரவி என்று அறியப்படும் நிலையில் ஒரு படத்தின் அடையாளத்தை ஏன் இரண்டு பேரும் சுமக்க வேண்டும் என்று கூட இந்த முடிவை எடுத்து இருக்கலாம்.
தவிர இதுவரை எம் ராஜாவாக ரீமேக் படங்களையே இயக்கிக் கொண்டிருந்தவர இப்போது மோகன் ராஜாவாக , முதன் முதலாக சொந்தமாக கதை எழுதி இயக்கும் படம் இது . படத்தின் கதை என்ன ?
” சமுதாயத்தில் இப்போது தவறுகள் அதிகம் ஆகி விட்டன. நியாயமாக இருக்கும் ஒவ்வொருவருக்கும் பல எதிரிகள் உருவாகிறார்கள் . இன்னொரு பக்கம் சராசரி மனிதர்கள் சந்தோசம் , பணம் இவற்றை தேடிப் போகிறார்கள் . அதை பெறவும் செய்கிறார்கள்.
ஆனால் அதையெல்லாம் மீறி இன்றைய சமுதாயத்தில் எங்கேயோ எவனோ உட்கார்ந்து கொண்டு நம்மை அழிக்க நேரம் பார்த்துக் கொண்டிருக்கிறான். அந்த எதிரி வந்து நம்மை நேருக்கு நேர் பாதித்த பிறகு அவனை தாக்கி அழிப்பவன்தான் ஹீரோவா ? நான் ஒரு படி மேலே யோசிக்கிறேன் . அந்த எதிரியை என் ஹீரோ அவனே தேடிப் போகிறான் . இது தமிழ் சினிமாவுக்குப் புதுசு .
வாடிய பயிரைக் கண்டபோது எல்லாம் வாடினேன் என்றார் வள்ளுவர் . இதை விட அன்பை கண்ணியமாக சொல்ல முடியாது . தனியொருவனுக்கு மனிதனுக்கு உணவில்லை எனில் ஜகத்தினை அழித்திடுவோம் என்றார் பாரதியார் . இதை விட அன்பை வீரமாகச் சொல்ல முடியாது . இந்தத் தனியொருவன் பாரதியை பின்பற்றுபவன் .” என்கிறார் மோகன்ராஜா .
படத்தின் ஹீரோயின் நயன்தாரா . 
ஐ பி எஸ் படிப்பை ஒரு சூழல் காரணமாக பாதியிலேயே விட்டு விட்ட — தடய அறிவியல் துறையில் ஆர்வம் உள்ள பெண்ணாக நடித்து இருக்கிறாராம் நயன்தாரா . படத்தின் கதைப்படி நாயகன் தேடிப்போகும் அந்த எதிரியாக நடித்து இருப்பவர் அரவிந்தசாமி . “வில்லன் கேரக்டருக்கு இவ்வளவு அழகான நபரா?” என்றால் ” இன்னிக்கு தீமைதானே ரொம்ப அழகாகவும் கவர்ச்சியாவும் இருக்கு ” என்கிறார் ராஜா .
“நல்லவங்க எல்லாம் நல்ல விசயங்களுக்காக ஆசைப்படுறாங்க. கெட்டவங்க எல்லாம் சுயநலத்துக்காக பேராசைப்படுறாங்க. எப்பவுமே ஆசையை விட பேராசைதான் ஜெயிக்கும் . அதனால நான் நல்ல விஷயங்கள் நடக்கனும்னு ரொம்ப பேராசைப் படுறேன் “
” உன் நண்பன் யாருங்கறதப் பொறுத்துதான் உன் கேரக்டர் இருக்கும் . ஆனால் உன் எதிரி யாருங்கறதப் பொறுத்துதான் உன் கெப்பாசிட்டி புரியும்.”
— இப்படிப் பல வசனங்களை படத்துக்காக எழுத்தாளர்கள் சுபாவும் மோகன் ராஜாவும் சேர்ந்து எழுதி இருக்கிறர்களாம் .
ஹிப் ஹாப் தமிழா ஆதி இசையில் பாடல்களும் ராம்ஜி ஒளிப்பதிவில் காட்சிகளும் நன்றாக வந்திருப்பது , ராஜா போட்டுக்காட்டிய ஒரு பாடலைப் பார்க்கும்போது தெரிந்தது
