ஜி தியாகராஜனின் சத்யஜோதி பிலிம்ஸ் சார்பில் செந்தில் தியாகராஜன் , அர்ஜுன் தியாக ராஜன் இருவரும் தயாரிக்க,
அஜித் குமார் , நயன்தாரா, ஜெகபதி பாபு, தம்பி ராமையா, விவேக், ரோபோ ஷங்கர், கோவை சரளா நடிப்பில் சிவா இயக்கி இருக்கும் படம் விஸ்வாசம் .
கிராமத்து பெரிய தலைக்கட்டு தூக்குதுரை (அஜித் குமார் ).
அடிதடி மூலம் எங்கும் நியாயத்தை நிலைநாட்டுபவர் . நிறைய உறவுகள் மற்றும் ஊர்மக்களின் அன்பு இவற்றோடு நவீன ராஜா போல வாழும் வாழ்க்கை .
ஆனால் கிராமத்து கோவில் திருவிழாவில் காப்பு கட்டும்போது தம்பதி சமேதராக வரச் சொல்ல, தனியாக நிற்கிறார் தூக்கு துரை. ஊரே கலங்குகிறது . மனைவி நிரஞ்சனா (நயன்தாரா) பிரிந்து பொய் மும்பையில் வாழ்வது சொல்லப் படுகிறது .
பிளாஷ்பேக் !
கிராமத்துக்கு மருத்துவ முகாம் நடத்த வரும் டாக்டர் நிரஞ்சனா , ஊரில் கெத்தாக நிறைய உறவுகளோடு வாழும் தூக்குதுரை மீது காதல் கொள்ள, கல்யாணம் . ஒரு பெண் குழந்தை .
கட்ட பஞ்சாயத்து பண்ணும் இடங்களுக்கு மகளோடு போகக் கூடாது என்று எச்சரிக்கிறாள் . இந்த நிலையில் மேல் படிப்புக்க நிரஞ்சனா அமெரிக்கா போக, இங்கே ஊரில் ஒரு சண்டையில் எதிரிகள் வீசிய அரிவாளின் முனை குழந்தையை காயப்படுத்தி விடுகிறது .
ஊருக்கு வரும் நிரஞ்சனா கோவித்துக்கொண்டு மகளோடு மும்பை வந்து செட்டில் ஆக ஓகோ என்று இருக்கிறார் .
பிளாஷ் பேக் முடிய மும்பை வரும் தூக்கு துரையை நிரஞ்சனா புறக்கணிக்கிறார் . அந்த நேரம் பார்த்து மகளை ஒரு கும்பல் கொல்ல முயல , காப்பாற்றுகிறார் .
விளையாட்டில் சாதிக்க விரும்பும் மகளுக்கு பாடி கார்டாக தந்தையையே நியமிக்கிறார் , அப்பா என்று சொல்லக் கூடாது என்ற நிபந்தனையோடு !அதை ஏற்கும் தூக்குதுரை வேலைக்கு சேர்கிறார் .
மகள் விளையாட்டில் சாதிக்க , தூக்குதுரையால் உதவ முடிந்ததா? அப்பா என்று சொல்லிக் கொள்ள முடிந்ததா?
கணவன் மனைவி கட்டிப் பிடித்துக் கொண்டார்களா என்பதே இந்த விஸ்வாசம் .
முகம் முழுக்க வெள்ளை தாடி , மேல் உதட்டை முழுக்க மறைத்து கீழ் உதட்டிலும் படரும் மீசை …
என்றாலும் அதிரடி பலசாலி பேரிளம் வாலிபன் தோற்றத்தில் அஜித் . அவருக்கே உரிய செட்டப்புகள் கெட்டப்புகள் . சிறப்பு ! மதுரை பாஷையிலும் சமாளித்து விடுகிறார் அஜித்குமார்
பலமுறை பார்த்த கதை .. காட்சிகள்தான் . அடுத்து என்ன வரப் போகிறது என்பது கூட புரியும் . ஆனாலும் அந்த காட்சிகள் வரும்போது
நம்மையும் அறியாமல் மனம் நெகிழ்கிறது . அங்கே தான் டைரக்ஷனில் ஜொலிக்கிறார் சிவா . அருமையான படமாக்கல் !
தவிர சில கதைகளை வருடத்துக்கு ஒரு முறை மீண்டும் மீண்டும் கூட பார்க்கலாம் . அப்படி ஒரு கதை அது . திரைக்கதையில் பல old is gold உத்திகளை பயன்படுத்தி இருக்கிறார் சிவா உதரணமா நான் உன் கிட்ட கை குலுக்கினா
உன்னை அணைக்கணும் போல இருக்குன்னு அர்த்தம் என்ற விஷயத்தை பின்னர் பயன்படுத்தும் விதம் .
அதே நேரம் கணவன் மனைவி சண்டை என்ற அடிப்படைக் கதையில் இருந்து, மெல்ல மெல்ல குழந்தைகளை
வளர்க்கும் முறை என்ற மாற்றத்தை கொஞ்சமும் உறுத்தாமல் எடுக்கும் விதமும் அழகு . வசனங்கள் பிரம்மாதம் . அதில் “நீ சிரிச்சுகிட்டு இருக்க . ஆனா சந்தோஷமா இல்ல . சிரிக்கறது வேற .. சந்தோஷமா இருக்கறது வேற ன்னு
புரிஞ்சுக்கற வயசு எனக்கு வந்துருச்சிய்யா ” என்று பாட்டி சொல்வது , சிகரம் . இன்னும் மனசுக்குள்ள ஓடிக்கிட்டே இருக்குப்பா.
விருதுக்குரிய வசனங்கள் !
படத்துக்கான குணாதிசயம் உணர்ந்து 1980 களின் பாணியில் இமான் கொடுத்து இருக்கும் பின்னணி இசை அபாரம்!வெற்றி பழனிச்சாமியின் ஒளிப்பதிவு அவ்வளவு அழகு .
அறிந்த கதை தெரிந்த திரைக்கதையில் ரூபனின் படத் தொகுப்பு படத்தின் வேகம் மற்றும் அழுத்தம் இரண்டுக்கும் தோள் கொடுக்கிறது
சண்டைக் காட்சிகளில் தெறிக்க விடுகிறார் திலிப் சுப்பராயன் .
ஆடை வடிவமைப்பு சிறப்பு .
கிராமத்து மனைவி – மும்பை டாக்டர் இரண்டிலும் சிறப்பாக நயன்தாரா தம்பி ராமையா வழக்கம் போல அசத்தல் . விவேக் , ரோபோ ஷங்கர் ஒகே .
முதல் பாதி நம்மளை தூக்காதான் பார்த்தது . ஆனால் இரண்டாம் பாதி துரையாக உயர்ந்து விட்டது
படம் முடியும் போது ஒரு வித நெகிழ்வான நிறைவுக்கு ஆளாகிறது மனசு .
இது அஜித் ரசிகர்களுக்கு (மட்டும்) எடுக்கப்பட்ட படம் அல்ல . பொது மக்களுக்கான படம் .
விஸ்வாசம் … வெற்றியின் ஸ்வாசம் !
