மிஸ்டிக் ஃபிலிம்ஸ் சார்பாக ஆஸ்திரேலியா வாழ் தமிழர் எம் எஸ் ஆனந்த் தயாரித்துக் கதை திரைக்கதை வசனம் எழுதி இயக்க,
டேனியல் பாலாஜி, வினோத், சசி ஆகியோர் கதாநாயகர்களாக நடிக்க,
நீலிமா . லீ மா , மிஷா ஆகியோர் கதாநாயகிகளாக நடிக்க,
குழந்தை நட்சத்திரம் லக்ஷனா மற்றும் ஈழத்துக் கலைஞர்கள் பலர் நடிக்கும் படம் யாழ்.
ஒளிப்பதிவு ஆதி கருப்பையா , மற்றும் நசீர்,
இசை எஸ் என் அருணகிரி , படத் தொகுப்பு எல் எம் தாஸ்,
கலை ரெம்போன் பால்ராஜ்
படம் பற்றி கூறும் எம் எஸ் ஆனந்த் “இந்த திரைப்படம் ஒரு வித்தியாசமான முயற்சி .
கதை ஆரம்பம் முதல் இறுதி வரை இலங்கையில் நடக்கிறது .
இதில் இந்திய மற்றும் தமிழக கதாபாத்திரங்கள் எதுவும் கிடையாது .
அனைத்துக் கதா பாத்திரங்களும் ஈழத் தமிழ் கதாபாத்திரங்களே !
படத்தின் பாடல் , வசனம் யாவும் முழுக்க இலங்கைத் தமிழிலேயே இருக்கும் . பாடலாசிரியர்களும் ஈழத் தமிழர்களே !
யாழ் என்பது ஈழத் தமிழர்களால் உருவாக்கப்பட்ட ஓர் இசைக் கருவி .
இதை வைத்துக் கொண்டு பாணர்கள் என்பவர்கள் சைவ சித்தாந்தக் கருத்துகளையும்,
தமிழர்களின் கலை கலாச்சாரம் மற்றும் பண்பாட்டையும்,
ஊர் ஊராகச் சென்று பரப்பினார்கள்.
அதனால்தான் யாழ்ப்பாணம் என்ற பெயரே வந்தது .
அது பற்றிப் பேசும் படம் இது .
மேலும் யாழ் இசையும் யாழ் கலையும் கலாச்சாரமும் ஊடாடும் கதாபாத்திரங்களுக்கு இடையில்
இறுதிப் போரின் போது அவர்களுக்குள் நடந்த நட்பு காதல் போன்ற சம்பவங்களையும் ஜன ரஞ்சகமாக சொல்கிறோம் ” என்கிறார் .
வரும் 24 ஆம் தேதி திரைக்கு வருகிறது யாழ் .
