கார்த்திக் சுப்புராஜிடம் பீட்சா படத்தில் இருந்து உதவியாளராக பணியாற்றிய ராகவேந்திர பிரசாத் இயக்கி இருக்கும் படம் 54321 . படத்தின் பெயரே இந்த ஐந்து எண்கள் மட்டும் தான்.
5 நபர்கள் ….. 4 வாழ்க்கை முறைகள் 3 கொலைகள் இரண்டே மணி நேரத்தில் … காரணம் 1 பழி உணர்ச்சி!
— என்று இந்த திரில் படத்தின் பெயருக்கு காரணம் சொல்கிறது படத்தின் அட்டகாசமான சூப்பர் முன்னோட்டம் .
அசத்தலான அந்த முன்னோட்டம் மற்றும் திரையிடப்பட்ட ஒரு பாடல் இரண்டிலும் பானு முருகனின் ஒளிப்பதிவு , ஜோஷ்வா ஸ்ரீதரின் இசை , ரெஜீஷின் படத்தொகுப்பு எல்லாம் சிறப்பாக இருந்தது .
விளைவு? இப்போதே கவனம் ஈர்க்கிறது இந்த 54321
படத்தின் பாடல்களை கார்த்திக் சுப்புராஜ் வெளியிட, தயாரிப்பாளர் சங்க தலைவர் கலைப்புலி எஸ் தாணு மட்டும் முக்கியப் பொறுப்பாளர்களான டி.சிவா, தேனப்பன் ஆகியோர் பெற்றுக் கொண்டனர்.
“நான் கார்த்திக் சுப்புராஜின் ரசிகன் . இனி அவரது உதவியாளரான ராகவேந்திர பிரசாத்துக்கும் ரசிகன் ஆகிவிடுவேன் போல இருக்கிறது . கார்த்திக் சுப்புராஜின் சிஷ்யன் என்பதை நிரூபித்து இருக்கிறார் ராகவேந்திர பிரசாத் ” என்றார் சிவா .
முதலில் பேசிய இயக்குனர் ராகவேந்திர பிரசாத் ” என் தாய் தந்தை , எனது குருநாதர் கார்த்திக் சுப்புராஜ் , எனது தயாரிப்பாளர்கள் ராஜா மற்றும் கண்ணனுக்கு நன்றி ” என்று பேசி இருக்க ,
இயக்குனர் கார்த்திக் சுப்புராஜ் தனது பேச்சில் , ” நான் யார் கிட்டயும் அசிஸ்டண்டா ஒர்க் பண்ணல. அதனால எனக்கு ஒர்க் பண்ணின அனுபவம் உள்ள அசிஸ்டன்ட் வேணும் என்பதற்காகவே அவரை அசிஸ்டன்ட் டைரக்டரா வைத்துக் கொண்டேன். ஏனென்றால் அவர் முன்பே சில படங்களில் பணியாற்றி இருந்தார்.
ராகவேந்திர பிரசாத் எப்பவும் எதுக்கும் ரியாக்ட் பண்ணவே மாட்டார் . அவர் கோபப்படுறாரா ? சந்தோஷப் படுறாரா? எதுவும் கண்டு பிடிக்க முடியாது . அவர் முகத்தைப் பார்த்தா திடீர்னு ‘கன்’ எடுத்துட்டு வந்து சுட்டுட்டுப் போய்டுவார் என்கிற மாதிரியே இருக்கும். ஆனா இப்போ கன் மாதிரி படம் கொடுத்து இருக்கார்.
நான் படம் பார்த்துட்டேன் . எல்லாரும் நல்லா பண்ணி இருக்காங்க . பிளாஷ் பேக்ல ரெண்டு குட்டிப் பசங்க ரொம்ப சிறப்ப பண்ணி இருக்காங்க. நிச்சயமா இந்தப் படம் வெற்றி பெறும். ராகவேந்திர பிரசாத்துக்கும் மொத்த படக் குழுவுக்கும் என் வாழ்த்துகள் ” என்றார் .
தயாரிப்பாளர் ராஜன் தனது பேச்சில் “கியூப் தொழில் நுட்பத்துக்கு அதிக தொகை கொடுக்க வேண்டி இருப்பதாகவும் அதற்கு சீக்கிரம் ஒரு தீர்வு காண வேண்டும் என்றும் ஆவேசமாகப் பேசி இருக்க ,
எஸ் தாணு பேசும்போது ” கியூப் கட்டணத்தை இரண்டு விதமாக மாற்றி அமைக்க கியூப் நிறுவனம் சார்பில் அதன் நிர்வாகி செந்தில் ஒத்துக் கொண்டு இருக்கிறார். பெரிய படங்களுக்கு வழக்கமான ரேட் . சிறிய படங்களுக்கு வாரத்துக்கு மூன்று ஆயிரம் ரூபாய் என்று கியூப் ரேட் குறைய இருக்கிறது .
அதே போல பெரிய படங்களுக்கு தியேட்டர்களில் போடப்படும் விளம்பரங்கள் மூலம் வரும் தொகை இதுவரை கியூப் நிறுவனத்துக்கு மட்டுமே போனது . இனி அந்தத் தொகையையும் மூன்றாகப் பிரித்து ஒரு பகுதி கியூப் நிறுவனத்துக்கு , இன்னொரு பகுதி தியேட்டர் உரிமையாளருக்கு மூன்றாவது பகுதி தயாரிப்பளருக்கு என்று கொடுக்கப்படுவதற்கான பேச்சு வார்த்தை நடந்து வருகிறது ” என்றார் . நல்ல செய்திதான் .
அதே நேரம் தியேட்டர் கட்டணம், அங்கே விற்கப்படும் தின்பண்டங்களின் விலை , பெரிய மால் தியேட்டர்களில் பார்க்கிங்குக்கு வசூலிக்கப்படும் அநியாயத் தொகை .. இவை பற்றியும் ராஜன் பேசிய பேச்சுக்கு… எந்தப் பதிலும் இல்லை.
பன்னீர் தெளிக்கணுமோ, என்னவோ ?
