ஷங்கர் வி தியாகராஜன் தயாரிப்பில் , கேபிள் ஷங்கர், ஷங்கர் வி தியாகராஜன், அஜயன் பாலா , சுரேஷ் EAV, லோகேஷ், ஸ்ரீதர் வெங்கடேசன் என்ற ஆறு இயக்குனர்கள்,
ஆளுக்கு ஒன்று என இயக்கிய ஆறு குறும்படங்களின் தொகுப்பாக வந்திருக்கும் படம் ஆறு அத்தியாயம் .
ஆபத்துக்களை தடுக்கும் சம்பவங்கள் எங்கு நடந்தாலும் அதை கேள்விப்படும் போது அதை தானே செய்ததாக நம்பும் ஒரு மன நலம் பாதிக்கப்பட்ட நபர் ,(தமன் குமார்) , மன நல மருத்துவரை (எஸ் எஸ் ஸ்டான்லி ) சந்திக்க வந்த பிறகு நடக்கும் நிகழ்வை சொல்லும் வகையில்,
கேபிள் ஷங்கர் எழுதி இயக்கியுள்ள குறும்படம் சூப்பர் ஹீரோ . (ஒளிப்பதிவு சி ஜே ராஜ்குமார், இசை பி சி சாம் படத் தொகுப்பு விஜய் சங்கர் )
பாலியல் பலத்காரம் செய்து பெண்களைக் கொல்லும் ஒருவனை (பாப் சுரேஷ்) அவனால் அப்படி கொல்லப் பட்ட ஒரு இளம்பெண்ணும் ( திவ்யா) ஒரு சிறுமியும் (பேபி சாதன்யா) எப்படி பழி வாங்குகிறார்கள் என்பதை சொல்லும் வகையில் ,
ஷங்கர் வி தியாகராஜன் எழுதி இயக்கி இருக்கும் படம் இனி தொடரும் . ( (ஒளிப்பதிவு சி ஜே ராஜ்குமார், இசை பி சி சாம் படத் தொகுப்பு விஜய் சங்கர் )
நண்பனையும் (பசங்க கிஷோர்) அவன் காதலிக்கும் பெண்ணையும் (மது ஸ்ரீ) அசிங்கப் படுத்தும் நண்பர்களுக்கு கிடைக்கும் அனுபவத்தை சொல்லும் வகையில்,
அஜயன் பாலா எழுதி இயக்கிய மிசை (ஒளிப்பதீவு பொன் காசி ராஜன் , இசை ஜோஷுவா படத் தொகுப்பு பாலா )
ஊரோரமாக அக்கம் பக்கம் அதிக வீடுகள் இல்லாத இடத்தில் மாமா (கேபிள் ஷங்கர்) கட்டி இருக்கும் வீட்டுக்குப் போய், ‘பேயை’ப் (காயத்ரி) பார்த்த அனுபவத்தை பெறும் இளைஞனின் ( குளிர் சஞ்சீவ்) நிலை சொல்லும் வகையில்,
சுரேஷ் EAV எழுதி இயக்கி இருக்கும் படம் அனாமிகா . (ஒளிப்பதிவு அருன் மொழி சோழன், இசை தாஜ்நூர் , படத் தொகுப்பு மணி )
தன்னிடம் காதல் சொல்ல வந்த பெண் மற்றும் அம்மா பார்த்த மணப் பெண் ( சந்திரிகா , சங்கீதா) இருவரையும் தன்னிடம் இருந்து பிரித்து விடும் ஓர் ஆவியால் பாதிக்கப்பட்டு , நம்பூதிரியை (பிரான்சிஸ் ) பார்க்க வந்த இளைஞன (விஷ்ணு) கண்டுபிடிக்கும் ‘ரகசியத்தை’ சொல்லும் வகையில் ,
பேய்க் குறும்படங்கள் அடங்கிய ஆ என்ற படத்தை இயக்கிய இயக்குனர்களில் ஒருவரான ஹரீஷின் (இன்னொருவர் ஹரி ) கதைக்கு ,
திரைக்கதை வசனம் எழுதி படத் தொகுப்பு செய்து லோகேஷ் இயக்கி இருக்கும் படம் சூப் பாய் சுப்பிரமணி (ஒளிப்பதிவு அருண் மணி பழனி , இசை சதீஷ் குமார்))
புகழ் பெற்ற ஓர் ஓவியன் (வினோத் கிஷன்) ஒரு முக்கியமான ஓவியத்துக்காக கோகிலா என்ற வரலாற்று உண்மைக் கதையில் இருந்து- அநியாயமாக கோரமாக இறந்து போன கோகிலா என்ற பெண்ணின் முகத்தை எடுத்து ஓவியம் வரையப் போக ,
ஓவியத்துக்கு கண் திறக்கும் வேளையில் நடக்கும் விபரீதங்களை சொல்லும் வகையில் ஸ்ரீதர் வெங்கடேசன் எழுதி இயக்கிய படம் சித்திரம் கொல்லுதடி (ஒளிப்பதிவு மனோராஜா, இசை ஜோஸ் பிராங்க்ளின் , படத்தொகுப்பு விஜய் ஆண்ட்ரூஸ் )
இந்த ஆறு படங்களின் தொகுப்பே ஆர் அத்தியாயம் . இப்படி தொகுப்பதை அந்தாலாஜி என்கிறார்கள் .
ஒரு வகையில் இறையருட் செல்வர் ஏ பி நாகராஜன் எழுதி இயக்க , நடிகர் திலகம் சிவாஜி கணேசன், மற்றும் சாவித்திரி நடித்த திருவிளையாடல் படம் கூட ஒரு அந்தாலாஜி படம்தான் .
ஆனால் அன்றைய ரசனையைக் கருத்தில் கொண்டு , ஒரே கதாபாத்திரங்களே எல்லா கதைகளிலும் வருவதோடு எல்லா கதைகளுக்கும் பொதுவாக ஓர் ஆரம்பம் மற்றும் முடிவு கொடுப்பார்கள் . ( ஏ பி என் இயக்கிய பல படங்கள் அப்படியே )
பின்னர் நேரடி அந்தாலஜியை ஹாரர் அந்தாலஜியாக தங்களது ஆ படம் மூலம் தமிழில் துவக்கி வைத்தார்கள் ஹரி ஹரீஷ் இரட்டை இயக்குனர்கள் .
இயக்குனர் கார்த்திக் சுப்புராஜ் ஆறு குறும்படங்களை ஜஸ்ட் ஒரு படமாக திரையிட்டார் .
இந்த ஆறு அத்தியாயம் கூட ஹரி ஹரீஷ் இரட்டையர்கள் இயக்கிய ஆ போலவே ஒரு ஹாரர் அந்தாலாஜி படம்தான் . வித்தியாசம் என்ன என்றால் அதற்கான பரிமாணத்தை இந்தப் படம் விரிவாக்கி இருக்கிறது .
அதை விட முக்கிய சிறப்பு என்ன என்றால் , ஆறு படங்களையும் அடுத்தடுத்து முடித்து உதிரியாக்கி விடாமல் , ஆறு படங்களும் அடுத்து அடுத்து கிளைமாக்ஸ்க்கு முன்பு நிறுத்தி விட்டு அடுத்த படத்துக்குப் போய் விடுகிறார்கள் . கடைசியாக ஆறு கிளைமாக்ஸ்களையும் அடுத்துடுத்து சொல்கிறார்கள் .
அதில் குழப்பமோ மறதியோ வராத அளவுக்கு இந்த குறும்படங்களும் , அவற்றை வரிசைப் படுத்திய விதமும் ரசிகர்களை கட்டிப் போடுகிறது பாருங்கள் . அங்கே ஜெயித்து இருக்கிறார்கள் இந்த படைப்பாளிகள் . சபாஷ் !
சூப்பர் ஹீரோ படத்தை மிகவும் டைட்டான பிரேம்கள் சிறப்பாக வைத்து எதிர்பார்ப்பை ஏற்படுத்தும் வகையில் எடுத்து ஒரு இன்டலக்சுவலான முடிவில் முடிக்கிறார் கேபிள் சங்கர் . தமன் நன்றாக நடித்து இருக்கிறார் .
பேய்ப்படம் என்றாலும் அதில் ஓர் அழகான சோஷியல் மெசேஜ் சொல்லி, ‘ சட்டம் மூலம்தான் என்றில்லை பேய்கள் மூலமும் குற்றவாளிகளை மிரட்ட முடியும்’ என்று சொல்கிறார் இனி தொடரும் பட இயக்குனர் சங்கர் தியாகராஜன் .
கதையை துவங்கும் விதம் அபாரம் . அது அப்படியே தொடர்கிறது . அடுத்து வரும் காட்சிகளுக்கு ஏற்ற பொருட்களை முன் கூட்டியே காட்டும் விதமும் அதன் மூலம் சில சொல்லப் படாத கதைகளை விளக்கும் விதமும் சிறப்பு .
பேபி சாதன்யா சிறப்பாக நடித்துள்ளார் .
பொறமை கொண்டு நண்பனின் காதலை கொச்சைப் படுத்தும் நண்பர்கள் பற்றிய விழிப்புணர்ச்சிக்கும் அந்தக் குணம் உள்ள நண்பர்கள் பார்த்தால் கூட மனம் மாறும் அளவுக்கு அழுத்தமான படத்தைக் கொடுத்துள்ளார் அஜயன் பாலா .
இயல்பு வாழ்வில் நிறைய பார்க்க முடிகிற விஷயம் என்பதால் கூடுதல் கவனம் பெறும் படம் இந்த மிசை . நெகிழ்த்தும் கவிதை போன்ற முடிவு
பொன் காசி ராஜனின் ஒளிப்பதிவு கதையின் உணர்வுக் கூட்டலுக்கு மிக்க பக்க பலமாய் இருந்துள்ளது . தவிர மிக நேர்த்தியான ஒளிப்பதிவு கூட . பசங்க கிஷோர் சிறப்பாக நடித்துள்ளார்.
பெண் சபலத்தை பேயோடு சேர்த்துக் காட்டி கதற வைக்கிறார் அனாமிகா இயக்குனர் சுரேஷ் EAV. இயல்பான உரையாடலில் துவங்கி அது சுவையாகி, பிளாஷ் பேக்குக்குள் நுழைந்து , சபலம் , பேய் , மிரட்டல் என்று போகிறது படம் . நல்ல படமாக்கல் .
பெரும்பாலும் யூகிக்க முடியாத – வித்தியாசமான ஒரு முடிவை தந்து அடடே போட வைக்கிறார் சுரேஷ் EAV. நம்மளே மிஸ் பண்ணி விட்ட உணர்வு தரும் கிளைமாக்ஸ் .
தாஜ் நூரின் இசையும் சிறப்பு ஒலிகளும் கவனம் ஈர்க்கின்றன .
திடீர் என்று நாம் ஓர் அட்டகாசமான கலகலப்பான சுவாரஸ்யமான கமர்ஷியல் சினிமா பார்த்துக் கொண்டு இருகிறோமோ என்ற உணர்வை ஏற்படுத்துகிறது லோகேஷ் இயக்கி இருக்கும் சூப் பாய் சுப்பிரமணி .
இன்றைய வெகு ஜன சினிமாவின் வெற்றிகர ஃபார்முலாக்களான , காதல், காமெடி , பேய் மூன்றையுமே ஒரு குறும்படத்தில் கொடுத்த விதம் அபாரம் என்றால் ஒவ்வொரு காட்சியையும் அவர் உருவாக்கி இருக்கும் விதம் சிறப்பு .
படத்தின் ஒவ்வொரு நொடியையும் சிறப்பாக – பயனுள்ளதாக கையாண்டு இருக்கிறார் ராஜேந்திரன் .
ஹரீஷ் கொடுத்து இருக்கும் கதையின் கிளைமாக்ஸ் கலகல லக லக .
ஜஸ்ட் லைக் தட் ஒரு குபீர் சிரிப்பு முடிவு .
இப்படி ஒரு அட்டகாசமான வசன காமெடி உள்ள படத்தை லட்டு மாதிரி ரசித்து சாப்பிடாமல் சொதப்பி நடித்து இருக்கும் நாயகன் விஷ்ணுவை என்ன சொல்லி திட்ட ? முகம் கேரக்டருக்கு பொருத்தமாக இருந்தால் போதுமா ?
அம்மா பார்த்த மனப் பெண்ணாக வரும் நடிகை நடிப்பில் ஸ்கோர் செய்கிறார் .
கொஞ்சம் முயன்றால் இதில் இருந்து ஒரு முழு நீள கலகல படமே உருவாக்கலாம் . சபாஷ் .
ஆறிலும் பெஸ்ட் கதை என்றால் அது ஸ்ரீதர் வெங்கடேசன் இயக்கி இருக்கும் சித்திரம் கொல்லுதடி படம்தான் . ஓவியம் , வரலாறு, அமானுஷ்யம் , நூல்கள் செந்தமிழ் என்று பல பரிமாணங்களிலும் புகுந்து விளையாடி இருக்கிறார் .
கதை .. கதைக்குள் கதை என்று உள்ளே போய் அப்புறம் முழுக்கை சட்டையை கழட்டிக் கொண்டு வருவது போல உருவிக் கொண்டு வரும் விதமும் அழகான திரைக்கதைக்கு அடையாளம் .
சொல்லப் போனால் ஒரு முழு நீள திரைப்படத்தை மனிதர் குறும்படமாக சுண்டக் காய்ச்சி இருக்கிறார் என்றே சொல்லலாம். அதனால் தரப்பட்டிருக்கும் வேகம் படத்தைக் கொஞ்சம் கூர்ந்து கவனிக்க வேண்டிய அவசியத்தை உருவாக்குகிறது .
இரவு நேரக் காட்சிகள் எடுக்கப்பட்ட விதம் மிக சிறப்பு .
வினோத் கிஷன் சிறப்பான நடிப்பு .
மனோ ராஜாவின் ஒளிப்பதிவு, ஜோஸ் பிராங்க்ளின் இசை , விஜய் ஆண்ட்ரூஸ் படத் தொகுப்பு மூன்றும் வெகு சிறப்பு .
வரலாற்று ரெஃபரன்ஸ்களில் இயக்குனர் இன்னும் தெளிவாக இருந்து இருக்கலாம் . ஆயிரம் ஆண்டுகளுக்கு முன்பு ஆண்ட சோழ அரசன் முதலாம் ராஜேந்திர சோழன். ஆதி ராஜேந்திர சோழன் அல்ல . பொன்னியின் செல்வனில் வர்ணிக்கப்படும் ஏறி மதுராந்தகம் ஏரிஎன்று பெயரோடு சொல்லலாமே .
எனினும் சித்திரம் கொல்லுதடி அசத்தல்
பொதுவாக எல்லா படங்களுக்குமே நடிகர் நடிகையர் தேர்வில் மட்டும் இன்னும் கவனமாக இருந்து இருக்கலாம் .
அனாமிகா மிரட்டிய விதமும் சூப் பாய் சுப்பிரமணி ஜன ரஞ்சகப் படுத்திய விதமும் சித்திரம் கொல்லுதடி விழிகளை விரிய வைத்த விதமும் ஆறு அத்தியாயம் படத்தை ஒரு அட்டகாசமான முழு நீள திரில்லர் படத்தின் தன்மைக்கு உயர்த்துகின்றன .
அதேநேரம் இந்த வித்தியாசமான முயற்சியின் மூலம் தமிழ் சினிமா சரித்திரத்தில் இடம் பிடித்து விட்டார்கள் இந்த படைப்பாளிகள் !
ஆறு அத்தியாயம் …. அசத்தல் அத்தியாயங்கள் .
