ஒயிட் ஷாடோஸ் புரடக்சன் சார்பில் இயக்குனர் நவீன் தயாரிக்க , சமுத்திரக் கனி, சங்கவி, கிருபாகரன், நாசத் ,ராஜாஜி, நெய்னா சர்வார், ரஜினி, பிச்சைக்காரன் மூர்த்தி நடிக்க, தனராம் சரவணன் எழுதி இயக்கி இருக்கும் படம் கொளஞ்சி.
பெரியாரின் வழி நடக்கும் அப்பாசாமியின் ( சமுத்திரக் கனி) மூத்த மகன் கொளஞ்சி (கிருபாகரன்) , பள்ளியில் ஒழுங்காகப் படிக்காமல் ஒழிசலாக தவறான எண்ணங்கள் கொண்ட சிறுவனாக வளர்கிறான் . அதே நேரம் நட்புக்கு முக்கியத்துவம் கொடுக்கிறான் . அவனது நண்பன் அடிவாங்கி ( நாசத்)
அப்பாசாமியின் அண்ணன் மகளுக்கும் ( நைனா சர்வார்) அப்பாசாமியின் மனைவியின் (சங்கவி) அண்ணன் மகனுக்கும் (ராஜாஜி) காதல் . அந்த காதலுக்கு கொளஞ்சி உதவுகிறான் .
நாத்திகம் பேசும் அப்பாசாமிக்கும் சாதி ஆணவம் பேசும் வேலப்பனுக்கும் ( மூர்த்தி) பகை.
ஒரு நிலையில் பரிட்சையில் பெயில் ஆகும் கொளஞ்சி அதில் இருந்து தப்பிக்க, அப்பாவுக்கும் அம்மாவுக்கும் வரும் சண்டையை பெரிது படுத்தி அவர்கள் பிரியவே காரணம் ஆகிறான் . அக்கா- மாமாவின் காதலுக்கு உதவினால் அவர்கள் கல்யாண சமயத்தில் அப்பா அம்மா சேர்ந்து விடுவார்கள் என்று எண்ணி அந்தக் காதலையும் கலைத்து விடுகிறான் .
இந்த நிலையில் அப்பாசாமிக்கும் வேலப்பனுகும் உள்ள பகை ஒரு நிலையில் முட்டிக் கொள்ள அப்புறம் என்ன ஆனது என்பதே கொளஞ்சி .
வசமான கிராமத்துக் கதை. குடும்ப உறவுகள் பற்றிய கதை . படத்தின் சிறப்புகள் இவை . தனது சமூக அக்கறைக் கருத்துகளால் உறவுகள் மட்டும் ஊராரால் வித்தியாசமாகப் பார்க்கப்படும் நாயகன் , மிக சிறப்பான கதாபாத்திரம் . அருமை
பெரியார் தொண்டர் கேரக்டரில் சமுத்திரக்கனி ஈர்க்கிறார் பள்ளி செல்லும் மகன் பற்றிய கதை என்பது பாராட்டுக்குரியது .
கொளஞ்சி கிருபாகரன், அடிவாங்கி நசத் ஆகியோரின் நடிப்பு சிறப்பு . நசத் அங்காங்கே சிரிக்க வைக்கிறார். வில்லனாக பிச்சைக்காரன் மூர்த்தி பாராட்டும்படி நடித்திருக்கிறார்.
தமிழன் பெருமை சொல்லும் பாடலுக்கு பாராட்டுகள். ஆனால் இரவிலும் குடை பிடித்துக் கொண்டு திரியும் ஒரு கதாநாயகன் ( சென்ட்ராயன்) அந்தப் பாடலை பாடுகிறார் என்பதில் ஏதோ ஒரு வஞ்சக உள்குத்து !
திணிக்கப்பட்ட டூயட் பாடல்கள் !
ஒரு ஸ்கூல் பையன் நினைத்தால் கெடுத்து விடுமளவுக்கு தம்பதியும் காதல் ஜோடியும் இருக்கிறது . அதுவும் அந்த காதலி , காதலனைப் பற்றி யார் என்ன சொன்னாலும் கபால் கபால் என நம்புகிறார் .
தவறு செய்தால் பொறுப்பு இல்லாமல் இருந்தால் எல்லோரும் வெறுக்கத்தான் செய்வார்கள் . கண்டிப்பார்கள். அதற்காக அவர்கள் மேல் கோபப் படக் கூடாது. வஞ்சம் வைக்கக் கூடாது என்பதை கடைசிவரை கொளஞ்சியிடம் யாருமே அழுத்தமாக சொல்லவில்லையே . திரைக்கதை இன்னும் சிறப்பாக இருந்திருக்க வேண்டும்.
எனினும் மூட நம்பிக்கை , சாதி ஆணவம் இவற்றுக்கு எதிராக பேசும் படம் என்ற வகையில் பாராட்டுக்கு உரியவன் இந்த கொளஞ்சி
