ஜி ஈ எஸ் மூவீஸ் சார்பில் எஸ். இளங்கோவன் லதா தயாரிக்க, அபி சரவணன் , அதிதி , ராசிகா நடிப்பில் ஏ ஆர் சங்கரபாண்டி என்பவர் இயக்கி இருக்கும் படம் பட்டதாரி .
வெற்றிப் பட்டம் விடுவானா இந்த பட்டதாரி ? பார்க்கலாம் .
மதுரையில் படித்து விட்டு சரியான வேலை கிடைக்காமல் டீக் கடை , டாஸ் மாக் என்று சுற்றிக் கொண்டு இருக்கும் நண்பர்கள் சிவா (அபி சரவணன்), சுரேஷ் (அம்பானி சங்கர்), ரஞ்சித் (துரை) விஜி (கார்த்திக்)
மற்றும் டீக் கடையில் வேலை செய்யும் பாக்கியநாதன் (கலையரசன்) ஆகியோர் நண்பர்கள் .
இவர்களில் பலரும் ஒவ்வொரு பெண்ணை காதல் என்ற பெயரில் பயன்படுத்திக் கொள்ள முயல, ஒவ்வொருவரின் குட்டும் உடைந்து அந்த பெண்கள் அவர்களை விட்டுப் போகிறார்கள்.
ஆனால் சிவா மட்டும் எந்தப் பெண்ணையும் திரும்பிப் பார்க்காமல் இருக்கிறான்.
ஆனால் இலக்கியா (அதிதி) என்ற பெண் அவனை மனப்பூர்வமாக காதலிக்கிறாள் . அவள் எவ்வளவோ முயன்றும் சிவா காதலை ஏற்காத நிலையில் , இலக்கியா கார் முன் பாய்கிறாள் .
அவள் மருத்துவமனையில் சேர்க்கப் பட, குற்ற உணர்ச்சியோடு சிவா அங்கு வர, தன் காதலி ஏற்க மறுப்பது ஏன் என்று இலக்கியா கேட்க ,
தானும் சரோ என்ற பெண்ணும் (ராசிகா ) காதலித்த கதையையும் அந்த காதலுக்கு ஏற்பட்ட முடிவையும் சிவா கூறுகிறான் .
அந்த காதலின் முடிவு என்ன ? இலக்கியாவின் காதல் வெற்றி அடைந்ததா என்பதே பட்டதாரி
அபி சரவணன் உற்சாகமாக நடிக்கிறார் . அதிதியும் ராசிகாவும் அழகாக இருக்கிறார்கள் . நண்பர்கள் ஒகே .
வைக்கம் விஜயலட்சுமியின் குரலுக்கு அதிதியின் நடிப்பு பொருந்தவில்லை .
ராசிகா அப்பா ,அம்மா அண்ணன் , பெண் இன்ஸ்பெக்டர் ஆகியோர் நடிப்பு படு செயற்கை .
டைட்டில் போடும் விதம் முதல் பல வகையிலும் ஆர்வக் கோளாறு படம் முழுக்க தெரிகிறது .
கே டிவியில் நான்கைந்து சுமார் ரக படங்களைப் பார்த்து பிங்கி பிங்கி பாங்கி முறையில் காட்சிகளை செலக்ட் பண்ணி படமாக்கியது போன்ற ஓர் உணர்வு .
பல படங்களில் பார்த்த காட்சிகள் , கதைப்போக்கு , கேட்டுப் புளித்த வசனங்கள் . கிளைமாக்ஸ் சிறுபிள்ளைத்தனம் .
படம் பண்ண ஒரு தயாரிப்பாளரை கவர்ந்தால் போதும் . நல்ல படம் பண்ண சிறந்த ரசனையையும் வெற்றிப் படம் பண்ண மக்கள் கூட்டத்தையும் கவர வேண்டும் . அதற்கான எந்த முயற்சியும் படத்தில் இல்லை
பட்டதாரி … நிறைய அரியர்ஸ் காரணமாக பட்டம் கொடுக்கப்படவில்லை
