Ges மூவீஸ் சார்பில் இளங்கோவன் லதா தயாரிக்க, அபி சரவணன் , அதிதி , மகாநதி ஷங்கர் நடிக்க ,
எஸ் எஸ் குமரன் இசையில் ஆர் சங்கரபாண்டி இயக்கி இருக்கும் படம் பட்டதாரி .
படத்தின் பாடல்களை, எஸ் எஸ் குமரனை இசையமைப்பாளராக அறிமுகப்படுத்திய இயக்குனர் சசி வெளியிட , சங்கரபாண்டியின் குருநாதரான இயக்குனர் களஞ்சியம்,
மற்றும் தயாரிப்பாளர் தனஞ்செயன் ஆகியோர் பெற்றுக் கொண்டார்கள் .
திரையிட்ட முன்னோட்டத்தில் பட்டதாரி இளைஞர்கள் ஐவரின் வாழ்க்கை, , சண்டை, சச்சரவு சொல்லப்பட்டது . பாடல்கள் இரண்டை காட்சிகள் இல்லாமல்,
பாடல் வரிகளை படத்தின் புகைப்படங்களுடன் திரையிட்டனர் . பெண் குரல் மட்டும் பாடும் பாடல் ஒன்றில் பாடகி சிறப்பாக பாடி இருந்தார்
பொதுவாக பெண்கள் பெயரில் தயாரிக்கப்படும் படங்கள் அந்தப் பெண்களின் கணவர் , சகோதரர் அல்லது அப்பா ஆகியோராலேயே எடுக்கப்படும். சம்மந்தப்பட்ட பெண் படபிடிப்பை எட்டிக் கூடப் பார்த்து இருக்க மாட்டார் .
ஆனால் இந்தப் படததின் தயாரிப்பாளர் தம்பதியான இளங்கோவன் . லதா இருவரும் மேடையில் இருக்க ,
வரவேற்புரை ஆற்றிய லதா ” எங்களுக்கு இது முதல் படம். எல்லோரும் சிறந்த ஒத்துழைப்புக் கொடுத்தனர் .
நாங்கள் தொடர்ந்து நல்ல படங்கள் தரவேண்டும் என்று விரும்புகிறோம் .
எங்களுக்கு அனைவரின் தொடர் ஒத்துழைப்பும் வேண்டும் ” என்று ,
அழகாகவும் ஆக்கபூர்வமாகப் பேச, இளங்கோவன் மேடையில் அமர்ந்து அதை ரசித்தது…. அழகு! .
நிகழ்ச்சியில் தயாரிப்பாளர் சங்கம் சார்பில் கலந்து கொண்டு பேசிய அம்மா கிரியேஷன்ஸ் சிவா
” சிறு படத் தயாரிப்பாளர்கள் மற்றும் சிறு படங்களில் பணியாற்றும் இயக்குனர் உள்ளிட்ட படைப்பாளிகள்,
தங்கள் படங்களை சிறப்பான முறையில் மக்களிடம் அறிமுகப்படுத்தக் கற்றுக் கொள்ள வேண்டும். ” என்றார் .
இயக்குனர் களஞ்சியம் பேசும்போது ” பல மாதங்களுக்கு முன்பு நடந்த ஒரு விபத்தில் எனது உதவி இயக்குனர் ஒருவரை இழந்தேன் .
நானும் இந்தப் படத்தின் இயக்குனர் சங்கர பாண்டியும்
படுகாயத்தோடு உயிர் பிழைத்தோம் . அந்தத் தம்பி இந்தப் படத்தை இயக்கி இருப்பது மகிழ்ச்சி. படம் வெற்றி பெற வாழ்த்துகள் ” என்றார்
தனஞ்செயன் தன் பேச்சில் ” எஸ் எஸ் குமரன் இடையில் படம் இயக்க்ம், தயாரிப்பு என்று எல்லாம் போய் நஷ்டப்பட்டார் .
‘நீங்கள் சிறந்த இசையமைப்பாளர் . இசையில் கவனம் செலுத்துங்கள்’ என்று சொன்னேன் .
அதன்படி அவர் மீண்டும் இசையில் கவனம் செலுத்துகிறார் . வாழ்த்துகள் ” என்றார் .
சிறப்புரை தந்த இயக்குனர் சசி ” படத்தின் போஸ்டர் டிசைன் நன்றாக இருந்தது .ஆரம்பத்தில் இந்தப் படத்துக்கு பட்டதாரி பயலுக என்று பெயர் வைத்து இருந்தார்கள் .
அதை போஸ்டரில் பார்த்து இருக்கிறேன் . இப்போது பட்டதாரி என்று சுருக்கி உள்ளனர் .
பாடல்கள் நன்றாக வந்துள்ளன . நான் இசை அமைப்பாளராக அறிமுகப்படுத்திய எஸ்எ. ஸ் குமரனின் மறு எழுச்சிக்கு எனது வாழ்த்துகள்.
பிச்சைக்காரன் படத்தின் நான் அறிமுகம் செய்த கலை இயக்குனர் ஆனந்த் மணி இந்தப் படத்திற்கும் கலை இயக்குனராக இருக்கிறார் . அவருக்கும் வாழ்த்துகள் . படம் வெற்றி பெறவும் வாழ்த்துகள் ” என்றார் .
இயக்குனர் சங்கரபாண்டி பேசும்போது
” பொதுவாக படததில் ஐந்து நண்பர்கள் இருந்தால் ஒரு நபரை ஒரு பெண் காதலிப்பார் . மற்ற நண்பர்கள் அந்தக் காதலுக்கு உதவுவார்கள் .
ஆனால் நான் புதுமையாக ஐந்து பையன்களுக்கும ஜோடி கொடுத்து உள்ளேன் . அந்த பத்து பேரின் கதையே இந்தப் படம் ” என்றார் .
விழாவில் ஹீரோ ஹீரோயின் யாரும் கலந்து கொள்ளவில்லை .
