மலர் மூவி மேக்கர்ஸ் தயாரிப்பில் வினோத் லோகிதாஸ், திவ்யா துரைசாமி, சத்யா, ஷிவ் நிஷாந்த், விமல் ராஜா நடிப்பில் பாலு மகேந்திரா சினிமாப் பட்டறையில் பயின்ற மணி சேகர் இயக்கி இருக்கும் படம்.
ஐடி கம்பெனியில் வேலை பார்க்கிற – அதிலும் அலுவலகம் சென்றும் வீட்டில் இருந்தும் வேலை பார்க்கிற– காதலிக்கிற – பேச்சிலர் வாழ்வை ரசிக்கிற — தம் தண்ணி அடிக்கிற – அப்படி எந்தக் கெட்ட பழக்கமும் இல்லாத – ஸ்னூக்கர் விளையாடுகிற சில இளைஞர்கள் மற்றும் இளம்பெண்களின் வாழ்வில் சில மாதங்களில் நடக்கிற சம்பவங்களே படம் .
இயக்குனர் மணி சேகரின் ஷாட்களும் கார்த்திக் ஸ்வர்ண குமாரின் வண்ணம் ஜொலிக்கும் ஒளிப்பதிவும் கண்களை மயக்குகிறது
தனுஜ் மேனனின் இசையும் வீசமரின் கலை இயக்கமும் சிறப்பு. பொதுவில் வண்ணப் பயன்பாட்டில் அனைவருமே ஜொலித்து இருக்கிறார்கள்
நாயகன் நாயகிக்கு இயக்குனர் வைத்திருக்கும் நிலன் , நிரல்யா என்ற பெயர்கள் அற்புதம். குமரிக் கண்டத்தில் வாழ்ந்த பாண்டிய மன்னனின் பெயர் நிலந்தரு திருவில் பாண்டியன். 
இரட்டை அர்த்த நேரடிக் காமெடிகளை விட அன்பே சிவம் போன்ற புத்திசாலித்தனமான காமெடிகள் சிறப்பு . ஐ டி கம்பெனி எம் டி யாக வரும் ஸ்ரீதர் நாராயணன் சில காட்சிகளே வந்தாலும் கல கல .
நடிக நடிகையரிடம் சிறப்பாக வேலை வாங்கி இருக்கிறார் இயக்குனர் . கதாநாயகியை பாலு மகேந்திரா பாணியில் காட்ட முயன்று இருக்கிறார் . படமாக்குதலுக்கு சிரமமான ஸ்னூக்கர் விளையாட்டு சம்மந்தமான ஷாட்கள் இயக்குனருக்கு சபாஷ் போட வைக்கின்றன .
வினோத் லோகிதாஸ், திவ்யா துரைசாமி, சத்யா, ஷிவ் நிஷாந்த், விமல் ராஜா உள்ளிட்ட அனைவரும் இயல்பாக நடித்துள்ளனர் .
முத்துவின் உடைகள் அருமை .
சஞ்ஜீவன் என்ற வார்த்தை மொழிப் பிழை . சஞ்சீவன் என்பதே சரி . என் ஜீவன் என்பது போல சஞ்ஜீவன் என்று எழுதக் கூடாது .
மேக்கிங்கில் சிறப்பாக செயல்பட்டு இருப்பவர்கள் திரைக்கதையில் இன்னும் கவனம் செலுத்தி இருக்கலாம் .
இது ஸ்னூக்கர் விளையாட்டு சம்மந்தப்பட்ட படம் என்பதற்கு முன்னுரிமை கொடுத்து இருந்தால் அந்த பிரச்னை இரண்டாம் பாகத்திலும் தொடர்ந்திருக்க வேண்டும் . 
இயக்குனரின் கருத்துப்படி இது சில நண்பர்களின் சில மாத நிகழ்வுகளே என்றால் ஸ்னூக்கர் விளையாட்டு விசயத்துக்கு முதல் காட்சியில் இருந்து இடைவேளை வரை அவ்வளவு முக்கியத்துவமும் நேரமும் கொடுத்து இருக்கக் கூடாது .
இரண்டாம் பகுதியில் வரும் கிராமத்து திருடன் காட்சிகள் திரைக்கதைப் பஞ்சத்துக்கு உதாரணம் .
அதிலும் கஷ்டப்பட்டு ரசிக்கும்படி ஒரு கிளாமர் பாட்டு எடுத்து விட்டு அதை முடித்த விதமும் , மலம் கழிப்பது தொடர்பான காட்சிகளும் அருவருப்பு. அதை எல்லாம் காமெடி என்று இன்னமுமா (இளம் படைப்பாளிகள்) உலகம் நம்புது ?.
எனினும் இந்தப் படத்தின் இயக்குனர் உட்பட சில டெக்னீஷியன்கள் மற்றும் நடிகர்கள் சினிமாவில் வெற்றிகரமாக ஜொலிக்க வாய்ப்புகள் அதிகம் .
அனைவர்க்கும் வாழ்த்துகள் .
