ஆஸ்ட்ரிச் மீடியா புரடக்ஷன் சார்பில் ரவி நாராயணன் தயாரிக்க,
இந்த்ரா என்பவர் நாயகனாகவும் சில மலையாளம் மற்றும் தெலுங்குப் படங்களில் கதா நாயகியாக நடித்த கேரளாவைச் சேர்ந்த அதிதி என்பவர் நாயகியாகவும் நடிக்க ,
மேற்படி நாயகன் இந்த்ரா கதை திரைக்கதை வசனம் எழுதி இசை அமைத்து இயக்கும் படம் டியூப் லைட் .
இந்த இந்த்ரா, கார்ப்பரேட் கம்பெனிகளில் பணிபுரியும் ஊழியர்களின் ஆளுமை திறனை வளர்க்க ஒரு நூதன பயிற்சியை நாடகம் மூலம் அளிக்கும் பயிற்சியாளராக இருந்தவர்.
பல விளம்பரப் படங்களை இயக்கி அதற்கு இசையும் அமைத்தவர் .
இந்தப் படத்தின் ஒளிப்பதிவாளர் ஸ்ரீதர் , செல்வராகவன் இயக்கத்தில் கார்த்தி நடித்த் ஆயிரத்தில் ஒருவன், ஆர்யா நடித்த இரண்டாம் உலகம் ஆகிய படங்களுக்கு ஒளிப்பதிவு செய்த ராம்ஜியிடம் ,
உதவி ஒளிப்பதிவாளராக இருந்ததோடு , கீதாஞ்சலி செல்வராகவன் இயக்கிய மாலை நேரத்து மயக்கம் படத்துக்கு ஒளிப்பதிவு செய்தவர் .
தேசிய விருது பெற்ற குற்றம் கடிதல் படத்துக்கு படத் தொகுப்பு செய்த சி எஸ் பிரேம் இந்தப் படத்துக்கு படத் தொகுப்பு செய்கிறார் .
பாண்டியராஜன் இந்தப் படத்தின் ஒரு வித்தியாசமான முழு நீள கதாபாத்திரத்தில் நடிக்கிறார் . தவிர மலையாளத்தில் காமெடி ஹீரோவாக புகழ் பெற்றவரும்
தமிழில் டம்மி டப்பாசு என்ற படத்தில் ஹீரோவாக நடித்துள்ளவருமான பிரவீன் ரமேஷ் , நாயகனின் நண்பராக நடிக்கிறார்
படத்துக்கான பத்திரிக்கையாளர் சந்திப்பில் படத்தின் முன்னோட்டத்தை திரையிட்டனர் .
எதையும் ஐந்து நொடிகள் தாமதமாகவே புரிந்து கொண்டு எதிர்வினையாற்றும் ஓர் இளைஞனின் நட்பு மற்றும் காதலில் நடக்கும் நிகழ்வுகளை உடல் மொழி நகைச்சுவையால் இயக்குனர் சொல்ல முயல்வது புரிகிறது .
நிகழ்ச்சியில் பேசிய தயாரிப்பாளர் ரவி நாராயணன், ” படம் தயாரிக்க முடிவு செய்து பல கதைகளை கேட்டோம் . எதுவும் பிடிக்காத நிலையில்,
இந்த்ரா சொன்ன கதை புதுமையாக சுவாரஸ்யமாக இருந்தது . படத்தை எடுத்து இருக்கிறோம் ” என்றார் .
நாயகன் இந்த்ரா பேசும்போது , ” நிஜத்திலும் நான் ஓரளவுக்கு இந்தப் படத்தில் நடித்து இருக்கும் கதாபாத்திரம் போலத்தான் . அதில் நடக்கும் சில சுவாரஸ்யமான சம்பவங்களை யோசித்தபோது,
இதையே கதையாக செய்தால் இதுவரை வராத புதுமையான கதை வரும் என்று தோன்றியது . அப்படியே செய்தேன்.
பாண்டிய ராஜன் சார் இது வரை பண்ணாத ஒரு வித்தியாசமான கேரக்டர்ல வர்றார் . ‘என்னை இப்படி ஒரு கோணத்தில் நானே யோசிச்சுப் பார்க்கல’ என்று படம் நடித்து முடித்த போது பாராட்டி விட்டுப் போனார்.
படம் சிறப்பாக வந்திருக்கிறது . காதலை நட்பை பிரச்னையை ஸ்லாப்ஸ்டிக் காமடி மற்றும் பாடி லேங்க்வேஜ் காமடி மூலம் சொல்லி இருக்கிறேன் “என்றார்
”வாழைப் பழத்தில் வழுக்கி விழுவதை எல்லாம் ச பார்த்து சிரிக்கிற ஸ்லாப்ஸ்டிக் காமெடி தமிழ் சினிமாவில் காலாவதி ஆகி விட்டது . இந்த நிலையில் நீங்கள் சொல்வது படத்தின் வெற்றிக்கு பலன் தருமா ?” என்றேன் .
” இப்போ என்ன ட்ரெண்ட் என்பதை நான் பெருசா நினைக்கல. சிறு வயது முதலே சார்லி சாப்ளின் ரசிகன் நான் . அவரது ஸ்லாப் ஸ்டிக் மற்றும் பாடி லேங்க்வேஜ் காமெடிக்கு இன்றும் உலகம் முழுக்க வரவேற்பு இருக்கு .
அது போல சிறப்பான ஒரு வெற்றிகரமான காமெடி பிளஸ் காதல் படமா இது வரும் . எல்லாருக்கும் பிடிக்கும்” என்றார் .
வாழ்த்துகள் !
