ஆண்மை தவறேல் என்ற படத்தை இயக்கிய குழந்தை வேலப்பன் , தனது இரண்டாவது படமாக இயக்கி இருக்கும் படம் யாக்கை .
யாக்கை என்றால் உயிருள்ள உடம்பு என்று பொருள். இந்தப் படம் உயிருள்ள படமா ? பார்க்கலாம்
வழக்கை விசாரிக்க வருகிறார் விசாரணை அதிகாரி சகாயம் ( பிரகாஷ் ராஜ்) . அவரது உதவியாளர் முனியப்பன் (சிங்கம் புலி) .
கிருஷ்ணா மூர்த்தியின் மகனும் அயல்நாடு வாழ் இந்தியருமான ஸ்ரீராம் (சோம சுந்தரம்) அப்பாவின் மரணத்தை கொண்டாடும் நபராக இருக்க, அவன் மீதே போலீசுக்கு சந்தேகம் வலுக்கிறது .
இன்னொரு பக்கம் புகைப்படக்காரர் தயாளனின் ( எம் எஸ் பாஸ்கர்) மகனும் கல்லூரி மாணவனுமான கதிருக்கும் (கிருஷ்ணா) ,
அதே கல்லூரி மாணவியும் , பேச்சு மாற்றுத் திறனாளிகள் பள்ளியில் சேவை செய்பவளும் ரத்த தானத்தில் மிக ஆர்வம் கொண்டவளுமான கவிதாவுக்கும் (சுவாதி) மோதல் அப்புறம் காதல் .
ரத்த வகைகளான ஏ , பி , ஓ போன்றவை அல்லாது, ஹெச் குரூப் என்றும் பாம்பே பிளட் என்று அறியப்படும் மிக அரிதான ரத்த வகை பெற்றவள் கவிதா
கவிதா — கதிர் காதல் கல்யாணத்தை நோக்கி முன்னேறும் வேளையில் ஒரு விபரீதம் நடக்கிறது . அதன் வேர் ஒரு குற்றத்தில் இருக்கிறது . அதன் பிறகு கவிதா , கதிருக்கு நடந்தது என்ன? என்பதே இந்த யாக்கை .
வெகு நிதானமான கேமரா நகர்வுகளோடு நீண்ட ஷாட்களை அழகாக வைக்கிறார் இயக்குனர் குழந்தை வேலப்பன் .
சின்ன சின்ன காட்சிகளை கூட அழுத்தமாக விவரணையாகச் சொல்கிறார் . நல்ல லொக்கேஷன்கள் கேமரா கோணங்கள் என்று தேர்வு செய்து காட்சிப்படுத்துகிறார்
பேச்சு மாற்றுத் திறனாளிகளின் தேசிய கீதம் காட்சி அருமை . இப்படி ஓரிரு இடங்களில் வித்தியாசமான விசயங்களை தேடிப் போயிருப்பது சபாஷ் போட வைக்கிறது
கேமரா மேன் சத்யா பொன்மார் இயக்குனருக்கு பெரிதாக உதவுகிறார் . பின்னணி இசை நன்றாக இருக்கிறது
கிருஷ்ணா மிக உற்சாகமாக வருகிறார் . சில இடங்களில் அதீத உற்சாகம் செயற்கையாக இருக்கிறது . ஒரு இடைவேளைக்குப் பிறகு சுவாதி தெத்துப் பல் சிரிப்போடு வளைய வருகிறார் .
விசாரணை அதிகாரியாக படம் முழுக்க, தனக்கே உரிய மேனரிசங்களோடு வருகிறார் பிரகாஷ் ராஜ் .
இதுவரை கிராமத்து , ஏழை மனிதராகவே நடித்த சோம சுந்தரம் , இதில் அயல்நாடு வாழ் இந்தியராக வருகிறார் .
இப்படி எல்லோரும் வருகிறார்களே தவிர , நின்று விளையாடக் காணோம் . காரணம், மிக பலவீனமான திரைக்கதை.
அணு அணுவாக கேமரா நகரும் ஷாட்களின் நீளமும் , நிதானமும் வளரும் கால அளவும் படத்தின் ஆரம்பக் காட்சிக்கு ஒகே . எல்லா இடத்திலும் கேமரா அதே வேகத்தில் போனால் எப்படி?
நகை வாங்கக் கதிர் போராடும் ஓரிரு காட்சிகள் தவிர கதிர் கவிதா காதல் கட்சிகளில் சுவாரஸ்யம் பெரிதாக இல்லை . இடைவேளை டுவிஸ்ட்டை முன்னரே ஊகிக்க முடிவதால் பெரிதாக அதிர்ச்சி தரவில்லை.
பாம்பே பிளட் என்பது வெகுஜன மக்கள் அறியாத விஷயம் . அது பற்றி தெளிவாக அழுத்தமாக வெகு ஜன ரசிகனுக்கு விளக்க வேண்டாமா ?
கடைசிக் காட்சிகளை மிக அழகாக இயக்கி இருக்கிறார் குழந்தை வேலப்பன் . ஆனால் அவை எத்தனையோ படங்களில் பார்த்து சலித்த காட்சிகளே என்பதால் பெரிதாக பாதிக்கவில்லை
மொத்தத்தில் யாக்கை….. கவலைக்கிடம் !.
