அவ்னி சினிமேக்ஸ் மற்றும் பென்ஸ் மீடியா சார்பில் குஷ்பூ சுந்தர் மற்றும் ஏ சி எஸ் அருண்குமார் தயாரிக்க, ஸ்ரீகாந்த், ஜீவா, ஜெய், ஸ்ரீகாந்த், மாளவிகா சர்மா, அம்ரிதா நடிப்பில் சுந்தர் சி எழுதி இயக்கி இருக்கும் படம் .
இளம் வயதில் இருக்கும் மூன்று ஆண் பிள்ளைகள் ( ஸ்ரீகாந்த், ஜீவா, ஜெய் ) இரண்டாவது பையனோடு இரட்டையராகப் பிறந்த ஒரு மகள் (திவ்யதர்ஷினி) ஆகியோரைக் கொண்ட ஒரு குடும்பத்தின் மூத்த மகன், தனது மனைவி (சம்யுக்தா) இருக்கும்போது வேறு பெண்ணைத் தேடுகிறான் .
இரண்டாவது மகன் தன்னோடு லிவிங் டுகெதரில் வாழும் பெண்ணுக்கு (ஐஸ்வர்யா தத்தா) பெரும் சொத்து சேர்த்து வைக்க , அவளோ தனக்குப் பிடித்த நடிகனோடு போய் விடுகிறாள் .
மூன்றாவது மகன் சிறு வயது முதலே தன்னை நேசிக்கும் பெண்ணை ( அம்ரிதா அய்யர்) புறக்கணித்து ,பணம் மற்றும் சொத்துக்காக , அப்பாவின் ( பிரதாப் போத்தன்) பணக்கார நண்பரின் மகளைத் திருமணம் செய்ய முடிவு செய்கிறான் .
மூவரின் சகோதரியோ நிறைமாத கர்ப்பிணியாக இருக்க, அவள் கணவன் வேலை பிசியில் வீட்டுக்கு வராமலே இருக்க,
மூத்த மகன் ஒரு பெண்ணை (ரைசா வில்சன்) பார்த்த அன்றே படுக்கை வரை போய்விட , அந்தப் பெண்ணை இரண்டாவது பையனுக்கு பெண் பார்த்து விட , மூன்றாவது மகனுக்கு நிச்சயம் செய்யப்பட்ட பணக்கார நண்பரின் மகள் இரண்டாவது பையனை விரும்ப , அவனோ தனது தம்பிக்காக அவளை புறக்கணிக்க,
மூன்றாவது மகனை சிறுவயது முதல் நேசிக்கும் பெண் அவனது பண வெறி கண்டு விலகி வேறு ஒருவனை காதலிக்க அவன் மருக, பெற்றோரும் சகோதரியும் குழம்ப ..
இது போதாதா சுந்தர் சி க்கு ?
கலர் புல்லான – கவர்ச்சி திமிறுகிற ( படத்தில் வரும் ஓரிரு பெண்களைத் தவிர எல்லோரும் உறிச்சு மஞ்சள் தடவி வைக்கப்பட்ட போன்லெஸ் சிக்கன் போலத்தான்) காமெடியும் இருக்கிற ( யோகி பாபு அதுவும் நாலு கெட்டப் மற்றும் ரெடின் கிங்ஸ்லி ) படம் பார்சல்ல்ல்….. !
சுந்தர் சி யின் டைரக்ஷன் அனுபவம் வேலையை சுலபமாக்கி இருக்கிறது
சில நல்ல செண்டிமெண்ட் காட்சிகளும் உண்டு . குறிப்பாக மகளுக்கு மாப்பிள்ளை தேடியது பற்றி அப்பா சொல்லும் காட்சி . குறிப்பாக அதில் திவ்யதர்ஷினிக்கு இயக்குனர் சுந்தர் சி வைத்து இருக்கும் ஒரு ஷாட்… அடடா ! காவிய நெகிழ்வு .
மூத்த மகனின் மகளை வைத்து கிளைமாக்சில் கரை புரளும் நகைச்சுவை, செண்டிமெண்ட் இரண்டும் லகலக ரகளை.
ஸ்ரீகாந்த், ஜீவா, ஜெய், ஸ்ரீகாந்த், மாளவிகா சர்மா, அம்ரிதா, திவ்ய தர்ஷினி, சம்யுக்தா அனைவரும் சிறப்பாக நடித்துள்ளனர் . ஐஸ்வர்யா தத்தாவும் ரைசா வில்சனும் சும்மா கட்டி ஏறுகிறார்கள்.
கணவனை மீண்டும் தன் பக்கம் திருப்ப உடம்பு குண்டாகாமல் இருக்க சாப்பிடாமல் பட்டினி கிடப்பது பற்றிய காட்சியில் நெகிழ வைக்கிறார் சம்யுக்தா .
என்ன….. பிரதாப் போத்தன் வசனம் பேசும் போது மட்டும் இப்படி ஒரு பம்பாயில் பிறந்து வளர்ந்த மலையாளத் தகப்பனுக்கு இத்தனை பக்கவான தமிழ்ப் பிள்ளைகளா என்ற சந்தேகம் வருகிறது . 
யுவன் சங்கர் ராஜாவின் இசை மற்றும் ஒளிப்பதிவு, எடிட்டிங், உடைகள், கலை இயக்கம் , வண்ணப் பயன்பாடு அனைத்து வகையிலும் படம் குளிர்ச்சி .. கிளர்ச்சி.. கிளர்ச்சி … கிளர்ச்சி !
இது முழுக்க முழுக்க வம்படியாக இட்டுக்கட்டி இட்டுக்கட்டி டெக்னிக்கலாக உருவாக்கப்பட்ட கதை திரைக்கதை என்பது அப்பட்டமாகத் தெரிவதும் அதன் விளைவுகளும்தான் குறை . .
காபி வித் காதல் …. இளமை துள்ளும் பக்கவான ஒரு சினிமாத்தனமான சினிமா
