டான் புரடக்ஷன் மற்றும் டிரைபல் ஆர்ட் புரடக்ஷன் சார்பில் ஹரிஹர நாகநாதன், முத்து , காளீஸ்வரன் ஆகியோர் தயாரிக்க,
விதார்த், ஐஸ்வர்யா ராஜேஷ், பூஜா தேவரியா, நாசர், ரகுமான், ஜோக்கர் புகழ் குரு சோம சுந்தரம் ஆகியோர் நடிப்பில்
காக்காமுட்டை என்ற தங்க முட்டையை தந்த மணிகண்டன் எழுதி ஒளிப்பதிவு செய்து இயக்கி இருக்கும் படம் குற்றமே தண்டனை .
குற்றமே தண்டனை என்றால்…. ?
குற்றவாளியை தண்டனை என்ற பெயரில் தூக்கில் போடுகிறோமே அந்தக் குற்றத்தை படம் சொல்கிறதா ?
இல்லை ஒருவரது மன சாட்சியை தூண்டி விட்டால், அவன் செய்த குற்றத்தை எண்ணி வருந்துவதை விட பெரிய தண்டனை இல்லை என்று சொல்ல வருகிறதா ?
“இரண்டாவது விஷயம்தான்” என்று ஆரம்பிக்கும் மணிகண்டன் ” நாம் செய்தது குற்றம் என்று தானே உணரும் உணர்வை ஒருவனுக்கு உண்மையாக ஏற்படுத்தி விட்டால் ,
அப்புறம் அந்த குற்றமே அவனுக்கு தண்டனையாக இருக்கும் . இது படத்தின் அடிப்படை நோக்கம் .
அதே நேரம் யதார்த்தம் எப்படி இருக்கிறது ?
குற்றம் செய்கிற எல்லாருமே அதை மறைத்து விட்டால் போதும் . அப்புறம் அது குற்றம் ஆகாது என்ற நம்பிக்கையில்,
அதை மறைக்க தங்கள் அறிவு , திறமை , பலம் , பணம் எல்லாவற்றையும் பயன்படுத்துகின்றனர் . இதுதான் படத்தின் டிராவல் .
முரண்பாடான இந்த இரண்டு விசயங்களையும் சேர்க்கும்போது என்ன நடக்கும் என்பதே இந்தப் படம் .
அதே நேரம் இது நேரடியாக பிரச்சாரமாக படத்தில் சொல்லப் படாது .
ஒரு நாவல் படித்து முடியும்போது அதன் அடிநாதம் மென்மையாக மனதில் படியும் இல்லையா ? அப்படித்தான் இந்த விஷயத்தை படத்தில் சொல்கிறேன். “
— தெளிவாக திட்டவட்டமாக பேசுகிறார் மணிகண்டன் .
“படத்தில் கதாநாயகன் கதாநாயகி என்று யாரும் இல்லை . எல்லாருமே கதாபாத்திரங்கள் மட்டுமே .
விதார்த்துக்கு இந்த படம் ஒரு பெரிய பிரேக் தரும் . பூஜா தேவரியா சிறப்பாக நடித்துள்ளார் .படத்தில் அவரே பின்னணி குரல் பேசி உள்ளார் . ஆனால் வசனங்கள் கம்மிதான் .
சொல்லப் போனால் விதார்த்துக்கே வசனம் கம்மிதான் . ஐஸ்வர்யா ராஜேஷ் சிறப்பாக நடித்துள்ளார் . ரகுமான் ஒரு சின்ன இடைவேளைக்குப் பிறகு தமிழில் ஒரு பிசினஸ் மேன் கேரக்டரில் நடிக்கிறார்
வெகு யதார்த்தமான ஒரு போலீஸ் அதிகாரி கேரக்டரில் மாரிமுத்து சிறப்பாக நடித்துள்ளார் . அது பார்ப்பதற்கே புதுசா இருக்கும் . இளையராஜாவின் பின்னணி இசை படத்துக்கு பெரிய பலம் ” என்றவரிடம் ,
“காக்கா முட்டைக்கு அடுத்து வரும் படம் என்ற எதிர்பார்ப்பை இந்தப் படம் ஈடு செய்யுமா ?” என்று கேட்டேன் .
பதில் சொன்ன மணிகண்டன் ” கண்டிப்பாக செய்யும் . ஆனால் என்னை பொறுத்தவரை அது வேறு படம் இது வேறு படம் . அதை நினைத்து இதை பார்க்க தேவை இல்லை .
அந்தப் படத்துக்கு உரிய நியாயம் அதில் இருந்தது . இந்தப் படத்துக்கு உரிய நியாயம் இங்கே இருக்கும் ” என்கிறார்
அதுதான் நியாயம் .
