ஜல்லிக்கட்டு தடைக்கு எதிராக ஒரு வித்தியாசமான அமைதிப் போராட்டத்தில் வியாழக்கிழமை (12-01-2016) மாலை ஐந்து மணிக்கு ஈடுபடும் நடிகர் சிம்பு ,
அதற்காக கட்சி , சாதி மத வேறுபாடு இன்றி அனைவருக்கும் அழைப்பு விடுத்துள்ளார் . இது பற்றிப் பேச இன்று பத்திரிக்கையாளர்களை சந்தித்தார் சிம்பு .
“இலங்கை, மும்பை , கர்நாடகா, கேரளா , ஆந்திரா என்று எல்லா இடங்களிலும் தமிழனை அடித்தார்கள் .. அதுவாவது தமிழ்நாட்டுக்கு வெளியே .
காவிரி பிரச்னை , மீத்தேன் வாயு, கெயில் திட்டம் , அணு உலை ,என்று எல்லா வகையிலும் தமிழ் நாட்டுக்குள்ளேயே தமிழனின் வயிற்றில் அடித்தார்கள் .
இது போதாது என்று நம் வீட்டுக்குள்ளேயே வந்து நம்மை அடிக்கும் வேலைதான் ஜல்லிக்கட்டுக்கான தடை . தினசரி ஆயிரக் கணக்காக ஆடுகளையும் கோழிகளையும் கொன்று தின்று கொண்டு,
கண்ணுக்குட்டிக்கான பாலை ஏமாற்றி கறந்து காபி போட்டுக் குடித்துக் கொண்டு, காளைகளை பிள்ளை போல வளர்க்கும் நம்மிடம் ஜல்லிக்கட்டு காட்டு மிராண்டித்தனம் என்பது அயோக்கியத்தனம் .
விசயம் தெரியாத வெளிநாட்டுகாரன் , வடக்கத்திக்காரன் ஜல்லிக்கட்டு காட்டுமிராண்டித்தனம் என்றால் கூட பரவாயில்லை . தமிழ்நாட்டுலேயே கொஞ்ச பேர் சொல்றான் . இவன்லாம் என்ன மாதிரி ஆளுன்னே தெரியல .
எனக்கு வாய்ப்பு வசதி புகழ் எல்லாம் கொடுத்தது என் தாய் மொழியான தமிழும் அதன் கலாச்சாரமும்தான் , இனிமேலும் என்னால் சும்மா இருக்க முடியாது .
அதே நேரம் நம் போராட்டம் அமைதியானதாக இருக்க வேண்டும். .
எனவே நாளை (வியாழக்கிழமை ) மாலை ஐந்து மணிக்கு நான் சென்னை திநகர் மாசிலா மணி தெருவில் உள்ள எனது வீட்டு வாசலில் கருப்பு உடை அணிந்து கறுப்புக் கொடியோடு பத்து நிமிடம் அமைதியாக நின்று ,
ஜல்லிக்கட்டுக்கான தடைக்கு எதிராக அமைதிப் போராட்டம் நடத்த இருக்கிறேன் . என் தந்தையும் என்னுடன் போராட்டத்தில் கலந்து கொள்கிறார் .
என் வேண்டுகோள் என்னவென்றால் அதே நேரம் எனது ரசிகர்கள் , தமிழ் உணர்வாளர்கள் , தமிழக மக்கள் அனைவரும் அப்போது அவர்கள் எங்கே என்ன வேலையில் இருந்தாலும் ,
சரியாக ஐந்து மணிக்கு கருப்பு உடை அணிந்து கறுப்புக் கொடியோடு பத்து நிமிடம் அமைதியாக இருந்து ஜல்லிக்கட்டு தடைக்கான எதிர்ப்புணர்வை காட்டும்படி கேட்டுக் கொள்கிறேன் .
இது நம் ஒற்றுமையை காட்ட வேண்டிய நேரம் .
எனவே கட்சி , சாதி மத, வேறுபாடு இன்றி எல்லோரும் இதில் ஈடுபட்டு அதை ஃசெல்பி எடுத்து பரப்புங்கள் . நம் ஒற்றுமை உணர்வை மத்திய அரசுக்கு காட்டுவோம் ” என்றார் .
அதன் பின்னர் வந்து பேசிய டி. ராஜேந்தர் , “திரையில் ஹீரோவாக வந்து பஞ்ச் டயலாக் பேசுவது வீரம் அல்ல . என் மகன் தரையிலும் தான் ஒரு ஹீரோ என்று நிரூபித்து உள்ளான் .
இந்த போராட்டத்தில் அனைவரும் ஈடுபட்டு ஒற்றுமையை வெளிப்படுத்த வேண்டும் ” என்றார்
பாராட்டுக்குரிய விஷயம்
