படம், ரசிகர்களை தியேட்டரை நோக்கி அழுத்துமா? பார்க்கலாம்.
தனியார் நிறுவனத்தில் பணி புரிந்தபடி தற்கொலை தடுப்பு சேவை மையத்தில் தன்னார்வத் தொண்டாளராக இருக்கும் சிமி (பிந்து மாதவி) மீது , அடுக்கு மாடிக் குடியிருப்பு விற்பனை முகவராக பணியாற்றும் முகிலுக்கு (அட்டகத்தி தினேஷ்) காதல் வருகிறது.
படிப்பறிவு இல்லாத போதும் பிறவி மேதமை , அனுபவ அறிவு , உழைப்பு இவற்றால் அங்கீகரிக்கப்படாத விஞ்ஞானி மற்றும் தொழில் நுட்ப வல்லுனனாக விளங்கும் வசந்த் மீது (நகுல்), பொறியியல் மின்னணுவியல் தகவல் தொடர்பு இளங்கலைப் பட்டப் படிப்பு படிக்கும் மக்கு மாணவியான ஹரிணிக்கு (ஐஸ்வர்யா தத்தா) காதல் வருகிறது.
கல்லூரி புராஜக்ட் ரிப்போர்ட்டுக்கு வசந்த்தின் உதவியை நாடும் ஹரிணியின் காதலை வசந்த் ஏற்பது, முற்றிலும் புதிய களத்தில் நகைச்சுவை மட்டும் ரொமண்டிக் விஷயங்களுடன் இயல்பாக சொல்லப்படுகிறது.
சிமி மீது கண்ட உடன் காதல் கொண்டு, தற்கொலை செய்து கொள்ளும் விரக்தியில் உள்ள நபர் என்று சிமியால் பிழையாகக் கருதப்பட்டு, அதன் மூலம் பழக்கமாகும் முகிலின் காதலை, சிமி ஏற்பது பல நகைச்சுவை மற்றும் நெகிழ்வான காட்சிகளுக்குப் பிறகு நிகழ்கிறது .
முகில் சம்மந்தப்பட்ட ஒரு கட்டுமான நிறுவனத்தில், சுமார் எண்பத்தைந்து டன் எடை உள்ள வாஸ்து கல் ஒன்றை , கட்டிடத்தின் உச்சிக்கு ஏற்றும் முயற்சியில் இருக்கும் ஊழியர்கள் , அலுவலகத்தில் இருக்கும் உயர் அதிகாரிகளுடன் செல்போனில் அவ்வப்போது ஆலோசனை பெற்று, அதன்படி அந்தக் கல்லை ஏற்றிக் கொண்டு இருக்கிறார்கள் .
அப்போது முகிலைத் தேடி அங்கு வரும் சிமி எதிர்பாராத விதமாக ஒரு பள்ளத்தில் விழ, அவள் மீது கனமான பொருட்கள் விழுந்து அழுத்த, அவளால் எழ முடியாத நிலை . அவள் விழுந்து கிடக்கும் இடத்துக்கு நேர் மேலேதான் அந்த எண்பத்தைந்து டன் கற் பாறை மெல்ல மெல்ல மேலே ஏறிக் கொண்டு இருக்கிறது .
அங்கே அடுக்குமாடிக் குடியிருப்பு கட்டிடத்தில் வாஸ்து பாறையை மேலே ஏற்றுவதில் சிக்கல் ஏற்பட்டு, அது எந்த நேரமும் பிய்த்துக் கொண்டு விழும் என்ற நிலையில், மேற்கொண்டு என்ன செய்வது என்று கேட்க, பொறியாளர்கள் உயர் அதிகாரிகளை செல்போனில் தொடர்பு கொள்ளும் நொடி….
பாறைக்கு கீழே சிக்கி இருக்கும் சிமி தனது செல்போன் மூலம் காதலன் முகிலுக்கு தகவல் அனுப்புவதற்காக பட்டனை அழுத்திய நொடி ….
காரை வெடிக்க வைக்க முயலும் தீவிரவாதி வெடிகுண்டில் பொருத்தப்பட்ட போனுக்கு கால் செய்து இரண்டு ரிங் அடித்து முடித்த நிலையில் இன்னும் ஒரு ரிங் அடித்தால் பாம் வெடித்து விடும் என்ற நொடியில் …
மின்காந்தப் புயலின் விளைவால் சென்னையில் உள்ள அனைத்து செல்போன்களும் செயல் இழக்கின்றன .
இந்த நிலையில் வசந்த தனது விஞ்ஞான அறிவால் டி வி சிக்னல்களை லேண்ட் லைன் போன் மூலம் செல்போன் டவருக்கு அனுப்பி செல்போன்களுக்கு உயிர் கொடுக்க முயல, ஏர் டாக் என்ற செல்போன் நிறுவன அதிகாரிகளும் அந்த முயற்சியில் பார்வையாளர்களாக இருக்க, அவன் ஜெயித்து விடுவான் என்ற நிலை .
அப்படி அவன் வெற்றி பெற்றால், அதுவும் சீக்கிரம் வெற்றி பெற்றால் , வாஸ்து கல் பிய்ந்து விழுவதற்குள் முகிலுக்கு விஷயம் தெரிந்து , கம்பிக்குள் கால் சிக்கி குழிக்குள் அசைய முடியாமல் கிடக்கும் சிமி பிழைக்கலாம் . ஆனால் கால் டாக்சி பாம் வெடித்து பல உயிர்களை பலி வாங்கும்.
தனது முயற்சியில் வசந்த் தோற்றால், சிமியின் மேல் கல் விழுந்து அவள் நசுங்கி சாவது உறுதி . அதே நேரம் மின்காந்தப் புயல் கடந்த பிறகு செல்போன்கள் இயங்க , அப்போதும் பாம் வெடிப்பது உறுதி .
— என்ன நடந்தது என்பதே இந்த தமிழுக்கு எண் 1 ஐ அழுத்தவும் .
நகுல், தினேஷ், பிந்து மாதவி, ஐஸ்வர்யா தத்தா , அறிவியல் அறிவு நிறைந்த இல்லத்தரசி அம்மா ஊர்வசி, செல் போன் திருடனாக வரும் அஜய் இவர்களுக்கு முற்றிலும் புதிய களத்தில் வித்தியாசமான கதாபாத்திரங்கள் , கதாபாத்திரப் பணிகள் கொடுத்திருக்கும் விதத்தில் பெரிதாக ஸ்கோர் செய்கிறார் இயக்குனர் ராம்பிரகாஷ் ராயப்பா.
ஜொள்ளு விடும் முகிலை தற்கொலை எண்ணத்துக்கு கவுன்சிலிங் பெற வந்தவன் என்று என்னும் சிமி அவன் மீது அன்பு பாராட்ட , அவன் சொர்க்கத்தில் மிதக்க, உண்மை தெரிந்த நிலையில் காதலிக்க முடியாது என்று கூறும் சிமியிடம் “என்னை கண்ணா பின்னான்னு அசிங்கமா திட்டுங்க . அப்பவாவது உங்க மேல உள்ள காதல் போகுதான்னு பார்ப்போம் ” என்று முகில் கூற , திட்டவே தெரியாத சிமி அதற்காக பயிற்சி எடுத்துக் கொள்வது என்று, அந்த ஏரியா வெகு அட்டகாசம் .
உண்மையிலே திட்ட வேண்டிய சூழ்நிலை வருவது சிலீர் திருப்பம் என்றால் , சிமியின் சிறுவயது பிளாஷ்பேக் காட்சிகள், பொருள் பொதிந்த கனமான குறுங் கவிதை . சிமியின் கதாபாத்திரப் பணிக்கு அவ்வளவு அழகாக பொருந்துகிறது அந்த பிளாஷ்பேக் . சபாஷ் .
ஜி டி நாயுடு என்ற போன நூற்றாண்டு தமிழ்நாட்டு அதிசய மனிதரை நினைவு படுத்தும் நகுலின் கேரக்டர், தமிழ் சினிமாவுக்கு ரொம்பப் புதுசு . காதல், முத்தம். கட்டியணைப்பு எல்லாவற்றிலும் வெப்ப நிலை, ஈரப்பதம் , காற்றின் அளவு பார்க்கும் அவனது குனாதோசயத்துக்கும், அவனை காதலிக்கும் ஹரிணிக்குமான காட்சிகளும் அவனை பார்த்து அவளது தோழிகள் பயந்து ஓடுவதும் ஏக கலாட்டா .
இளம் பெண்களின் அதீத ஆண் நட்பு வட்டம் பற்றிய கிண்டல், தமிழர்களின் ஒற்றுமை இன்மை பற்றிய சுருக் ஊசி, , கல்லூரிகள் உருவாக்கும் ஆட்டு மந்தை மாணவக் கூட்டங்கள் பற்றிய விரக்தி, , எளிய மனிதர்களின் ஞானம் பற்றிய பெருமிதம், , அந்தக் கால அஞ்சாவது வகுப்பின் மகிமை பற்றிய இறுமாப்பு , அழுத்தப்பட்ட வர்க்கங்களின் நிலைமை பற்றிய பார்வை என்று….. பல ஏரியாக்களுக்குள் சும்மா புகுந்து விளையாடி , கவனத்தில் கொள்ள வேண்டிய இயக்குனராக உயர்ந்து நிற்கிறார் ராம் பிரகாஷ் ராயப்பா .
சதீஷ் சம்மந்தப்பட்ட காட்சிகள் மற்றும் ஊர்வசி மற்றும் ஹரிணியின் தோழிகள் சம்மந்தப்பட்ட காட்சிகளில் பட்டாசு வெடிக்கிறது செந்தில்குமாரின் வசனங்கள்.
நகுல் தினேஷ் இருவரும் நடிப்பில் சம அளவு முக்கியத்துவம் பெறுகிறார்கள் . போதைக் கண்களுடன் கொடுத்த வேலையை சிறப்பாக செய்கிறார் பிந்து மாதவி. ஒரு புதுமாதிரியான நடை உடை பாவனைகள் மற்றும் எக்ஸ்பிரஷன்களுடன் பிரெஷ்ஷான நடிப்பை வழங்கி இருக்கிறார் ஐஸ்வர்யா தத்தா . வாழ்த்துகள் !
படத்தின் மிகப்பெரிய பலம் எஸ் எஸ் தமனின் பாடல்களும் பின்னணி இசையும் . எல்லா பாடல்களும் இனிமையாக அணுகி முணுமுணுக்க வைக்கிறது .
‘சட்டுன்னு என்ன…’ பாட்டில் இசைக்கருவிப் பயன்பாடு அருமை . ‘ரோபோ ரோமியோ.. ‘ பாடல் மெட்டால் உற்சாகத் துள்ளல் போட வைக்கிறது பின்னணி இசை மிரட்டோ மிரட்டோ என்று மிரட்டுகிறது. பாடலின் மெட்டை ஒரு அளவுக்கு மேல் பின்னணி இசையாக ஊற்றி மூடுவதை மட்டும் குறைத்துக் கொள்ள வேண்டும் தமன் .
இன்னொரு மாபெரும் பலம் தீபக் குமார் பாடியின் ஒளிப்பதிவு. ஹெலிகாம் ஷாட்களில் பின்னி எடுக்கும் மனிதர், படம் பார்க்கும் நமக்கே வெர்டிகோ பீதியை ஏற்படுத்தி விடுகிறார் . கிராபிக்ஸ் வேலைகள் தனியாக தெரியாத அளவு கில்லாடித்தனமான ஒளிப்பதிவு. சாபு ஜோசப்பின் படத்தொகுப்பு தொய்வடைய விடாமல் பார்த்துக் கொள்கிறது
வன ராஜ் போட்டிருக்கும் செல்போன் டவர் செட் அட்டகாசம் . சுந்தரி திவ்யாவின் உடை அலங்காரமும் சிறப்பு .
என்ன ஒன்று .. செல்போன் டெக்னாலஜி தொடர்பான செமினார் ஒன்றில் இருக்கிறோமோ என்று என்னும் அளவுக்கு டெக்னிக்கல் வார்த்தைகளையும் விஷயங்களையும் படபடவென்று சொல்லிக் கொண்டே போகிறார்கள். இன்னும் கொஞ்சம் நிறுத்தி நிதானித்து எளிமையாக சொல்லி இருக்கலாம். ஒட்டு மொத்தமாகவே இன்னும் கொஞ்சம் திரைக்கதை மற்றும் படமாக்கத்தில் ‘அழுத்தி’ சொல்லி இருக்கலாமோ என்ற எண்ணமும் வருகிறது
ஆனாலும் சிமிக்கு என்ன ஆகும்? கால் டாக்சி எங்கே வெடிக்கும் என்ற பதட்டத்தை தக்க வைக்கிற அதே நேரம்…. எல்லா இடங்களிலும் சகட்டு மேனிக்கு நகைச்சுவை வெடியையும் வெடிக்க வைத்த விதத்தில் இந்தக் குறைகளை தாண்டிப் பாய்ந்து விடுகிறது படம்
மொத்தத்தில் …..
தமிழுக்கு தமிழுக்கு எண் 1 ஐ அழுத்தவும் …. நம்பி அழுத்தலாம் .
மகுடம் சூடும் கலைஞர்கள்
—————————————-
