விஷால் ஃ பிலிம் பேக்டரி தயாரிப்பில் விஷால் , பிரசன்னா, சிம்ரன் , தலைவாசல் விஜய் ஆகியோர் நடிக்க , மிஷ்கின் இயக்கும் துப்பறிவாளன் படத்தின் டீசர் வெளியீட்டு விழாவில்,
சுசீந்திரன், பாண்டி ராஜ் ஆகியோர் கலந்து கொண்டனர் .
நிகழ்ச்சியில் திரையிடப்பட்ட டீசர் அற்புதமாக இருந்தது . மிஸ்கினுக்கு மட்டும் எங்கிருந்துதான் கேமரா கோணங்கள் கிடைக்குமோ என்ற அதே சுவையான கேள்வி மனசுக்குள் தோன்றியது .
கார்த்திக்கின் அற்புத ஒளிப்பதிவு , அருள் கரோலியின் சிறப்பான இசை , கலை இயக்கம் , விஷாலில் தெறிப்பான ஆக்ஷன் நடிப்பு என்று எல்லாமே அசத்தல் .
நிகழ்ச்சியில் பேசிய சுசீந்திரன் பாண்டிராஜ் , திரு போன்ற இயக்குனர்களும் அதையே சொன்னார்கள் .
நிகழ்ச்சியில் பேசிய தயாரிப்பாளர் மெட்ராஸ் எண்டர்டெயின்மென்ட் நந்தகோபால் , ” விஷால் ஒரு நாள் ஷூட்டிங் வந்தால் அவருக்கு சம்பளம் பனிரெண்டு லட்ச ரூபாய் .
அதை விட்டு விட்டுதான் அவர் சங்கப் பணிகளில் நல்ல எண்ணத்தோடு ஈடுபடுகிறார் ” என்றார் .
நிகழ்ச்சியில் பேசிய மிஸ்கின் ” இதுவரை நான் இயக்கிய நடிகர்களிலேயே எனக்கு அதிக ஒத்துழைப்பு கொடுத்த நாயகன் விஷால் தான் .
இந்தப் படத்தின் சண்டைக் காட்சிகளுக்காக அவர் மிகவும் கஷ்டப்பட்டார் . பலமுறை அடிபட்டு ரத்தம் கொட்டியது . மிக சிறப்பான நடித்தும் உள்ளார் .
அது மட்டுமல்ல .. இவ்வளவு பெரிய ஹீரோ வாடா போடா என்று அழைக்கிற உரிமையை எனக்கு கொடுத்துள்ளான் .
என்னை அண்ணனான் ஏற்றுக் கொண்டுள்ளான் . என் தாயின் வயிற்றில் பிறந்த தம்பியாகவே அவனை பார்க்கிறேன் ” என்றார்.
விஷால் பேசும்போது ” நானும் இயக்குநர் மிஷ்கின் அவர்களும் 8 வருடமாக ஒன்றாக இணைந்து பணியாற்ற வேண்டும் என்று காத்திருந்தோம்.
அது தற்போது துப்பறிவாளன் என்ற அருமையான படம் மூலமாக நிஜமாகியுள்ளது. இந்தப் படத்தை ஆரம்பித்த போது முருகராஜ் உட்பட என் நலம் விரும்பிகள் பலரும்,
‘விஷால் ஒரு சைக்கோ; மிஷ்கின் ஒரு சைக்கோ . இந்த ரெண்டு சைக்கோக்களும் சேர்ந்து எப்படித்தான் படத்தை முடிக்கப் போவுதோ’ன்னு சொன்னாங்க . இப்போ படம் நல்லா வந்திருக்கு.
மிஷ்கின் சாரை எனக்கு மிகவும் பிடிக்கும். அவர் எனக்கு கிடைத்த பொக்கிஷம். துப்பறிவாளன் திரைப்படத்தில் என்னுடைய ‘கேரியர் பெஸ்ட்’ சண்டைக் காட்சிகளை பார்க்கலாம்.
ஒரு தயாரிப்பாளராகவும் , நடிகராகவும் எனக்கு துப்பறிவாளன் பாண்டியநாடை விட முக்கியமான படமாகும். நானும் , பிரசன்னாவும் சிம்ரன் அவர்களின் மிகப்பெரிய ரசிகர்கள்.
அவரோடு இந்த படத்தில் பணியாற்றியது நல்ல அனுபவம். எனக்கு துப்பறியும் நிபுணர்களின் உடல் மொழி மிகவும் பிடித்துவிட்டது. நான் பைரசி வேலை செய்யும் நபர்களை கண்டுபிடித்துவிட்டேன்.
எனக்கு அவர்கள் எங்கே இருக்கிறார்கள் என்று கூட தெரியும். அவர்கள் யார் , அவர்கள் தனி நபரா அல்லது ஒரு குழுவா என்பதை இன்னும் இரண்டு வாரத்தில் நிகழ்ச்சி ஒன்றில் அறிவிப்பேன்.
நான் காமராஜர் அய்யா அவர்களின் வழியில் நடப்பேன் , ஆனால் கண்டிப்பாக திருமணம் செய்துகொள்வேன்.’லட்சுமிகரமான’ பெண்ணை கண்டிப்பாக விரைவில் திருமணம் செய்வேன்.
ஒட்டுமொத்த திரையுலகமே சேர்ந்து நிச்சயம் புரட்சி தலைவர் எம்.ஜி.யார் அவர்களுக்கு 1௦௦வது ஆண்டு விழாவை சிறப்பாக நடத்துவோம்” என்றார் நடிகர் விஷால்.
