ஏடிஎம் புரொடக்ஷன் சார்பில் டி.மதுராஜ் வழங்க, நவ்தீப் தேஜஸ்வினி நடிப்பில், ராம் கோபால் வர்மா தெலுங்கில் இயக்கி,
தமிழில் மொழி மாற்றம் செய்யப்பட்டு வந்திருக்கும் சைக்காலஜிக்கல் ஹாரர் த்ரில்லர் படம் சாக்கோபார்
இந்த சாக்கோபார் ருசிக்குமா? இல்லை ஜல்ப்பு பிடிக்குமா? பார்க்கலாம்
கடல் போன்ற ஒரு பெரிய பங்களாவில் கல்லூரி மாணவி (தேஜஸ்வினி) ஒருத்தி தங்குகிறாள் . அவளது காதலன் (நவ்தீப்) அவளைப் பார்க்க வருகிறான் .
பங்களாவுக்குள் ஏதோ காரணத்துக்காக முன்பு இருந்தவர்கள் வைத்திருந்த ஒரு தவளை பொம்மையை உதைத்துத் தள்ளுகிறான் .
விளைவாக அந்த வீட்டுக்குள் சில பேய்கள் பலம் பெறுகின்றன . அவளை மிரட்டுகின்றன.
அவள் சொல்வது எல்லாம் அவளது கற்பனை என்று காதலன் சொல்லச் சொல்ல, அவளும் அதை நம்புகிறாள் . பேய்களைப் பார்த்து பயப்படாமல் இருக்கிறாள் .
ஆனால் அடுத்து அவனையும் பேய்கள் மிரட்ட , அப்போதுதான் அவனுக்கு உண்மை புரிகிறது .
இந்த நிலையில் தன்னைப் பற்றிய ஓர் அதிர்சியான உண்மையை அவள் சொல்ல , அடுத்து நடக்கும் எதிர்பாராத முடிவே சாக்கோ பார்
ஃப்ளோகேம் என்னும் படப்பதிவு முறையில் (ஸ்டெடிகேம் கேமராவை விட பல விதங்களில் முன்னேற்றப்பட்ட வடிவம் ) படமாக்கப்பட்ட படம் இது . எனவே படம் முழுக்க ஷாட்கள் அசத்துகின்றன . ஒளிப்பதிவு ஆஞ்சி
மொழி மாற்றுத் தமிழ் வசனங்களை தயாரிப்பாளர் மதுராஜே எழுதி இருக்கிறார் . பெரிதாக உறுத்தல் இல்லை .
ஒரு டைட்டான — மிக குட்டையான கால் சட்டை , முன் வயிறு வரை திறக்கும் பனியன் என்ற அதி சிக்கன உடையில், அந்த பெரிய பங்களாவுக்குள் நடந்து நின்று படுத்து குனிந்து நிமிர்ந்து ,
விபரீத போஸ்களில் கால் கைகளை விரித்து .. இப்படியாக தேஜஸ்வினி . பயம் உணரும் நடிப்பும் பரவாயில்லை. நவ்தீப் ஒகே .
பயமுறுத்துகிறேன் என்ற பெயரில் தேவை இல்லாத சத்தம் எழுப்பி எரிச்சலூட்டுகிறார்கள்.
அதுவும் அந்த கதவு தட்டும் சத்தம் ஓவர் . பத்து நாளைக்கு வீட்டில் கூட யாராவது கதவைத் தட்டினால் கடுப்பு வரும் போல இருக்கிறது.
கிளைமாக்ஸ் எதிர்பாராத ஒன்று . ஆனால் அதே நேரம் விட்டேத்தியாக முடிகிறது படம் .
